February thla atangin President Rule hnuaiah Manipur a awm a, he state-a indote an inkap tawh lo tia sawi theih a ni. Zofate paw’n an ralmuan thu leh ni tin khawsak pawh a pangngai thu an sawi.
February ni 13-ah President Rule-ah an awm tan a, hemi hnu hian Zo hnahthlakte leh Meitei an inkap tawh miah lo nia hriat a ni.
“Silai han puak zeuh te chu a awm mai thei a, mahse Meitei nen hian kan inkap tawh lo. Sipai an duty ngawrh a, a lehlam lehlam min veng hneh khawp mai,” Zo hnahthlak hruaitute’n an ti.
An sawi danin, Zo hnahthlak leh Meitei lamah hian a hmatawnga duty chu an la awm a, mahse a hma anga ngawrh leh inring renga awm kha chu an ni tawh lo. Sipaiin an dinhmun an hriatthiampui a, mipui an thlamuan phahna tur a nih chuan tiin an en liam ve mai a, mahse silai tha ‘automatic’ ken an phal lo.
Zo hnahthlakte leh Meitei an la inkalpawh lo a, mahse hnam dang chu a lehlam lehlamah an kal tawh. Hnam dang sumdawng an kal tawn a, thawmhnaw leh ei leh bar lam pawh an harsa tawh lo tih an sawi.
Zo hnahthlakte awmna district hrang hrangah sorkar office leh zirna inte an inhawng pangngai tawh a, kohhrante pawh an kal dan ngaiin an kal tih thu dawn a ni.
2023 May ni 3-ah an buai tan a, Mizoramah mi engemaw zat an tlanchhia. Manipur state-a Lamka leh hmun dangah an tlanchhe bawk a, engemaw zat chu an kir leh tawh. Kir lo pawh an la awm a, an ngaihtuahawm loh tih thu dawn a ni.
President Rule-ah awm mah se MLA-te chu MLA an la ni a, anni pawhin local area development fund te hmangin hna an thawk. 2027-a inthlang tur an ni a, chutih laiin Zo hnahthlakte hian inrelbawlna hran an ngiatna an la sut lo thung.
President Rule hnuaiah Zofate ralmuang
