Pollution leh Mizoram

Nimin December ni 2 kha National Pollution Control Day a ni a, Mizoram Pollution Control Board chuan online competition a buatsaih a, primary leh middle school chin tân online poster making competition, “Stop Pollution, Save Earth” leh “Pollution: The Silent Killer” tih thupui hmangin a buatsaih a. Competition-ah hian primary school level-ah zirlai 107, middle school level-ah zirlai 101 an tel a ni.
Pollution hrang hrang thatlohna leh hlauhawmna hi naupang thanglai mekte rilruah kan tuh ngheh chhoh zel chuan, tun atanga kum 20 velah chuan pollution hrang hrang avanga harsatna kan tawh mekte hi a ziaawm phah a rinawm.
Mizoram hi tun dinhmunah chuan air pollution leh noise pollution-ah kan la ziaawm viau laiin, land pollution leh water pollution-ah kan sang ta hle. Water pollution phei chu kan hmuh leh hriat angin, kan luite hi mipuiin bawlhhlawh paih nana kan hman bakah road construction leh construction hrang hrang avangin kan lui tui tlan laite thlitfim hleih theih loh khawpin a nu thin a nih hi. Land pollution ni se, leilunga bawlhhlawh chi hrang hrang thianfaiin englai pawhin pawl hrang hrang kan hnatlang suau suau ni tin tawh bawk.
Air pollution pawh kan sang hret hret. Tunhmaa Air Quality Index (AQI) 50 hnuai lam ni thin kha, tunah chuan AQI 70-80 a ni chho ta ngar ngar a, good atangin moderate-ah kan cham nghet ta hle. India ram khawpui dangte nena khaikhin ralah chuan boruak thianghlim pawl kan la ni pha a, khualzin thenkhatte pawhin Mizoram an rawn kal chhan zingah boruak thianghlim hi an sawi tel ve thin. Tlangram hring mawi tak leh boruak thianghlim tak hi kan sum hnar tur a la nih hmel; mahse, tun dinhmuna kan khawsak dan han en hi chuan, thingtlang lo neih leh sawhthing hian kan ram sik leh sa chu a tichhe mek zel chu a nih hi!
Tuna kan kalphung, ‘thenfai tura bawlhhlawh paih system’ hi kan bansan vat a ngai. Kan paih a, kan tibawlhhlawh a, a huhovin kan thianfai leh a, ti tha/thawk tha hi kan inti leh em em a, a zahthlak a ni tih lam ngaihtuah lovin, TV, chanchinbu leh social media hrang hrangah kan la uanpui/chapopui zawk em maw ni? Tun laia kan hmingthat ve na pakhat chu ‘traffic discipline’ hi a ni awm e. Traffic management a tha min tihsak lai hian, min han keu min han keu se chuan, ‘tuiluankawr management chhe ber’ te hi min ti leh ang tih hlauhawm tak a ni. Kan tanrual a pawimawh e.