Daily Newspaper

POSHAN MAAH (NUTRITION MONTH)

30

JULIET VANLALNUNHLIMI
I.T.I Veng (Ch-Sec) Anganwadi Centre – 2

September thla kan lo chuangkai leh ta a, kum 2018 atang khan kum tin he thlaah hian Prime Minister zahawm tak hmalaknain chawtha tlakchham um bo (malnourished free) nih tumin hmalakna kalpui a ni a. Poshan Abhiyan (Prime Minister’s Overarching Scheme for Holistic Nourishment) chu sawrkar laipui Flagship Programs a ni. Hemi awmzia chu, nu, naupai, naupang leh hnute hne lai chenin eitur tha an mamawh tawk an hmuh theihna tura hmalakna leh zirtirna pek a ni.

India ram pumah hian naupang kum ruk(6) hnuailam chawtha tlakchham natna vei 32% lai mai hmuhchhuah a nih takah chuan he scheme hi sawrkar laipuiin a duang chhuak ta a ni. He Poshan Abhiyaan hmalakna hi ICDS, Women & Child Development, Social Welfare Department-in chak takin a kalpui a ni.

He hmalakna a, a kila lungte tangkai tak te chu Anganwadi worker’s te hi an ni. Kan boruakin zir se chu, Wadi nu leh naupangte nen, khawlaiah banner te tarin, “Eitur tha, ram hmasawnna” tiin nasa zawkin he hun hi kan hmang ngei ang. Chawtha tlakchham natna um bo hi kan tih makmawh a ni, naupang hrisel chu a lo puitlin hun thlengin mi hrisel a lo ni ang a, hrisel loh chuan a taimak theih loh a, taimakna tel lo chuan hlawhtling khawpin hna a thawh theih loh, chuvangin kan veng, kan ramin hma a lo sawn zel theih nan hriselna hi ngaih pawiimawh a ngai a ni.

Anganwadi-ah hian chuktuah huan te siamin, centre-a naupangte thei leh thlai hring ei tam thatna hrilh in, kan thlai thar chhun leh nu hoin thawh khawmin, chhun chaw te ei hoin, hlim takin hun te kan hmang thin a, tunlai hrileng karah tih a rem ta si lo va, a theih ang angin media hmangin zirtirna leh hmalakna hi kalpui a ngai ta a ni. Anganwadi nutrition sem hi a thlawn a dawn a nih mai piah lamah chawtha tlakchham natna um bo nana kawng pawimawh tak a ni tih hre thar leh ila. Thla tin, pianghlim atanga kum nga(5) hnuai lam te chu an rih zawng leh san zawng a inmil em? An kum phu tawkin a thang in, a rit em? tih te enfiahin, centre ah mai ni lo, in lamah te pawh um zui hna hi kan thawk mek zel a ni.

Nu leh Pa ten hei hi hria ila, kan fate thlaruk(6) an tlin hma chuan nu hnute tui chauh pein, thla ruk(6) an tlin hunah erawh chuan an taksa mamawh phuruk nan chawkawi pe tel in, thei leh thlai hringte pek uar ila, fa hrisel leh hmeltha kan nei ngei ang.

Ka thiamna leh hriatnain mi U te pha lo mah se, mithiamte hnen atanga ka hriat hi hrilh loh che u atan chuan a uiawm em a, ka’n han fah chhawng ve ang che u. Zofaten chaw eikham thingpui hang (digestion) atana kan in thin te hi chaw ei atanga darkar khat (1hour) hnuah tal in thin ila, a nih loh chuan thingpuife/hnahah hian acid a awm a, chu chuan protein kan eia kha a ti khal/sak a, digestion a ti buai thin a; tin, taksain kan ei atanga iron a lakluh tur kha a lo ti buai thin bawk a ni.

He chawtha tlakchham natna hi naupang chauh lo pawn a vei theih tlat mai a, taksa tha, mam leh thau pui pui pawhin heng, vitamin leh protein, calcium leh iron te an lo tlachham ve theih tho avangin, eitur siam awlsam leh tui tih zawng chauh ni lovin, thei leh thlai hring ei uar ila, taksa hrisel mai bakah kan vun leh sam te chena a lo nalh a, pumrua a lo nalh a, hmel a lo that zual zel theih nan, kan ei leh in fimkhur a, chawtha tlakchhamna um bo turin Rashtriya Poshan Maah pualin ka sawm a che u.

(Nutrition Month – September puala ziah article hi, tlai deuh tawh mah se, a thu ken erawh a tlai thei lo. – Editor)

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy