Daily Newspaper

PIANTHARNA

93

-Laltanpuia Pachuau

Hmanni deuh khan pastor pakhatin piangthar zing ber a hriat a sawi a, vawi 40 chuang “piangthar” tawh a ni awm e. Mizorama mihring awm zat aia tam hi piangthar kan awm niin thenkhatin fiamthu titihin an sawi bawk a. “Survey” te hi nei ta ila, vawi khat aia tam piantharna ka chang ti hi kan awm nawkin a rinawm.

Piantharna hi hriat theuh angin kan Lal Isua tawngkam a ni a. Bible-a a tawng bul lam leh saptawng te kan en chuan “piannawnna” tih a ni mah zawk a. A sawi tum chu chung lam atanga pian thu a ni.

He tawngkam kan hmuhna Lal Isua leh Nikodema te inkawmnaah khan piantharna awmzia hi kan Lalpa khan a sawifiah angreng khawp a. Nikodema zawhna ni miah lo chhangin, a thinlunga zawhna awm kha a chhang tih kan hria. “Tihtakmeuhvin, tihtakmeuhvin ka hrilh a che, mi tu pawh an pianthar loh chuan Pathian ram an hmu thei lo vang,” ti-a kan Lalpan a sawi khan Pathian ram hmuh theihna awm chhun chu pian nawnnaah a chauh a ni tih Nikodema khan a hria a. Mahse, piannawn a theih loh tih a hriat avangin “Mi a tar hnuin engtin nge a pian theih angt A nu pumah vawi hnih lûtin a piang thei em ni?” tiin a zawt let a ni.

Lal Isuan Pathian ram lut tur te chungchang sawifiahnana mihring pian thu a hmang kha mihring pian thu hrim hrimah kha chuan Nikodema khan a awmzia a hrethiam vek a. Mahse, thlarau lam thil Lal Isuan a sawi nen khan a kaikawp thiam lova. A bo hle a ni. Piannawnna emaw chung lam atanga pianna chungchanga a bozia hriain Lal Isuan, “Tihtakmeuhvin, tihtakmeuhvin ka hrilh a che, mi tu pawh tuiah leh thlarauva an pian loh chuan Pathian ramah an lût thei lo vang” tiin piantharna chungchang a hrilhfiah leh a. Helaia Lal Isua thusawi hi Kristian te zingah hian vawiin thleng pawhin hrilhfiah dik lo hi a tam zawk kan la ni awm e.

Tui leh thlarauva pian tih kha piantharna nen a intluk avangin awlsam te-a hrilhfiah tumin kohhran thenkhat chuan tuia baptisma chan sawinan te an hmang a. Mahse, piantharna hi baptisma chan vanga neih theih a ni lo tih Bible in chiang taka min zirtir avangin hetianga hrilhfiah hi hrilhfiahna dik lo a ni tih kan sawi thei a ni. Tin, Nikodema leh Lal Isua inkawm lai khan a thlawr emaw a hnimphûm emawa in baptis kha Isua ringtute zingah chhandamna nena inzawmin hman a la ni lo bawk a ni.

Nikodema kha a hunlaia theology professor ropui leh sang ber te zing ami a ni a. Thuthlung Hlui hre bel han tura ngaih a ni. Lal Isuan piantharna chungchang a sawinawna tui leh thlarau chuangchang a sawi khan Thuthlung Thara tui baptisma kha a rilru ah a lang lo tih kan hria a. Nikodeman a hriatchian em em tur erawh chu zawlnei Ezekiela hnena Pathian thutiam pakhat a ni – “Tin, in chungah tui fîm ka theh ang a, in lo thianghlim ang a, in bawlhhlawhna zawng zawng leh in milimte lak ata ka tlêng fai ang che u. Thinlung thar ka pe ang che u a, in chhûngah thlarau thar ka dah ang; in tisa ata thinlung, lung anga sak chu ka la bo vang a, thinlung, tisa anga nêm ka pe zâwk ang che u. Tin, in chhûngah ka thlarau ka dah ang a, ka dân siamah ka lêntîr ang che u a, ka thupêkte chu in vawng ang a, in zâwm ang” (Ezekiela 43:25-27)

Thuthlung Hluiah hian hei lo pawh hi Pathianin vawi tam siamtharlehna a sawinan tui leh thlarau a lo hmang tawh thin a ni.

Thuthlung Hlui-a Ezekiela hrilhlawkna hi kan en chuan Israel-te bawlhhlawhna Lalpa Pathianin a silfaina tura tui a hman thu kan hmu a. Tin, thinlung thar a pek tur thu leh thlarau thar a pek tur thu kan hmu bawk a ni. Hei hi Rom 11:26-a kan hmuh “Israel mi zawng zawng chhandamin an awm ang” tih lo thlen hun tur hrilhlawkna a ni a. Chumi hun a thlen hma zawnga Lal Isua Kristaa rinna nghattu zawng zawng te chhandamna chan tur thu hrilhlawkna pawh a ni. Pathianin mi a chhandam hian an sualte hi a silfai takzet a, an thinlung lung anga sak a tihnem sak a, thinlung thar a pe a, thlarau thar a pe a, an chhunga cheng reng tawh tur zakhamna Thlarau Thianghlim a pe bawk a ni.

He thu hi Thuthlung Hlui zirtirna hre hneh em emtu Nikodema khan a hriat ngei ngei tur a ni a. Mahse amah leh a farisai puiten Israel te chhandamtu an hai ang chiahin chhandamna thu, Pathian ram luh thu Lal Isuan a sawi kha a thelh fai vek a ni. Lal Isuan piantharna chungchang a hrilhfiah zelnaah, “Tisaa piang apiang tisa a ni; Thlarauva piang apiang thlarau a ni” tiin a sawi leh a. Thuthlung Hluia Pathianin hemi chungchanga a lo sawi tawh avangin “I piangthar tûr ka tih che hi mak ti suh” tiin Nikodema kha a hrilh bawk a ni. Lal Isuan Nikodema kha thlarauva pian thu hria leh hrethiam ngei ngei turin a beisei a nih ber chu.

A dawta Lal Isuan thli chungchang a sawi kha a ngaihtuah tham bawk. “Thli khawiah pawh a duh duhin a tleh thîn, a ri i hria e; nimahsela, khawi atanga lo kal nge, khawiah nge a kal dâwn tih pawh i hre si lo; tu pawh Thlarauva piang chu chutiangin an awm,” tiin Lal Isuan piantharna nei te chungchang a sawi a. Ngaihtuah ta la, a ngaithlatu kha Nikodema a ni a. A hrethiam lo tih Lal Isuan a hriat hnuah a aia hriatthiam har zawk emaw tih mai tur a la sawi zel a ni. Thli thaw hi tuman kan “control” thei lo ang chiahin Pathian ram lut thei tur mi piangthar te hi an piantharnaah Thlarau hnathawh a nih avangin tuman an va tih ve theih a awm lo a ni.

Nikodema kha, hriat angin, Thuthlung Hlui dante zawm thlap a ni a. Zirtirtu a la ni zui a ni. Dan lamah chuan Paula anga fir leh duhtui a ni a, mahse a dan zawmna zawng zawng khan Pathian ram luhna a pe lo tih a hrechiang a, a mangang ru a, chu chu Lal Isua pawhin a hria a ni. Pathian ram luh theih dan awm chhun a hrilh khan a lo hriatthiam dan zawng zawng nena inkalh tlat a nih avangin a tawpah phei chuan “Chûng thil chu engtin nge a awm theih ang?” tiin a ngaihna a hriatlohzia a sawi hial a ni.

Camping emaw crusade-naa chanchin tha hriaa Pathianin a pianthar tir te leh inhlan ve thova piantharna nei si lo te hi eng nge a awmzia kan tih chuan Pathianin a tihnun leh a tihnun loh an awm vang a ni a. Tum eng ang pawh an pianthar theih loh laia tum miah lo (Saula te ang) an pianthar theih si avang te hian piantharna hi “Isua Lal leh Chhandamtu-ah kan pawm e” ti-a tawngtai leh inhlan avanga piangthar emaw intiin vawi 10, 20, 30, 40 leh a aia tam pawh kan “piangthar” tlut tlut thin ni berin a lang.

Ephesi 2:1 ah chuan, “Nangni pawh in bawhchhiat leh in sualte avânga thi in nih lai khân a tinung che u a ni” tiin kan hmu a. Heta mihring nihna dik tak leh Pathian hnathawh hi kan pawm loh chuan piantharnaah hian kan chiang lo zel dawn niin a lang. Isua lo kal lehna te, kohhran inrelbawldan te leh a dang dang ah hian a tha ber leh dik berk an hre fuh lo a ni pawhin a pawi dan a nep a, mahse piantharna chauh hi Pathian ram luhna a ni avangin helaiah hian kan chian loh chuan chatuan atana nghawng nei a ni a. Kan chian a pawimawh hle a ni.

Pathian chauhvin a thlentir theih piantharna hi kawng hrang hrangin chan tumin kan bei thin a, kan hlawhchham fo thin. Vawi khat chauh a pianthar theih avangin vawi 40 piangthar inti te hi an piantharna hnuhnung ber pawh piantharna tak tak ni lo piantharna lem a ni ang tih a hlauhawm hle. An pianthar loh chuan Pathian ram an hmu dawn lova, chatuana hremnaah paih an ni dawn a ni.

Mihring hi Bible chuan suala thi kan ni a ti a, nunna nei lovin nunna a inpek theih loh avangin nunna nei tur chuan nunna pe theitu Pathianin nunna min pek a ngai a. Chu chu Pathian chauhvin a tih theih a ni.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

1 Comment
  1. Lalthlanmawia says

    Tha khawp mai. Hei hi mi zawng zawng hian hria ila,speaker an hah lo tur.
    Inhlan pianthar tihte khi a dik lutuk.
    Sual nihna inhriat loh emaw hriattira kan awm loh chuan uluk theihtawpa in hlan pawh piantharna a ni chuang lo.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy