Daily Newspaper

POLICE LEH DRIVER

16

-Zoremi Hmar Zote

Hri lêng kârah boruak dang, chanchin dangin min han chiah hlak a. Tu te mai pawhin kan theih ang tawk tawkin, kan theihna mual mualah mahni ngaihdan kan sawi a. Leh lam tan pâwl leh leh lam tan pawl kan inhnial luih luih… A! inhnial pawh kan ni chiah lo, dem rawn deuh chu kan nei a nih kha! Thlavang hauhsaktu nei mang lo, kan ram leh keini Mizo tana a chhûn a zâna hah taka hna thawk thin ten, eng emaw an han tihsual palh ve zauh a, ‘sual em em’ nih an hlawh tlat si te khan, ka hnuk an tiulh a, ka lainat a ni, ka zêp lo! An han sawifiah ve dawn dêk dêk a, kan lo êu hluah hluah bawk si!

Chutih rualin Truck driver pawh kha, a dinhmun kha ka ngaihtuah lo bik hauh lo. Chuvang tak chuan tihian, ka theihna mual awmchhunah hian ka ngaihdan ka’n sawi ve dawn a nih hi. Ka frank tih chu in hriat vek tho kha!

Police leh Traffic police-te hi:
Mipui lamah dân hre mi kan pung hluai a, kan phâk tawk leh thiam ang tawka tawngkam nâ-in kan Police-te leh Traffic police-te kan vawm sup sup a. Mi sawi zâra kan hriat chawpchilh dân châwi vàwng ve ta hluai pawh kan tam. Zawh chhunzawm dawna dân lam aia thu dang sawi tur dap leh ruai si pawh ka hria! Tin, na tak taka tawng, police leh traffic police hmusit zeta dak phàr phár zingah khan, petrol sawmnga man thun te, parking fee nei, lirthei dah phal lohnaa dah an man, pawisa chawi tur nei lo pawh ka hre tho! An hming ka dah na’ng a! An ngaihdam cheu kha aw… Eng vangin nge social media a nih tak vanga, hre ber, dan zawh dik ber leh a nei ber fa ang maia kan râk phàwr pháwr thin ni! Mangan ni-ah tunge kan pùr chuan ang a, tuin nge min tanpui chuang ang ni?!

Thu dêngkhawng tak, na tak leh thap hraih maiin kan comment zuap zuap a, chaldelh leh tham lo fá-in, mi rilru kan hliam a. Chu mai chu ni lovin a lo chhiar vetu, keini ang chauha mâwl ve tho khan dik emaw lo tiin a lo thlâwp ve zat a. ‘Nuthlawi bame-na group’ tih velah kan va inlàr hmel chhiatsan leh daih a, kan va nui leh duaih duaih a. Kan ram hi e, kan vei tak tak lo! Tu emaw ka tina a ni tih hre miah lova tu emaw post-a kan va dak leh záwrh zâwrh lai khan, keini aia ram tana chhenfâkawm zawk leh, a hun zawng zawng nang leh keia tana hmang thintu chu rilru na takin a awm asin, zak ang u! ‘Hlawh an nei alawm’ ti fahran ziah bawk suh ang u, Zu mai mai pawh hlawh nei lovin an zuar peih hleinem; ram leh hnam tana thawk te chuan hlawh teuh zawk se la…an phú ber alawm!

A nihna takah chuan kan traffic police-te bik phei hi chu, kan chunga an lo that tawhna pakhat tal sawi tur hre miah lo kan awm lovang tih hi ka chiang a ni; kei reng min ngaidam zing mai! Chuti chung chuan âr chuk tui lovin, an thu neihna leh an lalna hmanga hlei lèn a, sual tak mai anga kan han chhuah phiarh phiarh mai kha chu(h), dàn bawhchhiat vanga an man fo, hriatthiam dila ngên ngâwl taka pangchang ngam, ti tawh lo tura tha taka an hrilh a, an ngaihdam mai thin mihring kei ang tan chuan, lainat loh har ve tak chu an ni.

Kan vannei hlauh a, kan ram, kan state bik hi, ram ralmuang niin, kan kristianna hian eng emaw chen chu min hum bawk niin a lang a. Kan police ten an hna tha taka an thawh vàng a ni bawk tih hi nghilh lul suh ang u. Eng thu vang pawha tualchhunga buaina chhuak palh thilah te, an thuam famkim nena mipui nena han innèk ràp ráp a tul châng te a awm ve leh zauh thin a. Chutah chiah chuan asin, mipui zawk hian dan chu bawhchhe nasa thin ni!

Dân kan ngaisang hiam hiam bawk ahh…dân ang takin engkim tih ni tawh teh tak se, tunge tuar chu kan hria ang chu. Ngaihdam ngai, hriatthhiam ngai zawk nitin chu mipuite hi kan ni asin. Keini aiin dân an hre fé a, min ngaihhnathiamna an ngah mai mai alawm. Mizo tlawmngaihna an thisena bet tlat vang zawk chauh a, dânin a phût kher ni lo, mipuite tan thil tha an tih hnemzia te, min hahpui thinzia te hi, engati nge kan hriatsak duh loh thin ni! Mihring vek kan ni, tisual palh thei lo tumah kan awm lo asin.

Kan police-te leh traffic police zahawm tak tak te, ram leh hnam tana in hna thawh hi hlû ka ti. Zuai mai lovin tang fan fan ula, tuna thil thleng hian in police nihna leh, traffic police nihna ni lovin, in Mizona thinlung zawk kha nghawk harh lul rawh se.

Truck driver/Taxi driver leh driver dang hrim hrim pawh:
“A sam kha lo nawr kawlh ta se an kuk mai ang em?” tih te, Bawngkawn traffic point-in hming hrang hrang a’n nei nghal te kha, boruak rit tak kâra rilru pik chup mai tithâwl atan a tha viau na a, nuih har ka ti viau. Palzam mai chi a ni lovin ka hria. Kha thil thleng chungchang ziahna kan comment dan leh, Mizo leh Mizo kâra thil thlengah, kan hnam ze inthlâk nasatzia lanna, kan rilru puthmang, kan sawi duh zawng leh kan nihna chhe lai ber a lanna a tih theih hial àwm e.

Kha driver, chaw pawh ei lova zan khaw tairêka hah taka hna thawk kha, a lova kan awm theih miah loh buhfai Champhaia han dah, rawn haw leh kha a ni a. A sawi kha a dik a nih a, whistle ham rîk a hre lo tak tak a nih chuan leh, zah lo taka a chhâng zawt zawt lo a nih tak zet chuan ni e, kut tawrh kher kha a ba hauh lo. Patling thankin zet, tu emaw pa, tu emaw fapa duat, tu emaw pasal niin, hmangaih em emtu a nei ve ang a, in lama nghakhlel taka lo nghaktu pawh a nei ve ngei ang.

A fate tan phei chuan khawvela pa ropui ber leh thil tithei ber, mi pa zawng zawng aia huai pawh a ni ang! Chutiang khawpa a hmangaihte tan a hlut lai a, patling leh patling lo inhnek chawrh chawrrh mai te, a, a hneka inhnek kha chu a la zia, a keha han keh vir nawk nawk phei kha chu a tlâwmthlâk ve dawn hian ka hria a, ka lainat ngawt mai. A nupui fanau ten an hmu ve ngei awm si a, an va na dawn êm!

A chhungkaw châwmna atana a hah thin turzia te ka ngaihtuah a, mahni khum luma a hmangaih em em pangtilum chhim chunga muthilh siai siai a, ama in ngeia tlai khua vàr ve pawh a thlahlel thin hian ka ring a ni. Chutiang bawkin, Taxi driver pawh, traffic police-te tham loh leh tlema hmuhhniam an nih bik thin thu hriat tur a awm zeuh zeuh a, a lo dik palh hlauh a nih chuan kan traffic police chhuanawm tak tak te hian inenfiah kan mamawh ve tho niin a lang e. An ni pawh hi an in chhungah chuan pa ber, nupui fanaute innghahna, thlamuang taka a zâra ni chhun chhiar thin nunau nei ve bawk an ni a, zah hi an phû ve ngawih ngawih a ni. Mipui rawngbawltu, kan mamawh em em an ni si a.

Kan police-te leh traffic police zinga thin ram zual, rîk phat nei tlêm te vang a an vaia dem leh elhsèn an ni thin hi chu pawi ka ti. (Traffic police thin ram leh sual hi ka la tawng ve miah lo!) Inzah tawn hi kan zir a ngai nasa a ni. Mipui rawngbawltu, mipui vanga an hna hi awm leh thawk thei an nihna hi vawng hrám hrâm thei se tih hi, kan duhthusam a ni hlawm bawkin ka ring. Han en dun mai pawha an mahni aia upa tih hriat reng reng, mi zînga vin tuarh tuarh mai te, khawlaia hauh bawrh bawrh mai te hi a Zo zia lo hle a, Mizo tlangval, Mizo pa tih atan chuan a mawi lo hlâwm tawp!

In lo chîk ve emaw ka hre lo va. Facebook, WhatsApp leh youtube lamah hian, tute mai pawh hi kan sual! In awih em? Facebook kan hmelhriat tirh deuh ti ila, mipui nawlpuiin kan hman tirh deuh, kum 2013 vela mi status kan comment dan te, mi thil post, thlalak leh thil dang pawh ni se, kan vai khan kan infak tawn a, mi lawm loh zawng sawi kan la hlau deuh vek. Kan hnam ze mawi zinga mawi zual em em mai, aia upa zahna te kan la lantir thlap a, tumah kha tawngkam mawi lovin kan la tawng báwih bâwih lo.

Vawiinah erawh a dang ta. Kan milâr te, model emaw, ziakmi leh zâi thiam pawh ni se, mi hriat hlawh deuh chin tawh hrim hrim nih te hi a va’n hrehawm thin dawn tak êm aw ka ti a ni. Vanlalsailova te hi aw, amah nih hi a hrehawm hin ka ring a ni. Hmuhsitna, diriamna leh nat vawng vawngna tur tawngkam a va dawng nasa thin tehlul! Midang thatna lai kan inhmuhsak tlat thin lai kha a ngâi ve vawng vawng thin hian ka ring. Ani chauh a ni lo, kan milâr dangte pawh hi an ni vek, nat vawng vawngna tur te, zah tlawk tlawkna tur te hi an hmuh tur hian kan ziak nasa thin si a, ka lo lainat thin. Miin min tih dan tura kan duh ang hian awm teh ang u…khawngaihin!

Khawngaih takin Mizo mipui, ka hmangaih em emte u, kan hnam zia-a a tha lai (kan morality) tidal thei zawng leh, mahni unau, mahni thisen ngei na taka siam hi sim daih ila, helai ram zim tê-a unau tlêm tê khawsa ve nawk nawk hi, inhmangaih tlâng hram hram teh ang u. Kan inhmangaih tlân a, a chhe lai kan inthup mawisak zel chuan hnam dang lakah kan zahawm ang a, kan Pathian duh dan zawk pawh a ni ngei dawn e; tichuan ram rethei té mah ni ila, Mizo mipui hi ui hùm zât lek pawh la ni ila, kan nitin nun tal a nuam dawn alawm! Mi tinin, eng hna thawk pawhin, inzah tawn hi zir thar leh ang u aw. Ka va âng na ve, min hrethiam hrám mai teh u!

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy