Daily Newspaper

President Trump an Joe Biden nena ‘drug test’ neih duh

9

US President Donald Trump chuan amah leh a tumpui tur Demoratic challenger Joe Biden te chuan thla thara debate an neih hmain ‘drug test’ neih a rawt.

Trump chuan Washingon Examiner hnenah tun hnaia Democratic TV debate neihnaah Biden performance chuan hma a sawn thut tiin a sawi a.

President Trump chuan a tumpui tur ber chuan damdawi a hman leh hman loh sawi chiang si lovin ‘hetiang lam hriatnaah hian ka tha thawkhat’ tiin a sawi.

Kum 2016 khan Trump chuan khatihlaia a elpui ber Hillary Clinton chu debate an neih hmain drug test nei turin a lo ti tawh bawk a, a chhan pawh TV a final debate an neih dawnah a ‘phur thut’ thin tiin a sawi a. Clinton camp lam chuan na takin an hnawlsak a ni.

President Trump chuan Biden chuan democratic debate an neihnaah hma a sawn thut tia sawiin a hma chuan Biden chu mumal lo takin Democratic primary session neihnaah pawh a awm thin tiin a sawi bawk.

Trump chuan, “Hetiang em ema Biden an debate a laktlak loh chhan hi ka hre lo va, mahse, mak tak maiin thawklehkhatah Bernie nena an debate atang khan hma a sawn thut mai a ni,” tiin a sawi a.

“Winston Churchill a ni ta thut tihna a ni lo va, a ni bawk hek lo va. Debate pangngai, ninawm zet a ni,” tiin a sawi a.

“Thil mak danglam deuh a thleng thut a. Drug test neih kan rawt dawn a, a chhhan chu chuti thuta that thut theih a ni lo,” tiin a sawi.

Trump chuan debate chungchang sawiin, “Lawm man inchuhna a ni a. Gladiators te nena a danglamna awm chu kan thluak leh ka te kan hmang mai chauh a, din nan kan taksa kan hmang bawk a. Din reng ka duh a, anni chuan thut an duh,” tiin a sawi bawk.

Presidential debate hi tum thum neih tur niin Cleveland, Ohio-ah 29 September-ah neih a ni ang a, Miami, Florida ah 15 October-ah neih leh ni dawnin a tawpna chu 22 October-ah Nashville, Texas-ah neih a ni ang.

Trump chuan Biden nena debate neih belh a ngen a, mahse Commission on Presidential Debates te chuan an hnawlsak thung. Chu mi hnuah voter te tan tiin debate hmasa ber chu hma taka neih a rawt a, chu pawh hnawlsak tho a ni. Kum 74-a upa Trump leh kum 77-a upa Biden te hian dementia nei intiin an inpuh tawn ve ve a ni.

(THE AIZAWL POST – Rampawn)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy