Thenzawla Police Training School (PTS) a police constable training batch 70-na chu Inrinni khan an hun hman tur ang hman zoin an chhuak a. An puala ‘passing out parade’ neih chu chief minister Lalduhoma leh Home minister K Sapdanga ten an hmanpui.
Chief minister chuan, sawrkar hna chu ‘equality for all principle’ changchawiin dik tak zelin lak a ni a. Thalaite pawhin sawrkarah rinna an nei thar zel a. Tuna police lak thar 275 pawh hi duhsak bikna emaw sawipuitu minister leh politician tel loa, intihsiakna fair tak kaltlanga tling an ni a, an chhuanawm tih a sawi.
Hnathawktu qualify-ten kan ram tan quality service an pek an ring tih sawiin, “Nangni pawh hi chutianga hna rawn thawk tur chuan kan beisei zui dawn che u. Sawrkar hian service tha kan duh avangin qualify lo chu huai takin kan hnawl a. Hnathawktu lak tharah chauh hei hi kan kalpui loa, tuna a thawk mekte zingah pawh chhawr tlak loh dapchhuah hna kan kalpui a, special pension scheme-in chhuak ngei se kan duh,” a ti.
Khawvel ram tin zirchianin, police tha nei ramah khawtlang nun a ralmuang thin tih chief minister hian a sawi a. Police nungchang tha leh service tha chuan ram leh hnam hmel an timawi a, mipui an thlamuan a, sawrkarah lungawina an pe tih a sawi. Tun amite pawh a tling leh tlak thlankhawm an nih angin, mipui thlamuan a, khawtlang nun leh ram leh hnam tihmawi hna an thawk turah an ngai tih a sawi a ni.
PTS-ah hapta 45 chhung an hnathawhna lama an mamawh thiamna chi hrang hrang an zir hnu ah, hna thawk tura chher hriam, inpeih at an ni ta tih sawiin, “Inringtawk taka hna thawk turin theihna in nei tawh a. Police hna in thawhna kawngah, dan bawhchhetute in chhuina kawngah, misual in chhui chhuahten hremna an hmuhna tura hma in lakna kawngah, dan kenkawhna kawngah tu mitmei mah veng suh u. Dik takin thawk ula, dan hi lal ber rawh se,” Lalduhoma hian a ti.
Mizoramah zu vanga service laia thi police kan tam thin hle a, chu chu a tur ve renga ngaih a ni tawh emaw tih tur a ni tih a sawi. Police-te chu taksa hrisel tak nei tura beisei an ni a, service-a lut tur pawhin physical fitness exam a a tel, tiin, a taka hna an thawh hunah pawh physical fitness chu chhawm zel tur a ni tih a sawi. Police tihhmasawn hna an kalpui zui zel dawn a, sualna lo chhuak thar zel hmachhawn thei tur leh misualte hmakhalha kal zat zat thei tura thuam chak an duh tih a sawi bawk.
Mizoram DGP Pu Sharad Agarwal pawhin training chhuakte a taka hna an thawh huna an hriat tur hrang hrang a sawi a ni.
Police constable training chhuakte hi mipa 249 leh hmeichhia 26, an vaiin mi 275 an ni a. Trainee-te hi Armed branch atangin mi 198, unarmed branch atangin mi 51, Mechanical branch atangin mi 8 leh compassionate grounds-in mi 18 an ni. Training neih chhunga ti tha bik thlanchhuahte hnenah lawmman hlan an ni.
Police constable 275-in zir tur inzir zo Hnathawk tlak lo chawl turin kan duh – Chief minister
