Sawrkar laipui Ministry of Power secretary Alok Kumar chuan Mizoram Power & Electricity department buatsaih hnathawh thlirletna, Inrinnia Aizawla neih a hmanpui.
Power secretary chuan India sawrkarin mitin tan an nitin khawsak rel kawnga kawlphetha a pawimawh zia hria in, eng chhit man tlawm, mitin thleng zo leh boruak tibawlhhlawh lo mipui hnena thlen chu a tum ber pakhat a ni tih a sawi. Sawrkar chuan thil pahnih ngaihpawimawh zual – thingtlang kilkhawr thleng phak power quality tha pek leh electric eng chhitin a behbawm chu mipui tana phurrit lutuk niloa, a pechhuaktu in chawm zo tho si pek chhuah a ni tih a sawi.
Mizorama eng lakna chi hrang hrang zingah pump storage system hmanga kawlphetha siamchhuah chu nakina India energy transition chungchangah ram pum entawntlak a la ni thei tih a sawi a ni.
Revamped Distribution Sector Scheme (RDSS) chungchangah, smart prepaid metering a pawimawh hle a, hun lokal zel turah Mizoram chu 90% billing efficiency thleng tura hma la turin a fuih.
State P&E secretary H Lalengmawia chuan RDSS scheme chu sawrkarin a bawhzui mek tih a sawi a. Smart metering-ah bidding process-in hun duh rei deuh mah se, tun dinhmunah chuan June 15 hun tiam ralhmaa ruahmanna peihfela hna tan ngei a nih a beisei thu a sawi.
Thutkhawmah hian Power & Electricity department chuan Mizorama kawlphetha dinhmun powerpoint-in sawifiah a ni a. Tunhnaia department dinhmun leh RDSS chungchanga hmalakna kalpui mek leh an project ruahman lawk dangte sawi a ni. Power Grid atangin an hnathawh tlangpui an sawi bawk.
Power secretary hoin state kawlphetha dinhmun thlirho
