Daily Newspaper

PRINT MEDIA HLUT THIAM

50

(Khawla chhut ngei aw…)

-Vidpuia Hrahsel

Tun hnaiah Lehkhabu chhiar ah, kan tlahniam ta em em hi eng dang vang ni lovin, awlsamna nunin min chiah hneh tawh vang a ni ber mai. Tu pawh mahni tawkah kan tlei vek tawh a, tun hmaa thian ho inkawm khawm a lenkhawm a titi ho kha WhatsApp Group-in a luahlan zo ta a, han leng khawm ve pawh ni ila, phone kan bih a, a khat tawkin kan titi a, kan tunhma nun a, kan inkawm dan nen kha chuan inpersan tawh tak a ni. Ni e, he Electronic Media hian min chiah hneh a, tupawh hian kan kutah kan hum fer fur a nih ber mai hi maw. |halai tam tak te chauh pawh ni lo, nu leh pa, pi leh pu thlengin he changkanna leh nunphung tihawlsamna hian min luah hneh a, a tangkai hle bawk. Hei vang hian Print Media lamah erawh kan hnu fual ta deuh, mahni ngainat zawng emaw chin than leh nuam tihzawng (hobby) a nih loh phei chuan, tumah hian Lehkhabu chhiar hi kan peih ta meuh lo. Social media-a kan hmuh leh kan hriatah kan lungawi a, lehkhabu chhiar lamah kan tlahniam ta.

Lehkhabu a chuang nge nge chhiar hi chu hriatna hi a nghetin a tlo bik em em a, khawih sawn theih, leh paih (delete) theih thil ai hi chuan khawla chhut nem kai hi a ngelnghet bik em em a, dahthat theih bawk, lehkha pawimawh pawh kan duh anga kan dah that theih a nih avangin social media atanga lehkha pawimawh emaw chanchinbu chhiar theih hi khawvel changkannain a ken tel ni mah se, a print chhuah nge nge hi ngaihhlut i zir ang u. Mitinin phone-ah chanchinbu emaw lehkhabu kan chhiar thei ta, Pdf (Portable Document Format) kan uar chho zel a, hmasawnna tha tak a ni, amaherawhchu he Pdf hi ngaiah kan nei palh ang tih erawh a hlauhawm hle. Khawvel changkanna hian a hmaa thil awmsa kan chin than te awlsam zawkin min la her rem sak zel dawn a, amaherawhchu kan chin than, lehkhabu chhiar tam te hi kan uar thar deuh deuh lehzual a va ngai em. He changkanna hian min tidanglam lo se, hnam dangte changkanna tak chu, an nun ze mawi leh, an chin than te emaw thil tha an tih than an kalsan ve mai mai lo hi a ni. Hnampui kan tih Sap te hian an vahvelna remchang apiangah lehkhabu emaw chanchinbu chhiar an uar khawp mai.

Keini Mizo thalai thenkhat chu Chanchinbu hi inkhelh en na leh Infiamna neih nikhuaah chiah Chanchinbu kan hrechhuak thin, chutah pawh thutna atan kan hmang a, chutah lah kan la paih peih lo zui erawh hi chu inzir kan va ngai em. Chanchinbu kan han chhiar ve a, a headline chhiar lem lo in, a hnungber Infiamna emaw thalai huang chiah titi vawrh nan chauh kan la hmang thin zui a, vengchhung chanchinbu thla khat a, cheng 10/- man pawh pe thei lo, social media khawih nan a, internet pack cheng 399/- man thun leh thin si, vengchhung chanchinbu pawh, inkhawm programme enna chauh emaw ti tawk lah kan bang lo, a bâk zawng chhiar kân a, chanchin thar hre thei reng, chhiar peih loh vanga hre lo thin zawk si hi kan kat nuk ang. Lehkhabuah han lut ila, kan hriatna ti zau tu leh kan tangkai pui tur lam ai chuan, a tlangpuiin Hmangaihna lam bawk a ni hralh kai thin. Hei erawh, lehkhabu lei nachang hre lo ai chuan ka dah sang fan mai, thil lang chiang em em chu, kan ngaihven loh zawng leh kan vei loh zawng tak lehkhabu hlutna kan hriat loh vang te pawh a ni ang.

Khawla chhut ngei lehkhabu hi kumkhaw daih a ni a, mobile phone erawh chu signal awm lohnaah chuan awmzia a nei lo. Lehkhabu erawh khawi hmunah pawh kan chhiar thei thung. Kuta kan ken kual theih mai pahnih Phone leh Lehkhabu hi finna leh hriatzauna atana kan hmanrua pawimawh leh awlsam tak a ni. ‘Google’ chu signal a awm loh chuan awmzia a awm lo, lehkhabu erawh kan hriatna ti zautu atan khawiah pawh kan keng kual thei. Kan ken kual theih ve ve atang hian kumkhaw daih thil awmsa, ken kual ve theih tho si hi hman tangkai zawk zel i tum ang u. Lehkhabu ziaktute hian ngun tak leh uluk takin thu an ziak thin a, social media-ah pawh thuziah chi hrang hrang chhiar tur chu a awm meuh mai, amaherawhchu journalist emaw inti, thubelh chian dawl lo, mi tihder tum ran a thu post thin emaw lar khel mihring kan kat nuk thin, hei vang hian Lehkhabu ziak ngei, a ziaktu ten uluk taka an chhut chhuah hi rintlak taka chhiar leh hlut zual deuh deuh kan va ngai em.

Khawvel changkanna leh than zelna rah avangin mahni phone ah theuh, PDF (Portable Document Format) en theihna kan nei theuh ta, chanchinbu la lo pawhin, internet atangin nitin chanchinbu Pdf in kan chhiar theih a, he internet hmanga chanchinbu chhiar theihna hi hman tangkai zir ila, a hun leh hmun azira kan inher rem ve zel a ngaih fo chang a awm thin a, amaherawhchu khawla chhut lehkhabu leh chanchinbu hi a hlutna ti hniam lo turin, kan theih chin chinah kan chin than pangngai chanchinbu chhiar hi ngaihhlut i zir zel ang u.

Social media hian kan nunphung min chenchilh nasa tawh a, eng inkhawm emaw thil huaihawt turah sawmna emaw committee kohna te Whatsapp emaw Facebook hmanga kan koh thin hi, dan pangngai ve reng (formal) ah kan ngai palh ang tih a hlauhawm hle. Heng sawmna te, meeting kohna te hi khawla chhut ngei lehkhaah sem ngei hi dan pangngai ve reng a ni a, a nih tur ang a ni bawk. Internet hmanga kan sawmna thawn hi chu inhriattir nawn nan a, kan hman zel a pawimawh hle.

THE AIZAWL POST
~Article~

HOME>> The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy