Playboi Carti ‘MUSIC’ thawm a la ring ber

Playboi Carti ‘MUSIC’ thawm a la ring ber
Playboi Carti album ‘MUSIC’ chu Billboard 200 (albums) chart-ah a No.1 a, he chart-ah hian a zawnin kar hnih a No.1 tling ta. Hetihrual hian Selena Gomez leh a pasal hual Benny Blanco te album intawm ‘I Said I Love You First’ chu No.2-ah a debut bawk.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla a mala hralhna atanga album tlukpui te belhkhawm thin a ni.
Playboi Carti ‘MUSIC’ hi a kar hnihnaah 1,31,000 hralh lehin, chung zinga 1,24,000 chu streaming atanga album hralhna tlukpui (on-demand official stream maktaduai 171.02) niin, album tak tak hralh chu 7,000 a ni a, hla a mala hralhna chu chhiar tham a ni lo.
‘MUSIC’ album hi a deluxe edition, hla tar pali dah belhin an tlangzarh leh a, hei hi album hralh a tikal thar leh deuh a, a deluxe edition hi ‘MUSIC-Sorry 4 Da Wait’ tih a ni ve thung a, mahse, heng album pahnih hralhna te hi belhkhawm a ni.
Selena Gomez leh Benny Blanco te thawh dunna album ‘I Said I Love You First’ chu 1,20,000 hralhin No.2-ah a debut a, chung zinga 71,000 chu album tak tak hralhna niin, streaming atangin 48,000 (on-demand official stream maktaduai 64.04) niin, album-a hla mal hralhna atangin 1,000 a tling thei bawk.
Selena tan ‘I Said I Love You First’ hi a top 10 album pasarihna niin, Benny Blanco tan a pakhatna a ni ve thung. Selena leh Benny te hian nikum December khan an inhual thu an puang a, tun hi album an siam dun vawi khatna a ni nain, an vawi khat thawh dunna erawh a ni tawh lo a,, 2016-a Selena hla, Billboard Hot 100-a No.5 kai thei ‘Same Old Love’ bakah, 2016-a Selena la chart No.39 kai thei ‘Kill Em With Kindness’ leh 2023-a No.19 kai thei ‘Single Soon’ hlaah te khan Benny hi producer leh writer a ni. Artist angin 2019 khan Tainy leh J Balvin te nen an paliin ‘I Can’t Get Enough’-ah an thawkho tawh bawk.
Chart top 10-a lang album dang zawng chu chart No.1 lo ni tawh vek an ni a, No.3 atanga No.5 thleng chu kar kalta nen a danglam lo a, Kendrick Lamar ‘GNX’ chu 65,000 hralh lehin No.3 a ni a, PARTYNEXTDOOR & Drake ‘$ome $exy $ongs 4 U’ chu 61,000 hralh lehin No.4 a ni a, SZA ‘SOS’ chu 60,000 hralh lehin No.5 a ni bawk.
Sabrina Carpenter ‘Short n’ Sweet’ chu 54,000 hralh lehin No.6-ah bawk a la awm a, Lady Gaga ‘MAYHEM’ chu 52,000 hralh lehin No.2 atangin No.7-ah a tawlh a, ‘Bad Bunny ‘Debri Tirar Fotos’ chu 49,000 hralh lehin No.8 a la ni a, Tate McRae ‘So Close To What’ chu 47,000 hralh lehin No.7 atangin No.9-ah a tawlh a, Morgan Wallen ‘One Thing at a Time’ chu 45,000 hralh lehin No.10-ah bawk a la awm.