Police fitness & discipline

Home minister Pu K. Sapdanga chuan sawrkar kumthar atangin police 200 lak leh tum a nih thu sawiin, “A hmaa police kan lak dan ang bawk khan dik takin kan la leh dawn..” a ti. Kum 2025 khan police fitness uar kum an lo hmang tawh a, kumin 2026 chu discipline uar kumah an puang, tih a sawi bawk.
Police hna thawk tura pawimawh hmasa ber pahnih chu fitness leh discipline a ni. Mahse, Mizoramah chuan fit teng tawng tura ngaih kan police-te hi kum 2021 atang khan kum tin 100 vel an thi ta zel mai niin home minister thusawi atangin a hriat theih a. Kum tin mi 150 vel an lo pension thin bawk nen, police hmun ruak a zau ta hle a, tun dinhmunah post ruak 4,666 a awm mek a, chuti chung chuan tunhnaiah post 200 bak hnawhkhah theih a ni dawn lo tihna a ni.
A nihna takah chuan, “fitness uar kum” puan hranpa ngai lova englai pawha fit reng tura ngaih an nih laiin, police tan ‘fitness uar kum” puan a ngai ta tlat mai hian, tunhma atang tawha kan police-te inkaihhruaina a lo awngrawp thinzia a lantir a tih theih awm e. Chutiang bawkin, ‘discipline uar kum’ han tih leh hluai pawh hi, thil tul lo tura ngaih a nih laiin, a tul miau si a, chu chuan thupui bera discipline neitu police-te inrelbawl dan a lo loose thin hle a ni ang tih a rin theih bawk awm e.
Tichuan, police lak dan pawh a lo dik lo thin tih a hriat hle bawk a, ‘a hma angin dik takin kan la leh dawn’ tih a ngai tlat a ni. Police lak dan a dik loh chuan fitness te, discipline te pawh chu a dik dawn lo tihna a ni nghal awm e.
Fit loh avanga police-ten an hnathawh tur ang an thawk tha thei lo mai pawh ni lo, fit lohna thihpui khawpa ngaih theiha kan police-te an lo awm thin kha a pawi em em ringawt mai a ni. Chu chuan, a kaihhnawih mawhphurtuten ram leh hnam hmangaihna rilru an put lohzia a lantir chiang hle. Ram leh hnam venghim tura ngaih berte ‘fit lo sa’ tih hriat ngawih ngawih police hna thawk tura kan la duh zel a nih chuan, ram venghimtu tur ten an hna an tlin dawn lo tihna a ni a, mipui tan chuan beidawnthlak tak a ni.
Fitness leh discipline hi police tih thumal nena inbelhbawm tlat a ni a, uar hranpa lehchuan tur a awm awm lo e. Mahse heng thil pahnih ‘uar’ ngai ta anga kan lo awm hi a pawi a, han uar leh poh ila, mahse a hnuah chuan uar ngai lovin, englai pawha police nena thenhran theih loh a nihna hi vawn nun zui atan a tha ngawt ang.