Sawrkar tawhten engmah ti lo anga maia sawitute chu rilru hrisel lo, mi ngelnghet lo te an ni a, politics-ah rilru dik leh hrisel put a ngai tih minister Dr R Lalthangliana chuan a sawi.
Thawhtannia Lungleia MNF Sub-Hqrs Lunglei huaihawt inkhawm a hmanpuinaah MNF adviser ni bawk Dr R Lalthangliana chuan politics-ah rilru dik leh hrisel put chu a harsa lai ber a ni, tiin, malsawmna dawng tur erawh chuan rilru dik leh hrisel put ngei ngei a ngai tih a sawi.
“Min beitute min beihna, Pu Zoramthanga kaihhruai sawrkarin engmah ti lo ang maia min chhuah hi pawm loh thiam mai tur. Kan thil tih leh hmasawnnate hi kan mitin kan hmuin kan hre vek. Hei hi party ngelnghet MNF leh Congress chuan kan sawi ngai loa, a ti thintute hi rilru hrisel lo, party ngelnghet lote an ni ang,” a ti.
MNF president, chief minister Pu Zoramthanga kaihhruaina hnuaia MLA-te an lungrual em em a, tun ang tluka bial vil tha leh taima MLA an awm a la hre ngai lo tih sawiin, Pathian leh mipui zarah MNF a sawrkar leh ngei dawn tih a sawi a ni.
India ram minister-te meeting-a an sawi zin ber chu state tinah development leh sawrkar hna lak kawngah tun thlengin Covid-in a la nghawng zel tih Dr R Lalthangliana hian a sawi a. Mizoramah pawh Covid dona atan budget-a awm lo, cheng nuai hlir nuai singhnih chuang an hmang a, Health minister a nihna angin an ziah tel loh pawh a hmu nual tih a sawi bawk.
Politics-ah rilru dik leh hrisel put a ngai – Dr R Lalthangliana
