Planking chu kan sawi fo tawh a, core exercise hahthlak zet mai a ni a, taksa zawng zawng a tang na thin hle a ni. Ngil taka bawkin, an kiu-ah 90 degree-in ban tithlepin, chhuata kiu nghatin an innem kang a, ngil tak ke thluang marin, ke zungtangin chhuat a rap ve thung. Hetiang hian che lovin an awm thin a, ni nawlpui hi chu hetiang position hian minute khat pawh kan awm thei kher lo vang.
Tu te pawh nei ve diah tawh, Alberta, Canada a cheng, DonnaJean Wilde, kum 58, chuan darkar 4 leh minute 30 leh second 11 chhung planking tiin, hmeichhe zinga planking tirei thei record a siam. A hmaa hetiang record chu 2019-a Cnaadian tho Dana Glowacka siam niin, minute 10-in record hmasa a rawn khum.
DonnaJean hian record siamna hmun atana principal-a a lo thawh tawh thinna high school hmangin, a record siam lai hi Guinness World Records Official Adjudicator Tina Shi chuan a hmunah a endik. Guinness World Records guideline-ah chuan record siamnana pawm theih tur chuan planking an tih laiin an kiu leh kezungpui te chuan chhuat an tawk ngei ngei tur a ni.
Record a siam hnuah DonnaJean chuan record a siam hnuah, “Ka kiu han nat dan chu! Ka puitlin lo mai ang tih te ka ngaihtuah hman rum rum a ni,” a ti a, a hun hmasa lam darkar hnih chu a liam mai a, darkar hnih dang chu a sak ta talh mai ni a sawiin, “A darkar hnuhnung ber phei kha chu huphurhawm tak a ni tawh,” a ti a, a tawp lam minute 30 vel chu, “Thawk lak a, chiai loh leh khurh loh kha ka tum ber a ni tawh,” a ti bawk.
DonnaJean hi a tu 12 ten an lo fuih phur ve reng bawk a, a tute bakah school zirlai thenhnem takin an tawiawm. DonnaJean hian a kut leh ban na benvawn a buaipui thin a, a nat bakah a chawmawlh thin a, a pasal Randy chuan, “A na benvawn neih hian record siam pawh a tihtir thei zawk niin ka hria. Nitin na a tuar a, chu chuan chhelna a pe a ni ber ang,” a ti.
DonnaJean hian dan naranin nitin planking hi darkar thum vel a ti thin a, record siam tura a inbuatsaihnaah hian nitin darkar ruk a ti thin a, darkar hnih te te a thenin, vawi thum a ti thin.
Planking tirei thei record siam
