Daily Newspaper

Plastic bawlhhlawh

7

Tun hnaiah PHE Department hnuaia Water and Sanitation Support Organisation (WSSO) bultumin Aibawkah plastic bawlhhlawh sawngbawlna Plastic (Waste) Resource Management Centre hawn a ni a; hei hi Mizoramah chuan a hmasa ber a ni.

He PMRC-ah hian plastic bawlhhlawh tawnkhawmna khawl leh a her sawmna khawl a awm a. Tun dinhmunah Aibawk leh a chhehvel khua atanga plastic bawlhhlawh lakkhawm quintal 18 chu tawnkhawmna khawl hmanga tawnkhawm tawh niin hengte hi a thehthangna tur la ngaihtuah leh tur nia hriat a ni a. Hetiang plastic bawlhhlawh sawngbawlna ang hi district tina dah tum mek nia hriat a ni a, hei hi tihpuitlin ngei chi niin a lang.

Plastic bawlhhlawhin min tihbuai mek dan thlirin, sawrkar pawh hian thawkkhat han insenso ve deuh te pawh a inhuam a pawimawh hle awm e. A thawhkhatna atan khaw tinah hian VC hmalaknain plastic bawlhhlawh khawnkhawm hnatlang runpui hi neih ni se, chutah chuan sawrkar tan pawh insenso vak a tul lo ang a. A thawh hnihna atan, khaw tina Watsan ten hnatlang runpui neiin hma an la leh thei ang a. A thawh thumnaah erawh, lehkha chhia leh thirchhia ang deuh hian, a rate bithliaha leikhawm dan hi sawrkar hian ruahman leh ta se, chu chu mi tam takin inhlawhna remchangah an lo neih theih phah ang a, chu chuan plastic bawlhhlawh senghawi kawngah nasa takin awmzia a nei nghal bawk ang. Hetianga kum khat chhung hma lak theih a nih ngat chuan, plastic bawlhhlawh thenfai kawngah hmasawnna lian tak a thleng ngeiin a rinawm a ni.

Plastic leh polythene-in kan ram leilung a tihchhiat nasat tawh dan thlir hi chuan, ram leilung chhanhimna a nih dawn bakah, mihring hriselna tichhetu thenfaina pawh a lo ni pah ang a, chutiang atana insenso a tul a nih pawhin, ram leh mipui thatna turah chuan sawrkar pawhin insenso ve deuh a inhuam a pawimawh a ni.

Plastic leh polythene bawlhhlawh hi Mizoram pawhin buaipui tham fe a lo nei ta a. Aizawl Municipal Corporation pawhin August 1, 2019 atang khan plastic bag (polythene) microns 50 aia pan khapna thupek a lo chhuah tawh nghe nghe a nih kha. A tir lamah chuan khauh taka dan kenkawh a han ni ve bawk a, tunah hi chuan khapna dan kenkawhna thawm ri va hriattur a awm leh meuh ta lo niin a lang. Tuna PMRC kalpui mekah pawh hian, a hawnna thawm chauh hriat a, a hnu lama hmalakna thawm a reh mai loh nan, sawrkar hian awmze nei tura a bawhzui chhoh zel hi a pawimawh dawn niin a lang. Hmahruaitu an awm phawt chuan, mipui hian an hnung zui hi an harsat lo tih a lang a ni.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy