Pathianni zan Premier League inkhel pakhata si-thum ve ve khunga Man-chester City leh Tottenham Hotspur inhnehtawk tum khan referee thutluknaa lawm lo City player then-khatin na takin referee Simon Hooper an dem a, hnaihchilhin an ankhum a, Football Asso-ciation lamin an player-te thunun tha loah puhin Etihad club lakah thubuai an siamsak.
Thil thlen dan kha han tarlang leh ta ila, mikhual player Emerson Royal chuan halfway line bulah Erling Braut Haaland titlu mah se referee chuan ham loin khelh chhunzawm tur (play on) a ti a, Jack Grealish-a’n duhthala ball a kalpui theih rualin Hooper chuan foul a ham leh lawi si a, Haaland leh Mateo Kovacic-te chu thinrim lang-sar zingah telin, hun tawp lamah referee laka an lung-awilohna tawngkain an tilang chiam a, referee kha an hual tuau tuau bawk a, FA lam an inrawlh zui ta a ni.
Thawhtannia thuchhuah an siamah Football Association chuan Manchester City chu FA Rule E20.1 bawhchhiaah puhin, Pathianni Premier League fixture-a Tottenham Hotspur an mikhual tum hun pekbelh minute linaa an player-te khawsak dan thunun loah an puh a, match official laka City player-te nungchang mawi lo an tarchhuak.
City hi naktuk, Ningani thlengin an chunga puhna thubuaiah hian in-sawifiahna hun pek an ni a, FA pawmpui thama an insawifiah zawh loh chuan hremna an tawk ngei ang.
Tarlan tak angin, referee laka thinrim zual zingah striker Haaland a tel a, City player dangte ruala official chhuahchhalh mai duh tawk loin inkhelh banah kha thil thlen dan vel video clip kha Twitter thlaktu X-ah tarchhuak zui leh ngatin, comment a hnutchhiah pawh tawngkam tuitang lo leh midang nekna “Wtf” tih a ni a, mahse, FA lam hian mimalin Haaland hi an um zui ta lo a, thubuai siamsak tel a ni lo.
Pathiannia an kawtkaia point hnih an hloh then leh tak hnu khan City hi Premier League table-ah pathumna an ni ta a, point thumin hmahruaitu Arsenal an pha lo a, zanin hian Aston Villa an luhkhung zui leh ang.
Nizan result tarlan hman lohah Gunners hian mualneitu Luton Town laka point thum an thawkchhuak a nih phei chuan defending champion City nena an inkar hi a hla zual sauh dawn a ni.
Pathianni result kha a zawna City-in Premier League game bika draw vawithum an neihna ni tawhin, Spurs hma khan club lian dang pahnih Liverpool leh Chelsea an lo inhneh-tawkpui tawh bawk a ni.
Player-te vanga thubuai awrh City
![](https://theaizawlpost.org/wp-content/uploads/tap_logo-min-large.jpg)