Poland leh Latvia huamtir duh lo

Russian President Vladimir Putin chuan interview a neihnaah Russia chuan a interest humhim nan a tawp thlengin a bei dawn tia sawiin mahse Ukraine indona chu zauzawka kalpuia Poland leh Latvia te thlenga huamtir an duh loh thu a sawi.
Kum hnih dawn kaltaa Ukraine run hnua Putin an American journalist laka interview a neih hmasak berah Putin chuan Western leder te chuan tunah chuan Russia chu hneh ngaihna a awm lo tih hrefiah tawhin chetlak dan tur an ngaihtuah mek a ti a. “Inbiakna neih kan inpeih” tiin a sawi.
Putin chuan US journalist Wall Street Journal tana thawka Evan Gershkovich spy tia puha Russia in kum khat dawn lung in a tantir tawh chu chhuah zalen theih a ni a ti bawk a.
Putin chuan conservative talk-show host Tucker Carlson nen hian darkar hnih lai Moscow ah inkawmna an nei a, an inkawmna hi tuckercarlson.com ah tihchhuah zui a ni.
Carlson an Russia chuan a sipai te NATO member Poland run turin a tirluh ang em tia zawhna chu Putin chuan, “Thil pakhat Poland in Russia a beih chauhin a thleng ang. Eng vangin? A chhan chu Poland emaw Latvia ah emaw hmun dang emaw duh kan nei lo. Eng vangin nge kan run ang? Engmah duh kan nei lo” tiin a chhang a ni.
Putin hian zawhna te Russia tawnga chhangin chu chu lehlin leh a ni a. Inkawmna an neihah Russia leh Ukraine inlaichinna leh Poland leh ram dang te nena inlaichinna an neih te chu sei takin a sawi a ni.
Putin chuan interview a neihnaah hian Ukraine chuan April 2022 khan Istanbul-a inbiakna neihah inremna an siam hman lek lek thu sawiin mahse a inhnukdawk leh a ni a ti bawk a.
“Boruak siamtha leh turin inngaihtuahna hun kan pe a ni. Kan hua a ni lo va. Ukraine a ramchhung buaina kal mek hian an duh emaw duh lo emaw inremna siam an la duh dawn tho” tiin a sawi bawk.
Russian leader chuan US chuan a ram chhung thil chingfel turin ngaihtuah tur a nei a ti a. “US hian Russia nena remna siam atan a tha zawk tih a hria ang. Inremna ruahman se la, Russia chuan a interest humhim turin a tawp thlengin a bei dawn” tiin Putin chuan a sawi bawk.
Washington chuan Ukraine hnenah Russia in February 2022 a a run hnuah tanpuina $110 billion chuan ag a pe tawh a, US chuan Putin nena inremna neih a duh loh thu a sawi chiang thung.
Putin hi tun interview hmaa US media outlet tena an interview hnuhnun ber chu October 2021 khan niin CNBC journalist Hadley Gamble chuan a interview a ni.
Carlson interview lai vel hian US lawmaker te chuan Ukraine indonaah sum tam zawk pek tur zel a ni em tiin an sawsiho mek thung a. Chutihlai chuan Ukrainian President Volodymyr Zelenskyi chuan a army chief chu a ban thung.
US senate in tanpui zui zel a remti a nih chuan Ukraine hnenah $61 billion chuang pek a ni dawn a, mahse, Republican thnun House of Representatives chuan Ukraine hnena tanpuina pek zui zel an duh lo thung.
Putin chuan Russian leh American special services te chuan Gershkovich case an sawiho mek zel thu leh hmasawnna a awm thu a sawi a.
Putin chuan Gershkovich chhuah zalen a nih chuan Moscow chuan Germany chu berlin a Chechen dissident tihlumtu Vadi Krasikov chu chhuah zalen tir a phut nia sawi a ni ve thung.
Russia leh United States te hian lung in tang langsar inthleng tawnna an kalpui fo tawh thin a. Tun hnaia langsar tak chu December 2022 khan Moscow chuan US basketball star Russia a drugs kawla puha tantir Brittney Griner chhuah zalenin US chuan RUssian arms trafficker Viktor Bout a chhuah zalen ve thung.
Carlson hi November a US Presidential election a Republican party aiawh tura ngaih Donald Trump nena inhnimhnai taka sawi a ni.
Ukraine indona chhuah hnuah Putin chuan media mite a hmachhawn mai mai duh lo va, a bik takin US media lam te phei chu a hnar fithla hmak thin a. Tun hi interview a hmachhawn leh hmasak ber a ni.