Daily Newspaper

POLICE LEH THARUM

39

R.Lalfakawma Seling

Thu leh hla thiam thangtharte chuan kan Mizo thu leh hlate hi Sap tehna hmangin an teh a, an teh fuh hlei thei lo. Hei vâng hian kan thu leh hla tha, rinna mita thlir chunga kan kurpui ber berte pawh an hnualsuat lek lek fo mai. Mizo thinlunga a tlâk dan kha tehna fung pawimawh bera hman tur ni awm tak kha Sap tehna hmangin an teh a, Sap thinlung kan pu leh si lo va, a zir sâng leh thiam apiang an inhnial nasa emaw tih tur a nih hi.

Tun hma deuha kan nula ten M&B (Mills & Boon) chhiar an uar lai pawh khan Mizo tlangvâl an hnualsuat mai ang tih ka lo hlau thin a. A changtupate kha hausa, thiltithei, zei êm êm bawk si; a hun leh hmun dika hmangaihna thu pawh lungchim taka sawi chat chat thiam an ni thin. Chutih laiin an inlêng Mizo tlangvâl ve erawh mi awm loh lai pawha ‘Ka hmangaih che’ ti hlei thei lo, thil pawimawh sawi huna kha chih tlat zel ang chi kha a ni si a. Lehkhabu lama changtupa sawi ang sawi tura an phut rilruk chuan iaiawm tak tur an ni.

Dân chungchangah pawh hian hnam dang Vâi leh Sâp ten tha an tih dana an siam kha kan hmang ve a ni mai a, Mizo ngaihtuahna rilrem lo tak tak pawh a tam. India dânte hi tha kan tih em em rualin a kual thui nasa lutuk si te hi kan tlin lo va, mi sual(ni a kan ngaih) hrem mai an harsat dan zawng zawng ngaihtuahin VDP leh JAC, khawtlâng ang pawhin dân rorelna leh kan police-te hmalâkna kan tihtauhkhum fo va, kan duhkhawp lo em em thin. Keini chuan thil tisualtu nia kan ngaih chu hrem zung zung mai kan duh a, dân lah chuan thil tisual lotu hrem palh hlauvin a tisual ngei ngei(a kan ngaih) pawh a thlahthlam fo si. Kan hnam zia leh khawsak phung milin dân-te hi nei ta ila, kan zahin kan thatpui viau zawk awm asin.

Hnam mawl leh naupang apiang hian tharum thawh kan uar niin a lang. Vâi leh Sâp kan tihte chu tap pur khawpin an inhau thei a; mahse keini Mizote hi chu tap khawpa inhnial chu sawi loh a pawimawh zual pawh kan sawi zawh hmain kan inhûm sek a, tu tih danah emaw ‘chaw bârna zialin’ kan ri buan buan mai thin a ni. He rilru hi mi fing apiangin an thup thiam a, a fingvâr lo apiang kan insum thei lo thung a.

Hun hmasa lama kan police ten driver pakhat kut an thlak chiam tawh vâng kha nge ni Bawngkawn traffic point kianga dân piah lama kan police-te lo che leh zeuh khan kan mit a tikham hle mai a;social media lamah chuan dân bawhchhe hmasa zawk mangnghilh thak khawpin police kan eu a, ‘an thawm mitdelte hriat khawp’ tih thu ang maiin kan âu ta chiam mai a ni. Police ten tharum an hmang kha thil dik a ni lo a ni ang, suspend an tâwk reng a ni. Anni kha an thiam e ka ti hauh lo va, mahse Mizotlangvâl an nih miau avângin kei chuan hnam dang tlangvâl tehnain ka teh chuang lo.

Kut thlak theihna dân an nei lo’ tiin umzui chiam ila, mi sual dawp chhuah tur, dân hmaa thiam loh chantirna tur khawpa thil sual ti an tlem duh hle ang chu. A hrim hrimin mi sual luhlul dâwp chhuak tur chuan intih hliau hliau pawh har tak tur a ni. Hei zat hi kan police-te hian an lo dâwp chhuak tawh a, tawngkam tha leh duat avânga inpuang ta erawh an tlem ngawtin a rinawm. Tin, Police-te pawh hi zaidam hliau hliau ngawt tura lak an ni bik lo, thuin a tih theih tawh loh china tharum hman tul chang pawh a awm ang. Sawrkhar hmasa lama feet 6 police kan tih mai ho pawh kha thluak bûr ngawt hmang tura lak an ni lo tih kan hria ang chu. Hei hi tharum hman sawimawina a ni lo va, loh theih loh chin hi a awm ve bawk a ni.

Mihring hi kan eizawnna azirin kan rilru puthmang pawh a inthlak danglam nasa thin a. Anni police-ho pawh dân leh thupêk kengkawhtu an nih miau avangin dân an ngaipawimawh ang tih hi hai rual a ni lo. Mahse, chhûngkaw tam tak chuan dân pela che turin kan ngen fovin ka ring a; a tul hunah chuan pawi sawi loten dikna an chan ve theih nan mi awkhrawlte lakah tharum an hman tul châng pawh a awm ngei ang. A châng phei chuan mipui zawk hian kan duhna zawnah chuan dân baka che turin kan beisei fo va; dân kengkawhtu an nih avângin an ti thei si lo va, ‘ram leh hnam hmangaih lotu mi dawihzep’ ang hialin kan hmuin kan tawng khum thin reng a ni.

Thil dik lo tithang apiang hi a luhlul leh chhân khân hria, chapo bawk si kan ni duh khawp a. Mi sual awm tha duh lo zingah pawh hian mi fing leh ningkhawng hria, a lehkhathiam sâng apiang mai hi an chimawm ting mai a ni. Hetiang a nih avâng hian thil dik lo ti thin, dan hnuaia man fak hleih theih loh khawpa inthup thiam te pawh an awm thin a, an thiltih thin kha a dik tihna a ni der si lo. Khawvel ram zau zawk kan thlir pawhin mi awm tha duh lo zingah mi fing leh remhria an tam poh leh ‘sual inthup’ a tam ting mai a nih hi.

Mi tin eizawnna hi chhûngkua leh ram tan a pawimawh vek a, tumah han inen hniam a, inen sang tur bik kan awm chuang lo. Sawrkhar hnathawk awm lo se tu’n nge ram hmasawnna thawk thei ang? Sumdawng awm lo se khawiah nge thil kan lei ang? Thingtlang kut hnathawktute leh Aizawl mi hausa ber kan inzawm dan pawh Covid boruak avâng hian kan hre chiang tawh a; tumah hi ‘kan chuti bik’ han ti lua tur kan awm lo ve.

Police-te tan pawh hian an rawngbawlsak mipuite sukthlek hi man thiam pawh a har ang. Kan hamthatna tur a nih chuan a chângin dân dik tak hmanga rorel turin kan duh a; a chângin dân hrula chêttir kan duh a, a châng leh dân piah lam daih pawha che turin kan beisei thin. Kan hamthatna tur zawna dân kawihher duh deuh vek kan nih avâng hian kan police-te hi mipui lakah an fimkhur thiam a tul hle a ni.
An tana hahthlak ber tur chu politics ball-a hman tumtu laka invenhi a ni awm asin. Dân leh thupêk kengkawhtu an ni a, sawrkharna fawng vuantu apiangte nen thu khat vuaa hmâ la tlang tur an ni. Chutih mek laiin a khawi lam lamah pawh ball chhuih taka chhuih len tumtu leh mahni party hamthat nan leh mi party tih hmingchhiatna hmanrua atan hman hreh lotu an awm thin hi thil buaithlak tak tur a ni. Sawrkharna fawng chelhtute thu an hnial a rem lo va; opposition-te thu tha nazawng an zawm a rem ngawt si lo. Thil tam takah hian tuboh leh dolung kara leng an nihna chen a awm a; âwm leh tha an tih pawh an ti thei chuang lo.

Tunah zawng mi tin mai hi changkan khatin kan changkâng tawh a, lehkha zir sân leh fin vâng pawh ni chuang lovin khawvel kil tawpa thil thleng pawh kan hre zung zung thei ta. Mahni ngaihdan leh hmuh dan kil tinah kan âr mit tet khuanpui chiâm chiâm a, kan âu chhuah chhan a tuartute dinhmun erawh kan ngaihtuah em em chuang lo; a tam zawk chuan kan ngaidan âu chhuahpui vehrim hrim kha nuam kan tih ber a ni. Kan hmuh leh hriat chhun chhun atangin awmhmunah thutlukna huai takin kan siam a, kan duh duh kan khêng bet hmiah hmiah mai a ni.

A ka kaw nazawng thusawi kan rin a tul loh lai hian pawng paihthlak vek theih a ni chuang lo va. Tunlai chanchinah pawh a video atanga ngaihdan siam fel ta mai tam tak an awm ang; thenkhat police lo haw sa hrim hrim tan phei chuan âr chuk tui lo khawpa han sawi zui chu nuam phar phar tak tur a ni. Kan police-te hian social media avâng chauh pawh hian dân leh thupek an kenkawhna kawngah hnim hlingnei leh buar mê an tawng tam telh telh dawn a. Fimkhur takin, huaisen takin, mipui mizia leh sukthlek zir chunga fing leh remhre lehzual tura intuaihriam an mamawh a nih hi.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy