Spanish La Liga hmahruaitu FC Barcelona chuan Pathianni zan khan an mikhual Sevilla chu 5-1 ngawtin an hneh a, table-a an hmahruaina sawh nghetin, point thmin an sang fal. Barcelona tan hian season kal meka chetha Robert Lewandoski chuan goal hnih a thun. Pathianni zana inkhel dangah Atletico Madrid in hnehna an chang ve bawk.
An hmahruaina tizau tura chak mamawh Barcelona hian an mualah bul an tan tha hle a, chawlhlawk hmain goal thum ngawt an thun hman. Barca tan hian inkhel tan atanga minute 24-naah Robert Lewondoski chuan penalty atangin hmahruaina goal a thun. Lewandoski goal thun hnu lawk minute 28-naah Pedri chuan an goal hnihna a thun belh zui leh nghal zat bawk.
Si hnih faia hma an hruai hnuin goal hmahruai thuntu Lewandoski chuan chawlhlawk dawn hnaih minute 39-naah an goal thumna a thun zui leh a, a hmahruaina a tizau. Sevilla lakah Barcelona tana goal hnih thun Robert Lewandoski hian season thara inelna hrang hrangah Barca tan vawi 11 khelin, goal 14 zet a thun tawh a, a chetha tluang hle.
An mualah si thum faia hmahruai tawh Barcelina hi chawlhlawk hnu lamah pawh an khel tha chhunzawm a, goal hnih an thun belh leh. Second half-ah goal a luh theih loh reng hnuin Pablo Torre chuan minute 82-naah Catalan club lian tan an goal lina a thun a, an hmahruaina a tizau.
Si li ngawt an phurh hnuin Sevilla tan Stanis Idumbo chuan minute 87-naah goal thunin an si phurh a sut then. An si phurh an sut then vangin phur viau mah se Sevilla an phur rei lo. An goal thun an lawmna au ri a reh fel hmain Barcelona tan Pablo Torres chuan an goal ngana a thun zui leh a, an chakna a nemnghet zui ta a ni.
Catalan club lian FC Barcelona hi manager thar Hansi Flick hnuaiah an khel tha rih viau a, La Liga-ah vawi 10 khel tawhin vawi kua an chak a, tlawm zawkah vawi khat an tang tawh. Barca hian khelh 10 atangin point 27 an hmu a, an hnuai chiaha awm Real Madrid aiin point thumin an sang zawk mek a ni.
Pathianni zana inkhel dangah club lian Atletico Madrid chuan an mikhual Leganés chu 3-1 in an hneh a, pathumnaah an inhlangkai.
An mualah si phurh hmasa zawka tang Atletico Madrid tan hian Alexander Sørloth chuan goal hnih a thun a. Antoine Griezmann chuan goal khat a thun ve bawk. Atletico hian khel 10 atangin point 20 an hmu.
Point 3 in Barca an sang fal
