Mizoram Police-te taksa fit an neih theih nan Thawhtanni khan a huhoin ‘Fitness Parade’ an nei a. Aizawla hmanpuitu Home minister K Sapdanga chuan mipui rin ngam police ni theuh turin a chah.1st Battalion MAP Playground Armed Venga hun hmanah PT master kaihhruaiin Physical Training Exercise neih a ni a. Senior police officer-te leh an hnuaia police rank hrang hrang, an vaiin mi 500 vel an tel.
UT kan neih atanga hun rei tak chhung chu Mizoram Police hi India ram police zinga rin kai langsar kan ni phak thin a. Tunah mipuiin police-te min thlamuanpui dan a tlahniam ta deuhin a ngaih theih tiin Home minister hian a sawi a. Mipui rinngam ni turin, a bul tanna atan taksa sawizawi leh hrilselna lam hawi hmalakna ‘Fitness Parade’ hi ram pumah a ruala neih nise, tiin, an rel tih a sawi a ni.
Kumin January 1 atanga August 3 inkar khan Mizoram Police 77-in an thihsan a. An sun tam zawk chu kum 50 hnuailam an ni a, an insun chhan tam tak chu ruihtheih thil leh a kaihhnawih natna vang a ni tih K Sapdanga hian a sawi.
“Nunna hi Pathian kuta awm a ni, a dik. Mah se, Pathianin rilru duhthlan theihna min pe a, chu chu kan hman thiam loh vangin kan nat phah a, a hun loah kan thih phah thin. Police kan ni a, dan kengkawh tur, mipui venghim tur kan ni. India ram state thenkhatah chuan, ruihtheih laka insum thei lo chu police hna thawk tlak loah an ngai a, an inchawlh tir mek. Police rintlak nei turin khauh zawka kan kal ve pawh a ngai ta niin a lang. Chu chu ram tan leh mimal tan pawh a tha a ni,” a ti.
Arm branch lam bik tan, Batallion tinin parade leh physical training neih chhunzawm tum turin Home minister hian a chah a. An invil zui dawn tih a sawi. Arm drill leh firing lam uar thar tura chahin, “Sipai chuan silai a kap ngam tur a ni a, a kap thiam bawk tur a ni. International boundary-in min kar cheh a, inter state boundary pawh ven uluk a ngai sawt hle. Arm batallion 8 kan nei a, kan arm staff zawng zawng hi commando standard nei vek turin siam kan tum ang,” a ti.
DGP Mizoram Anil Shukla pawhin tunhnai kum 5 kalta chhungin chawhrualin kumtin police 126-in chhan hrang hrang avangin nunna an chan tih a sawi a. Thihna tam zawk thlentu laka fihlim thei tura tan lak a ngai tih a sawi. “Nitin minute 45 zel taksa insawizawi nana kan hman phawt chuan taksa leh rilru hrisel kan nei thei dawn a, duty pawh tha takin kan hlen chhuak thei dawn a ni,” tiin, he programme hmang hian Mizoram Police hrisel, chak leh rintlak siam theih a beisei tih a sawi a ni.
Home minister sawi dang:
* Fitness tih that nan Police Sports lam buatsaih tam tum a ni a, a tam thei ang ber an tel theih dan tur pawh ngaihtuah nise.
* Mizoram Police-in Women Police a mamawh belh a; unarmed unit-ah chauh ni lo, armed unit lamah Mizo nula, ralthuam famkima inthuam hmel hmuh an duh, tiin, Mizo nulate pen chhuak turin a sawm.
* Khaw tam tak atangin Out Post emaw Beat Post emaw din tura ngenna sawrkarin a dawng nasa a. Sum dinhmun a la pan tih a, sawrkar sum dinhmun a ziaawm thuai beiseiin, mipui mamawh an chhan theih hun a la awm ngei a ring tih a sawi.
* Hmasawnnain a ken tel misualte thiamna (criminal intelligence) a sang ve zel a, hnu chhuina atan cyber investigation system hman uar a ngai sawt hle. Cyber crime unit tih len a, branch tam zawk din dan ngaihtuah a la ngai dawn.
* A tam thei ang training neih hi armed unit leh unarmed unit-ah pawh a tul. Investigation that tawk loh vanga thil sual tituten thiam an chan hian mipuiin police min rinna a tlahniam thei. Judiciary lamah hma kan sawn chak em em a, RTI-in min hual mup a, chuvangin supervising officer-ten case investigating officer-te hnai taka vil reng a pawimawh hle
* Ram pawn atanga ruihhlo lo lut heti taka a veivak nasa hi a chhan chhui chian a ngai. Intelligence failure vang nge, engemawzat hi chuan police station, out post leh check gate an paltlang thin niin a lang si. Thawktu indaih loh vang nge? A kengtute kan finkhalh zo lo nge? Sipai duty-te zingah rinawmna hloh kan awm nge? Beihpui thlaka chhui chhuah ngei tur a ni ang.