Priyanka-i’n na takin UP
a BJP sorkar sawisel
Congress hruaitu Priyanka Gandhi Vadra chuan pathianni khan BJP kaihhruai Uttar Pradesh sorkar chu na taka sawiselin, Lucknow-a mitang pakhat chu police ten an kawl laiin a boral niin a sawi.
A sawi zelah Priyanka chuan, ruling party chuan state chhungah hetiang ‘jungle raj’ hi an din a ni, a ti a. Police tih leh tihduhdahna tih chu a inmil phah hle a ni, a ti bawk.
A hnuah a thusawi chungchanga social media platform pakhata a sawizawmnaah Priyanka Gandhi chuan, thi chhungte chuan police te chu an fapa thatah an puh, a ti zui bawk.
Gandhi-i chuan, he thil chungchang hi sawifiah zuiin, Lucknow, UP-ah police te chuan tlangval pahnih an man a, pakhat zawk chu a tuk zingah a boral nghal tih sawiin, hei hi kar hnih chhunga UP-a police te kuta thihna vawi hnih thlenna a ni, a ti a. Thi chhungte hian an fapa chu police te thah niin an puh, a ti a ni.
He thil thlenna bul ber chu BJP an nih thu sawi zuiin, dan kengkawh tur ber ten nunna an lak si chuan tu hnen atangin dikna beisei a nih tak ang, tiin a sawi zui bawk.
Hetihlai hian UP Dy. Chief Minister Brajesh Pathak chuan, he thil thleng chungchangah hian thubuai ziahluh tawh a nih thu a sawi a, he thila inhnamhnawihte lakah khauh taka hmalak a nih tur thu a lo tiam ve mek bawk.
Priyanka-i’n na takin UP a BJP sorkar sawisel
