Piastri leh Norris hlat duh lo Verstappen
Kuminah beisei angin season tir lamah chak nghal pur pur lo mah se Red Bull driver ropui Max Verstappen chuan driver standing-a a hmaa ding McLaren driver pahnih – hmahruaitu Oscar Piastri leh pahnihna Lando Norris hlat zawngin a khawsa zui zel duh ta lo a, Pathianni United States Grand Prix-ah hnehna chang lehin, season kal laia a vawi nga chakna a ni ta.
Dutchman Verstappen hian grand prix vawi nga leh sprint race vawi hnih la awmah point 40 chiahin hmahruaitu Australian Piastri a thlau tawh a; a chung chiaha awm Briton Norris nen phei chuan point 26 chiahin an inthlau tawh.
Max Verstappen hian Austin tlankawngah Inrinni khan sprint race hnehna chang bawkin, grand prix hnuhnung vawi liah tum thum zet a chak tling ta a, championship inumna kal mekah McLaren driver pahnih lakah ‘pressure’ a na zawk a siam kal mek.
Pathianni race-ah Norris chuan pahnihna luahin, a team-mate Piastri chuan lawmman semna dawhsan chuangkai zo loin pangana dinhmun a luah duai a; pathumnaah Ferrari driver Charles Leclerc thlengin, pahnihna chu Norris a ni a; Ferrari driver dang Lewis Hamilton chu palinaah a thleng thung.
Briton Norris hian driver standing-ah a team-mate leh a chunga awm chhun Piastri chu point 14 chauhin a thlau tawh a, title race-ah tunge dingchang dawn hriat theih a ni lo tulh tulh!
Inrinni sprint race-a chak tawh Verstappen hian Pathianni Circuit of The Americas-a intlansiak tak tak zawkah pawh pole position atanga tlanchhuakin, first corner, atang a hmahruaina chu nghet takin a vawng thei a, Texas tlankawngah hian chak ngun ber record siamin, vawi sarih a chak tling ta a ni.
World champion vawi li ni tawh Verstappen hi hnehna a chan zawhah media lamin title fight-ah a tel phak dan boruak an zawt a, “Tehreng e a,chance awm alawm. Kan tum zui zel dawn a, tun chawlhkar ang bawk hi nghahchhuah leh tumin kan theihtawp kan chhuah ang.
“A phurawmin, a tawp kan then hma zawng chu he inbeihna hi a tuiawm dawn a ni,” a ti.
Piastri leh Norris hlat duh lo Verstappen
