Daily Newspaper

POLITICS CHHUNGA POLITRICK

66

Ramherliana, Mi naran

Politics tih chu sap tawng niin Mizo tawng ang maia kan hman tawh a ni. A awmziaah chuan rambung khat emaw a huam chin a sorkar tha awm theihna atana thawktute tiin a hrilhfiah theih awm e. Politrick tih erawh hi chu ‘Politician zinga boruak chhe zawnga hma latu emaw dawt leh thudik lo hmanga mi kara hem zeptu’ te pawh ti ta mai ila a dik thei tho ang chu. Chutichuan kan thupui awmzia chu Ram siamthatna atana thawktute (politician) zinga inpumkhatna thlen zawng ni lo boruak chhe zawnga hmalakna tiin a hrilfiah theih mai awm e a. Hei hian anmahni ang bawka ram siamthat tum-politician dangte, party dangte beihna leh do-na lam aimahin anmahni party chhunga inbeihna a kawk zawk mahin a hriat a, chu chu khawvel politics-ah hian hmuntinah an thanmawhbawk lian tak leh tih rem mai theih si loh chu a ni.

Hetiang hian kan zoram politics-ah sawi tur tam tak alo awm tawh a, nghawng lian tak neiin nunna hial chan phah te pawh an awm tawh nghe nghein a pawi hle thei a ni. Kum 1946 April ni 9-ah Mizorama Political Party hmasa ber Mizo Union tih chu a lo piang a. A kum leh 1947 July thlaah United Mizo Freedom Organisation (UMFO) Zalen pawl ti a sawi mai thin chu a rawn piang ve leh a. UMFO hi chu Party ding hnuhnung zawk a nih bakah pawlte zawk Zoram kalphung her danglam phak lo, an policy ‘Burma zawm’ pawh tihhlawhtlin a nih tah lem loh avangin sawi zui a hlawh ta vak lo a. Mizo Union erawh chu Politics Pawl ding hmasa ber, Zoram mipui te aiawh zo party lian, Mizoram dinhmun her danglamtu a nih avangin a sulhnu hi a thamral mai mai thei lo a, a chhelam leh a thalamah kan ram History pawimawh a ni kumkhua thung ang. Nimahsela Mizo Union pawh chu a hnu lamah Congress party nen an inchhunfin takah chuan a lo tawp ve ta mai bawk a.

1961 a Mizo Femine Front atanga MNF an din khan Pu Laldenga hi President a ni nghal a, Aizawl pa fel tak tak Pu R. Vanlawma te leh Pu J. Manliana te nen chutih lai chuan an lo thawkho tawh a, hnaivai taka an han inbelhchian hnu chuan a hnungzui zel chu harsa tiin an bansan ta hlawm a ni. Pu R. Vanlawma chuan Party hrang a din a, Pu J. Manliana erawh chu ni 23 April ah Assam MLA by-election ah MNF ticket a a tlin tak avangin MNF chu Official-in a bansan lo a, nimahsela MNF Gen. Hqtr. Aizawlah chuan a hmel hmuh tur a awm tawh meuh lo. 1966 atangin Independent sual tan a ni a, hnam aiawha MNF chu ding an nih avangin Mizo thinlungah thuk takin hmun a chang lo thei lo a, Mizo mipa thinlungah hnam hmangaihna a len em avangin MNF-ah an inpe ruih ruih a, zalenna sual chu thupui bera neih a nih avangin East Pakistan lamah Laldenga ho chuan hnam tan an liam thla hlawm a nih kha.

Chutia Pakistan atanga Zoram Zalenna atan Mizoram chhung India sipai awmte chu a khat tawka rawn beih zauh zauh a ni a, Pakistan lam atangin tanpuina pawh sum lai pai mai bakah hmanrua ang te pawha dawn a ni bawk. Chutiang karah chuan kan sipaite inkarah boruak eng eng emaw alo awm bawk a, 1969 June thlaa India Intelligent-in kan sipaite an rawn rawlruk (feeler) ah chuan Bhutan Status ang India Sorkarin min pek mai hnial lo angin an rawn sawi a, MNF hruaitu bawr rilru put hmang hriat an duh avanga kha thuruk kha an rawn sawilang mai nge, Mizoram a hautak taka an sipai chawmna kha a tawp theihna tur chuan Bhutan Status (Protected State) min rawn pek mai an remti tih chu inrinsiak mai loh chu tuma hriat a ni lo. Chutianga Indiain a rawn tawrhtarh (offer) chu thu tak a ni nge ni lo hrechiang turin 1969 ah Pu Vanlalngaia leh Pu R. Rozama te chu President-in tirin an kal ta a, nimahsela beisei loh deuhin Assam sorkarin Karimganj bula an lo man ta hlauh a. Pakistan lam chuan chutia kan palai tirhte man thu chu an lo hre nghal vat a, Pakistan ISI te chuan Laldenga chu engvanga tir nge a nih tih an zawtfiah nghal mai bawk a. President ber Laldenga chuan Pakistan ISI Officer liante hnenah leh Dhakaa chanchinbumite hmaah khan Pu Vanlalngaia te thiandun chu a tirh a nih loh a thu sawi thung ta mai a. Heta tang hian Laldenga chuan a pasalthate humhim aiin Pakistan duhsakna dawn zel chu a thlang zawk tih a lang chiang em em a ni.

1969 kum tawp lamah chuan President a rinna famkim la nei ho leh A Dum Pawl tia koh te chu an thu leh hla a rual vak tawh lo a. Chu chu Parliament rorelna inchhungah pawh khan a lang chhuak viau tawh nghe nghe a ni. Hruaitute chunga rin dan leh innghah ngam chin dan a inan loh miau chuan inkawm ngeih pawh a har hle tawh a. A Dum Pawl tia koh te leh la pawl ve lote kha thlur hnihin an kal tan tawh a ni. Chu chu House chhunga Debate naah pawh hai rual lohin a lang chiang hle a. Joint Parliament neih ngawrh lai khan MP 2 Pu K. Thangphunga leh Pu T. Rosanga te kha A Dum Pawl lo lam a mi an ni a, Debate te chu an thiam viau lehnghal bawk a. East Pakistan an chhuahsan hnu rei vaklo ah chuan MNF hruaitu chhungkuaa inghirhnghona kha a puak keh ta hial a. Pu Laldenga ho khan A Dum Pawl tia an puh ho kha an lo man fai vek a, vawilehkhatah a ruala man fai vek loin man hma deuh leh man tlai deuh te an awm a. An man zawng zawngte chu Provisional Goverment din atanga Pu Laldenga kaihza vengtu tak tak te, Ex- Vice President Pu Lalnunmawia, Lalhmingthanga, Foreign Minister, Lalkhawliana Finance Minister, S. Lianzuala, Vice President, H. Thangkima Supply Minister, R. Zamawia Defence Minister leh Army Chief nikawp bawk leh Sipai lama a hotu lawk zual deuh te an ni.

Heng bakah hian thildang tam tak sawi tur ala awm bawk ang a, hetiang hian Zalenna sualtu kan hnam sipai chhungkuaah khan boruak tha lo a lo awm tawh a, chu chuan rah tha lo tak a chhuah phah a, vawiin thleng hian kan la sawi bang thei lo a nih hi. Mizoram political history ah hian MNF chhungkua chauhah hetiang politrick tenawm hi a thleng lo a, Congress party chhungah pawh hian vawi engemawzat a lo thleng tawh bawk. Vawiin thleng pawh hian sawi tur kan hre hlawmin a rinawm a, pawnlama inbeihna aimahin chhungkaw inbeihna boruak hian party a nghawng chhe thei zawkin a ti thuanawp thei zawk a, party chhiatna bul tak pawh a ni thei a ni. Niamsela Leadership tha hnuaiah chuan rahbi rem leh tha zawk rah hun alo awm thei mai thei thin. Entirna atan han sawi ila: Kum 10 vel lek kal taah khan Congress party chhungkuaah boruak chhe tak a awm a, CL. Ruala te Zoramsangliana te hoin Lalthanhawla duh loin an chhuahsan a, pawl thar an din hman hian a nih kha. Nimahsela vawiin niah chuan Lalthanhawla hulhliap hnuaiah an awm leh vek thei tho a ni.

Pu Lalthanhawla leadership hi a ropuiin zir tham a awm ngei ang. Hetiang taka a laka helte kuahkhawm leh thei tur khawpa leadership a nei tha hi politician dangte zingah hian mamawh tak tak awmin a hriat a. A bik takin Next election (2023) atanga sorkarna siam ngei tum ZPM hruaitu zingah hian mamawh tak tak an awm hmelin a hriat a. Chuti lo zawng tun atanga Party hruaitu chungchanga boruak tha lo an neih nghal mai chuan rei an daih lo palh ang e. In enfiah hlawm sela a tha ngei ang.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy