Sawrkar laipui ruahmannaa kuthnathawktute sumfaia puihna turah Champhai district-a inziaklut tawh atangin zaa 60.65 chu dika pawm an ni tawh.
Champhai District Level Grievances Redressal and Monitoring Committee (DLGR&MC) under PM-KISAN chu an chairman, bawrhsap James Lalrinchhana hoin Nilaini khan an thukhawm a. Nikum September-a an thurel bawhzui dante sawi hoin, PM-KISAN Scheme hnuaia hamthatna dawng tur thlitfim leh enfiah tura ruat line department-te zirchianna pharh a ni. Beneficiary-te zirchian nawnna atanga thil hmuh, re-verification report chu pawmpuiin, a tul anga hma lak a nih theih nan State Level Committee-a thehluh nise, an ti.
Re-verification report-a tarlan danin, Champhai district-a block pahnih – Champhai leh Khawbung Block-a khaw 56 atangin PM-KISAN hnuaia inziaklut beneficiary 10975 an awm tawh a. Heng zingah hian PM-KISAN inkaihhruaina anga felfai taka inziaklut beneficiary 6656 awmin, diltu inziaklut atanga zaa 60.65 a tling. Diltu inziaklut zinga 4319 (39.35%) chu PM-KISAN inkaihhruainain a phut angte zawm loh avangin paih tura rawt a ni. Dilna hnawl tura rawt zingah hian, chhungkaw khat atanga mi pakhat aia tam inziaklut leh awm nawn 3187; mahni khua atang ni loa inziaklut 351; sawrkar hnathawk leh pensioner inziaklut 478; mitthi tawh 226; ram neilo 2 leh an chanchin chhuizui theih loh mi 75 an awm a ni.
Sawrkar laipui ruahmannaa kuthnathawktute tanpuina PM-KISAN hi kum 2019 atang khan Mizoramah kalpui a ni a. He scheme hnuaia inziaklut kuthnathawktu ram nei ngeite chu kumtin bank kaltlangin tanpuina Rs 6000 pek thin an ni.
PM-KISAN hnuaiah Champhaiah kuthnathawktu zaa 60.65 pawm
![](https://theaizawlpost.org/wp-content/uploads/tap_logo-min-large.jpg)