Mizoram sawrkarin thla khata kawlphetha leina atana sum a sen thin chu cheng vaibelchhe 33-37 inkar a ni a, tui leh ni tha chakna hmang mahnia intodelh tumin sawrkarin tan a la mek tih Power & Electricity minister F Rodingliana chuan a sawi.
Assembly Session-a zawhna P&E minister chhan danin, thla khata power leina atan sawrkar sum sen hi vaibelchhe 33 atanga 37 inkar a ni a. Power kan mamawh san lai berin mega watt 156 vel kan mamawh. Tunah hian Serlui tih loh, small hydro electric project 15-ah MW 38.55 vel tharchhuah theihna kan nei a, khaw awm dan azira danglam reng a ni thung. Small hydel project zinga thenkhat chu thuamthat mek a ni.
Hma lak thar tumna zingah, Lungleng bula MW 120 siamchhuak thei tur Tlawng Hydro Electric Project chu survey leh investigation tih mek a ni a, kumin chhungin detail project report tih zawh hman tum a ni tih a sawi. Heng bakah hian Ngopa bulah Tuivai HEP leh Sesawng bulah Tuirini SHP chu tihhlawhtlin tuma bawhzui mek a ni tih a sawi.
Heng bakah hian Thenzawl, North Vanlaiphai leh Keifangah ni zung chakna hmanga kawlphetha siamna tur buaipui mek a ni tih minister hian a sawi bawk.
Chief minister Lalduhoma chuan MW 24 siamchhuah theihna Tuirini bik hi kum 2022 khan cheng vaibelchhe 584 senga khuah turin DPR siam a ni a, a dinna tur pawh soft loan-a hmuh theih leh consultancy service a thlawna tih theih a nih laiin, sawrkar kalta khan a lo hnawl a, hei hi tih nun thar leh tumin an buaipui mek tih a sawi.
Ram chhung leh pawn atangin power siam kawnga thawhpui duhtu an hmu nual tih sawiin, “Ngun takin kan zirchiang mek,” a ti
Power leina vbch. 37 vel Intodelh tumin tan kan la – Power minister
