Daily Newspaper

Povetkin leh Taylor te an chak

30

Pathianni zing khan boxing huangah inhnek hmuhnawm taka awm a. WBC world heavyweight kawnghren inchuhmaah Povetkin a chak a. Katie Taylor chuan Persoon hneh nawn lehin a kawnghren a humhim ve bawk.

Povetkin-a’n a lehthal
Palian huanga Boxer hriathlawh Dillian Whyte leh Alexander Povetkin te chuan interim WBC world heavyweight title an inchuh a, Tyson Fury leh Deontay Wilder te inhneka chak zawk zawk hmachhawn theihna hun tha an inchuh tel bawk. Palian huanga boxer hriat hlawh an nia, champion inchuh an nih bakah inhnek lian zawk hmachhawn theihna hun tha nei zui thei tur an nih vangin an inhnek hian ngaihven a hlawh a, boruak pawh a nei lian thawkhat viau. Li na a zawh thlengin Whyte a chetha zawk a, awlsam taka chak tura ngaih a nih hman laiin mak tak main tlawm zawkah a tang a, Povetkin hnek khat a dawl lo.

Round khatnaah an inhnehtawk thawkhat a, round hnihna atangin Whyte a chungnung tan. Round thumna a thunun hnuin round linaah phei chuan a chetha leh zual a, a khingpui hi vawihnih ngawt a hnek tlu hman. Round linaah vawihnih a tluk vangin Povetkin a buai zui mai rinna lian hle a, Whyte hi knock-out ina chak thei mai tura ngaih a ni hman.

Round nganaah thil mak tak a thleng a, awlsam tekin Povetkin a chak ta tlat thung. Round ngana tir lamah hian Povetkin hian Whyte hi a khabe-ah a chhoh dawm siah a, Whyte a tlu zawi nghal hnawk. Inhnek hmachhawn leh chi ziazang a ni lova, dimdawi taka enkawl ngaiin a awm zui ta zawk a, vawihnih tlu tawh Povekin chu a thochhuak a, hnehna hlutak a changin kawnghren a hlawhchhuak ta a ni.

Kum 40 mi Alexander Povetkin hi vawihnih chiah a la tlawm a, a tlawmna hi inhnek pawimawh tak; kawnghren inchuhnaah ve ve a ni thung. Palian huanga champion ropui Wladimir Klitschko lakah khan a tlawm a, IBF, WBO leh WBA world heavyweight champion Anthony Joshua lakah tlawm zawkah a tang bawk. Inhnek vawi 39 a hmachhawn tawh a, kum 15 chhung zet chu boxing huangah hun a hmang tawh a ni. Inhnek pawimawh takah Dilian Whyte a hneh vang hian inhnek lian tham zawk hmachhawn theihna hun tha a nei thei dawn a, Tyson Fury leh Deontay Wilder te inhneka chak zawk zawk hmachhawntu tur a ni. Fury leh Wilder te hi a vawithum nan an inhnek leh dawn a. A chak zawk zawk hian Povetkin lakah an kawnghren humhim tumin inhnek an hmachhawn zui tura ngaih a ni.

Hetihlai hian Whyte leh Povetkin te hian inhnek nawn leh thei turin thu an thlung tel niin Eddie Hearn chuan a sawi a. Contract-a an bilh telsa a nih vangin Povetkin leh Whyte te hi an inhnek nawn leh hmasak zet a rinawm hle thung.

Taylor chak nawn leh
Pathianni zing vek khan hmeichhe boxer lar Katie Taylor chuan a kawnghren humhim turin Delfine Persoon a hmachhawn nawn leh a, an inhnek hmasak ang thoin unanimous decision thovin hnehna chang a, a kawnghren a humhim nawn leh.

Taylor leh Persoon te inhnek hi a hma ang bawkin a hmuhnawm leh a, an inhnek tawk leh fu bawk. Round tawp ber an inhnek thlengin chak Taylor hi a pawng hret zawk a ni deuh chauh a, judge pathumte point pekah sang zawk vekin point 98-93, 96-94, 96-94 hmuin chungnung zawkah a tang nawn leh a, a kawnghren a humhim nawn leh ta a ni.

Hmeichhe huanga bpxer tha tak Katie Taylor hian inhnek 17 a hmachhawn tawh a, tlawm nei lovin a la kaltluang zel a ni.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy