Power station beih vangin Port
Sudan-ah power awm lo vek
Sudanese khawpui pakhat, Port Sudan-a power station lian ber chu drone hmanga beih a nih avangin ‘khawpui pumah power a awm lo’ niin an ram electricity pe chhuaktuin a sawi.
Paramilitary force-ten ni thum a zawna khawpui an beihnaah hian thlawhna tumhmun lian ber bulah hian thil puak leh mei nasa tak a chhuak.
International airport chu drone-in a fuh avangin thlawhna dintir a ni a, presidential palace ni mek bula khualbuk pawh a fuh nia sawi a ni.
Kum hnih chhung tual chhung indona awm tawha miin himna atana an pan nasat, a hma lama khawpui him tak atang hian Thawhlehni vartianah khan meikhu dum tak a chhuak nasa hle.
Thawhlehni khan Sudan-a electricity company chuan an substation-a chhiate an thlithlai mek tih sawiin tui, damdawi in leh thil dang pawh a khawih buai tih an sawi.
Drone pakhatin Port Sudan tumhmuna civil mite pual bik a fuh a, pakhatin khawpui lailia sipai hmun a fuh bawk niin hmutute chuan AFP news agency an hrilh.
Drone dang pakhatin khawpui lailia mi chen tamnaa ‘chhim lam lawngchawlhna bula tuialhthei dahna hmun’ a fuh bawk a. He hmun hi UN thawkte, palai, tanpuitu pawl leh Sudan-a sipaite an khawpui, Khartoum atanga an insuan luhna hmun niin AFP chuan a tar lang.
Army chief Gen Abdel Fattah al-Burhan chenna bul lawka khualbuk pawh a fuh niin hmutu pakhat chuan a sawi.
Drone-a beihna a thlen hnuah UN chuan Port Sudan-a puihna phurh luh a titawp lailawk nghal a, tih dan pangngaia puih hna a thawh erawh a la kalpui reng thung niin UN deputy spokesperson Farhan Haq chuan a sawi.
“Kan pisa, kan hung chhung leh kudam khawih a ni lo va, kan hna pangngai chu kan thawk zel,” a ti.
Thawhlehni khan Sudan sorkar thupuangtu, Khaled Al-Aiser chuan sipaiten tuialhthei dah khawlna hmun beih chu ‘a theih anga thain’ an veng zui nghal tih a sawi a, ‘Sudanese mipuite duh chu tihchhiat a ni dawn chuang lo’ tih a sawi bawk.
Sipai chuan paramilitary Rapid Support Forces (RSF) chu Pathianni atanga drone hmanga beihna titu-ah an puh a, RSF chuan engmah an la sawi lo.
African Union chuan Port Sudan beihna hian Sudan-a tual chhung indona kal mek chu ‘inepna hlauhawm tak’ a nihzia a tilang niin a sawi a, ‘civil mi, mipuite mamawh leh chhehvel ram tihderthawnna’ a nih thu an sawi bawk.
Pathiannia beih a nih hma hian Port Sudan hi beih a la ni ngai lo va, indona hmuna hmun him bera pakhat a ni.
Paramilitary-te hian an ram an hloh tawh lak let tuma an beihnaah drone an hmang nasa hle a. March thla khan Khartoum pawh sipaite kutah an hloh a ni.
Sipai leh RSF inkara kum hnih chhung indona awm tawhah hian mi sang tel thiin mi tam takin himna zawngin an in an tlanchhiatsan a, khawvela mihring baihvaina ber ram a ni mek.
Sipai leh RSF hian indonaa dan bawhchhiaah an inpuh tawn ve ve bawk.
Power station beih vangin Port Sudan-ah power awm lo vek
