PM Modi hi Hindu a ni lo : Lalu Prasad

Rashtriya Janata Dal (RJD) chief Lalu Prasad chuan Patna a Gandhi Maidan a Jan Vishwas Maharally neihnaah Prime Minister Narendra Modi chu na taka kapin “PM hi Hindu a ni lo” a chhan chu a nu thih khan a lu met kawlh lovin a hmuihmul a ziat hek lo tiin a sawi.
Public meeting neih chu Janata Dal (United) Chief Minister Nitish Kumar kaihhruaiin RJD nena inzawmna chhuchata BJP te an zawm tak hnua Mahagathbandhan (grand alliance) tena rally an neih hmasak ber a ni a.
PM Modi hringtu nu Heeraben Modi chuan December 2022 khan kum 99 mi niin a fapa PM Modi chu a lo thihsan tawh a ni.
“Modi hi Hindu a ni lo. Hindu tin te chuan thlarau kaltate zah nan lu leh khabe hmul kan met kawlh thin. Eng vangin nge a nu thih khan a inmehkawlh ve loh? Chhanna siam rawh se” tiin Prasad chuan RJD worker te hmaah a sawi a.
He rally neihnaah hian mi nuai nga chuang pungkhawmin Opposition tena mega rally an neih leh hmasak ber a ni a. Khua a vawta chhum a zing chuai chungin supporter te an kalkiang chuang lo.
Congress, Communist Party of India (CPI), Communist Party of India (Marxist-Leninist) leh Communist Party of India (Marxist) te pawh rally neihnaah hian an tel a.
|henawm Jharkhand atangin RJD worker te pawh an kal bawk a, Jharkhand a RJD MLA neih chhun Champai Soren kaihhruai sorkar a tel mek Satyanand Bhokta pawh rally-ah hian a tel ve a ni.
Bihar Chief Minister hlui Prasad chuan Modi chu society a communal disharmony siamah a puh bawk a.
Nitish Kumar chu na taka sawiselin grand alliance phatsantu a ti a, RJD chief chuan, “Min phatsan hmasak khan, eng tin mah ka ti lo. Rawng thlak reng chi ka ti mai a. Mahse, a tum hnihnaah erawh tihsual kan nei a, ka tihsual a ni a, Tejashwi pawhin a tisual zui bawk. Tunah chuan Narendra Modi lamah a kal leh ta a. Nitish hian mipui ten nuihza siam nana reels an siamsak te hi zah nachang a hre lo emaw ni le,” tiin a sawi.
Lok Sabha inthlanna neih turah BJP te chu an thuneihna chhuhsak an ni ang tia sawiin mipui te hnenah Kumar chuan a tum thum nan min zawm leh a tum pawhin RJD chuan a nam chhuak tawh ang, a ti bawk.
Prasad chuan party workers te chu Extremely Backward Classes (EBC) te an chenna hmuna tlawhchhuaka an inah te chaw ei turin a ngen a. Tun hnai lawka Bihar a caste-based survey neihah EBC te chu tam berin 36% lawih an ni.
“Lungrualin BJP te kan nawrchhuak ang a. Delhi kan lak a ngai a, inthlanna atan inpuahchah tawh rawh u, kei pawhin theihtawp ka chhuah dawn” tiin Prasad chuan a sawi bawk.
Congress leader Rahul Gandhi leh party president Mallikarjun Kharge te pawhin Modi chu Constitution tichhiaah an puh bawk a. Samajwadi Party leader leh Uttar Pradesh CHief Minister hlui Akhilesh Yadav pawh rally neihnaah hian a tel bawk a.
“Kan ramah thil inthlak danglam a awm a piangin Bihar-a cyclone in bul tan a ni ziah a, a chhan chu Bihar hi centre of politics a ni. He ramah hian huatna, tharumthawhna leh hmangaihna leh inunauna ideology a insual mek a ni. Eng vangin nge he ramah hian huatna a awm? A chhan chu injustice vang a ni a. Prime Minister hi industrialist pahnih thum te tan chauh a thawk a ni” tiin Rahul Gandhi chuan a sawi.
Kharge pawhin Modi chu bei bawkin ‘dawt hotupa’ a ti a. Modi guarantee pawh ‘midang zawng phatsanna’ tiin a sawi bawk a. “Kan ram leh Constitution humhim turin BJP leh Modi hi paihchuhah an ngai. BJP te hian mipui te chu ED leh CBI te hmangin a vau reng a, mahse, dawihzepa bawkkhup ai chuan thih kan thlang zawk” tiin a sawi bawk.
Congress president chuan RJD chief chu hun lo la awm turah Nitish Kumar an zawm leh che u a tum pawhin lo pawm tawh suh u a ti bawk.
Akhilesh Yadav thung chuan slogan 120 harao (Seat 120 Bihar leh Uttar Pradesh a seat 40 leh 80 awmah BJP te hneh tur) tih a aupui thung.
CPI-(M) general secretary Sitaram Yechury, CPI general secretary D Raja leh CPI (ML) general secretary Dipankar Bhattachary te pawhin Modi chu sawiselin Bihar Deputy Chief Minister hlui Tejashwi Yadav chu thalai te hnena 3 lakh government jobs a siamsak avangin an fak thung.
Bihar-a Opposition leader Tejashwi Yadav pawhin thusawina a neihah RJD chu – Rights, Jobs and Development a ni tiin a sawi bawk a. Amah chu Bihar a leader hna 10 lakh siam sawi hmasa ber a nih thu sawiin a pa Lalu chu Central Railway Minister a lo nih tawhnaa a hlawhtlinna te sawiin a fak bawk.