Site icon The Aizawl Post

Poland-in Ukraine fighter jet pe dawn

Poland chuan Soviet hun laia siam Mig fighter jet pali chu Ukraine hnenah a thawn lut dawn a, tihian Nato ram nikuma Russia-in Ukraine a run atanga indo thlawhna pe hmasa ber a ni dawn a ni.
Polish President Andrzej Duda chuan ni rei lo te hnuah thlawhna chu an thawn luh tur thu a sawi a. Ukraine tan chuan air defence lamah puitu tur pawimawh a nih rualin indonaah erawh danglamna siam thei tura ngaih a ni lo thung a.
Ukraine parliament deputy speaker Olena Kndratyuk chuan ram dang te pawhin Poland chu entawna hma an lak zui a beisei thu a sawi.
Nato ram dangte pawhin Ukraine hnenah hian Soviet hun laia siam indo thlawhna te pek an ngaihtuah ve tho a, heng thlawhna te hi Ukrainian pilots tena an khalh thiam te an ni.
Ukraine chuan a hma pawhin Khawthlang ram te chu modern fighter jet heng F-16 te ang te pe turin a lo ngen tawh a. UK chuan Ukrainian pilot te chu Nato-standard aircraft khalh thei turin training a pe mek bawk a. Pilot te hian heng indo thlawhna te khalh thiam tur hian hun an mamawh tlat avangin Western jets te Ukraine hnena pek luh nghal ringawt chuan awmzia a nei lo tia sawi a ni bawk.
US President Biden erawhin US chuan Ukraine hnenah indo thlawhna a pek loh tur thu a sawi chiang thung a. Russia-in Ukraine a run tirh khan Ukraine chuan indo thlawhna hmantlak 120 vel a nei anga ngaih niin chung zinga a tam ber te chu hlui lam tawh Mig-29 leh Su-27 te an ni hlawm.
Poland president Duda chuan Soviet-era Mig 29 aircraft chu hmantlak tak an la kawl nual thu a sawi a. Ukrainian MP Kira Rudik chuan, “Kan air defence system tihchak nan kan mamawh a, kan sipai ten counter-offensive an kalpuinaah kan mamawh bawk,” tiin a sawi.
“Mi tinte tan Ukraine hnena fighter jet pek hi thil theih loh a ni lo tih lantirin a awm a, awih a harsa hle zawk a ni. Thil thleng thei a nia, thlentir zel turin political will a ngai thung,” tiin a sawi.
Yuri Sak, Ukrainian defence minister adviser chuan Polish jets te chu ‘kan air force ten tangkai takin an hmang ang’ tiin a sawi a. Darkar 24 chhungin Ukrainian air force te chuan air strike tum 16 an kalpui thu sawiin Russian personnel leh bungrua te an bei tiin a sawi a. Mahse, Ukraie-in a mamawh chu ‘fourth generation’ jets heng F-16 te ang te hi a ni tiin a sawi.
“Kawng tam taka hman theih an ni a, theihna an nei sang zawk bawk a, Ukrainian air force te tha zawka che thei tura siam thei an ni,” tiin a sawi.
Poland hi Ukraine thiantha niin military equipment petu lian ber a ni a. Poland hian Soviet hun laia indo thlawhnate chu American leh Korean model ten a thlak mek a ni.

Exit mobile version