Solar Rooftop Scheme – PM Surya Ghar Muft Bijli Yojana chak zawka kalpui dan tur sawihoin Nilaini khan Power minister F Rodingliana hoin P&E hotute leh empanelled vendor an thukhawm.
Power minister chuan Mizoram sawrkarin rooftop solar kilowatt 1 zelah subsidy Rs. 12000 a pe dawn tih a sawi a. Kw 10 thleng installation ti duh tan he subsidy hi pek a ni dawn, tiin, he scheme hnuaiah hian sawrkar laipui chuan Kw 3 thleng subsidy pek sak theiin, Kw 1 zelah Rs. 33000 subsidy a pe a. Hemi belhchhah nan state sawrkar chuan subsidy hi a tum ve leh tih a sawi a ni. He scheme hmang tangkai duh, a tira senso tur sumlu neilo tan interest hniam takin bank loan a lak theih dawn tih a sawi bawk.
Solar rooftop scheme hi Prime minister Narendra Modi chuan kumin February 29 khan a tlangzarh a. Solar rooftop hmanga power tam zawk tharchhuahna tur leh mimal in (residential building) ten an kawlphetha mamawh an thar theihna tura ruahman a ni.
Mizoramah chuan Power & Electricity department (DISCOM) chu state implementing agency-a ruat a ni a. Sawrkarin tehfung hrang hrang paltlang empanelled vendor a thlante hmangin mimal diltute hnenah solar rooftop installation hi tih sak tur a ni. Chenna ina vuah solar rooftop atanga energy siamchhuah hi in neitute hman bak chu sawrkarin unit khat Rs. 4.80 zelin a lei let sak dawn a. Tun thlengin Mizoram bikah empanelled vendor 11 an awm tawh.
Power mamawh phuhruknan solar power siamna ruahman
