Addl. chief electoral officer H Lianzela kaihhruaiin State Level Media Certification and Monitoring Committee (MCMC) chu pre-certification dilna lut ngaihtuahin Thawhlehni khan an thukhawm.
Addl. CEO chuan political advertisement pre-certification tih ngai dilna lutte ni hnih chhunga tihfel hman tura hma lak a nih thu a sawi a. Election Commission of India-in dan leh dun a zamte zawm a ni em, tih endik thin a nih thu a sawi.
He hunah hian political party pahnih atanga electronic media kaltlanga political advertisement tihchhuah tur, pre-certification dilna lut 12 chu ECI in pre-certification tihna tura dan a zam hmangin endik a ni a. Endik zinga a tam zawkah dan pela thil tih ngaimawhawm a awm loh laiin, inkaihhruaina kalh hmuh chhuahte chu siamthat tura hriattir nise tih a ni.
Media Certification and Monitoring Committee (MCMC) hi mumal takin district election officer kaihhruai District Level MCMC, addl. CEO kaihhruai State Level MCMC leh CEO kaihhruai State Level MCMC (Appellate Committee) thlenga din vek niin, mumal taka kalpui a ni.
Candidate hming leh hamthatna tura advertisement siam reng reng chuan chhuah phalna District Level MCMC hnenah an dil hmasa tur a ni a. Party leh pawl State Hqrs-a political advertisement atan erawh addl. CEO kaihhruai State Level MCMC ah dilna thlen tur a ni. Candidate /party-te tan chuah hun tur thlen hma ni thumah dilna thehluh hman a ngai a, mimal/pawl tan erawh chhuah hun tur thlen hma ni 7-ah dilna thehluh hman a ngai thung.
Heng dilna hi ni hnih chhunga ngaihtuah zawh hman tur a ni a. Chanchinbu (print media) kaltlanga chhuah turte tan erawh vote thlak ni leh a hma chiah ni atan pre-certification tih a ngai a ni.
Political advertisement atan MCMC-a dilna lutte enfiah
