Marchi 15, Nilai zinga NBA regular season khelhah Eastern Conference hmahruaitu Milwaukee Bucks chuan Phoenix Suns an hneh a, conference play-off khel turin an tling. Buck hi NBA season kal mekah play-off khel tura tling hmasa ber an ni. Nilai zinga inkhel dangah LA Lakers in hnehna an chang ve bawk.
Eastern Conference hmahruaitu Bucks hian Suns lakah an khel tha tluang viau a, fisrt quarter, second quarter leh fourth quarter-ahte chungnung zawk an ni vek a. Third quarter-ah hnufual zawkah tang bawk mah se point belhkhawmah point 12 in chungnung zawkah an tang a. Point 116-104 in Suns an hneh. Suns laka an chak hi season kal mekah vawi 50 an chak tlinna chiah a ni a, play-off khel turin an tling zui ta a ni.
Suns an hneh tum hian hliam damkawr Giannis Antetokounmpo a che tha leh viau a, point 36 a thawhchhuah bakah ball sawhlet vawi 11 a dawng a, assist vawi riat a nei tling bawk.
Nilai zinga inkhelah Eastern conference hmahruaitu Milwaukee Bucks an chak a, play-off khel tura an tlin chian laiin Western conference hmahruaitu Denver Nuggets chu Toronto Raptors hneh lovin an tlawm ve thung. NBA season kal mekah vawi 46 chak tawh Nuggets hian Raptors lakah bul an tan chhiat leh a tawp an khar chhiat an tuar a, quarter laihawl pahnihah chungnung zawkah tang ve ve bawk mah se point 15 in tlawm zawkah an tang tho thung. Khelh li chhung tlawm zawn mah se Nuggets hian Western Conference-ah hma an hruai chhunzawm zel a, play-off khel phak turin an dinhmun a la tha viau tho.
Western Conference hmahruaitu Denver Nuggets an tlawm rual hian he conference-ah 10-naah awm mek Los Angeles Lakers chuan point 123 – 108 in New Orleans Pelicans an hneh ve thung.
Play-off khel tur Bucks
