Pro Fight last 4 lut hriat kim ta…

Pro Fight last 4 lut hriat kim ta…
Falkland Venga LPS Arena-ah nizan khan semi-final lut inchingfelin, quarter-final zan hnuhnung result erawh hriat hman a nih loh avangin Thawhlehni zan last eight inhnek lam kan hawi rih dawn a ni.
Knockout hmanga vawi ruk a chak zawn hnuah Laldinsanga’n Thawhlehni zan Tata SK 612 LPS Pro Fight bantamweight semi-final a lut.
LPS Arena, Falkland-ah kum 20 mi Dinsanga’n chhiar ngaia a hnek hnuah Ngengpuitlang tlangval Hmangaihenlaia a awpbet zui a, minute hnih leh second 31 chhungin technical knockout-in a chak.
BANTAM
Lunglei Ramthar boxer hi kum 2022 atangin Pro Fight-ah a tel a, nikuma a bitum knockout vekin tum li a chak zawn a, best boxer ni chungin flyweight-ah a champion. Kuminah weight rit zawk bantam-ah insawnin, tawnhriat nei lo huang atanga quarter-final lut Hmangaiha a hneh hmain round hnihna laihawlah Lalruatpuia (Mamit) a hnek tlawm tawh a ni.
Kum 23 mi Hmangaiha’n tharum leh thahrui nei mah se thiamna kawng hrang hrangah Dinsanga a chungnung a, a theihna tak tak lantir tur khawp boxer a la tawng lo zui zel a; Zirtawpni semi-final inhnek pakhatah Lunglei Ramthar tlangval ve tho David Laldanmawia nen an intawng dawn a ni.
Kum 19 mi Danmawia hian bantam quarter-final dangah unanimous decision-in Darlawng boxer Rozamliana a hneh a, a hriat chian Dinsanga lakah fiahna a hmachhawn zui dawn a ni.
Danmawia’n a hma aia thain a khel a, a ban seina tha takin a hmang a, amah nawrtu kum 26 mi Rozama lakah thiam taka invengin rang takin a lo hnek a, Darlawng boxer-in bei ngawrh mah se chet a harsat a, 29-28, 29-28, 30-27-in Lunglei Ramthar rawlthar a chak zawk a ni.
MIDDLE
Middle-ah Siaha tlangval Daniel Beipasasa leh Sihphir Venghlun fighter Timothe Malsawm-dawngliana’n semi-final an lut.
Khel hah loin kum 21 mi Beipasasa a chak. Mimal thilah harsatna a neih avangin a inhnekpui tur Tlungvel boxer Zosiamthara’n a inlan lo a; Inrinni zanah Vanlalruata (Teikhang) leh F. Lalthanliana Junior (Lunglei Electric Veng) chak zawk nen final luh an inchuh ang.
Kum 24 mi Malsawma’n technical knockout-in amah aia lian Teikhang rawlthar Chinsuanlala a hneh ve thung a; thahruma an innuaina karah Sihphir Venghlun boxer-in chiang fuh tak takin a hnek a, round hnihna tawp dawnah lehlam hnek chhanglet loa Lala a inven ringawt avangin inhnek tihtawp a ni a; Malsawma’n Zirtawpni zan semi-final lamah C. Lalhruaitluanga (Chawngtlai) a hnek zui dawn a ni.
FLY
NT Lalbiakkima nena intawng turin Emmanuel Vanlalthlengliana’n flyweight quarter-final a paltlang.
Melthum fighter Thlengliana’n Bawngkawn boxer Lalhruaitluanga a nawr hneh a, inhnehtawk taka an inbeih hnuah split decision-in a chak.
Kum 21 mi Thlengliana hian thahrui tha tak nen a bitumte panin anni aia hnek chhuak tam zawk a nihna a chakpui zel a; Zirtawpni zanah fiahna tak tak hmachhawnin vawi nga champion tawh NT Lalbiakkima nen final luh an inchuh ang.
Kum 20 mi Hruaia’n inveng chhungin tha takin a hneklet a, a hmain thiamna a neih dinchanpui tawh mah se Thlengliana’n a hnek hneh a, inhnaihchilhah a kut a rangin a chhuah tam zawk bawk. Judge pathum point pekah 28-29, 30-27, 29-28-in a tlang a, championship kal mekah vawiruk a chak zawn tawh a ni.
LIGHT
Light-ah nikum Lunglei Luangmual boxer Lalmuanpuia’n kum zawnin semi-final a lut a, hmuhnawm taka a khelh tthin avanga mipui lawm hlawh tak Vanzairemmawia beiseina titawpin unanimous decision-in a chak.
A tir lamah Lungtian fighter Remmawia’n a khelh thin dan pangngaiin a vei leh ding chhuah zawnin a nawr a, Muanpuia talbuai deuh mah se rang takin a insiamtha a, hnaihchilhin chiang tak takin a hnek a, thiamna nei zawk a nihna a lantir bakah tlo takin a bei.
Round hnihnaah tawnhriat nei lo huang atanga tlang Remmawia’n a tuar nasa hle a, tlu loin a tawp thleng a ding tluan.
Round thum chhung hmuhnawm takin an inhnek tawn a, 30-27, 29-28, 29-28-in tawnhriat leh thiamna hrang hranga chungnung zawk Lunglei Luangmual tlangval a chak ni.
Kum 21 mi Muanpuia hi GIG Motors Fighter of the Night-a thlan a ni a; Inrinni zanah rin hlawh HC Lalramfela (Chawngtlai) leh Lalbiakzuala (New Vervek) inkara chak zawk nen final luh an inchuh ang.
WELTER
Welter-ah Khawhai tlangval C. Remruat-sanga’n round hnihna laihawlah Chanmari West rawlthar Vanlalmaka a knockout a, Inrinni zan semi-final bout-ah Vanlalruatpuia (Saikhamakawn) leh Lalhruaisanga (Darlak) chak zawk a bitum zui ang.
Round khatnaah veikhawr Maka a langsar a, a vei lama chiang taka a hnek thin bakah fuh takin a hnek zawn zui a; tuar thei tak Ruatsanga’n vai tlu ve thung mah se, chhiar tuar loin Chanmari West rawlthar a tho leh.
Round hnihnaah pumraw lian leh tharum ngah Ruatsanga’n a nawr hneh a, a taksaa a hnek zawn hnuah a hmaiah hnek zawn lehin kum 17 mi Maka a tlu a, a tho chhuak zui thei ta lo a ni.
Zirtawpni zan leh Inrinni zanah semi-final khelh a ni dawn a, round thum ni tawh loin round li zel an inhnek tawh dawn a ni.