Professional rematch:
Pacquiao vs Mayweather!
Khawvelin an inhnek vawi khat a en kham theih loh Manny Pacquiao leh Floyd Mayweather-te chuan professional huanga inhnek that leh an remti ve ve a, he inhnek nghahhlelhawm hi Las Vegas khawpuia Sphere-ah kumin September thla hian nghah a ni dawn a, Sphere-in professional boxing match a dawl vawi khatna tur a ni nghe nghe!
Boxing great pahnih Pacquiao leh Mayweather-te Inrinni zan innuai tur hi Netflix-ah live-a pekchhuah a ni ang.
Kum 47 mi Pacquiao leh amah aia upa hret Mayweather-te hi May 2015 khan MGM Grand Garden Arena, Las Vegas-ah intumin, kha welterweight unification championship bout-ah khan American chak zawka puan a ni a; a hnu lawkah Mayweather khan a chawlh thu a puan zui tak avangin khawvelin rematch thlir tur a nei ta lo!
World champion hlui Mayweather chuan boxer ropui dang engemawzat ang bawkin chawlh a puan hnuah a kirleh thu a puang fo tawh a, karliamta mai pawh khan a tum lina atan boxing-a a letleh tur thu a nemnghet leh a, tunah Filipino nen ngei mai an intawn leh tur thu hriat tur a awm zui ta a ni.
September thla inhnek lian tur hi kum 2017 daih tawha mixed martial arts fighter Conor McGregor laka 10th-round technical knockout hnehna a chan hnua American professional bout hmasa ber tur a ni.
Pacquiao ve thung hian a political career lama insawrbing a duh avangin kum 2021 khan boxing a chawlhsan a, mahse, a ni pawh hi hawikir lehin, nikum July thla khan WBC welterweight champion Mario Barrios hmachhawnin hruihrual chhungah a kir leh a, mahse, inhnehtawka puan an nih avangin Barrios-a title kawl lai a chhuhsak zo lo.
Kum 2015-a Mayweather leh Pacquiao intawn vawi khatna kha ‘Fight of the Century’ tih niin, tun thleng hian boxing history-a sum tamna ber a la ni reng!
Tarlan tawh thin angin, Las Vegas khawpuiah khan a tih dan ngai bawka inveng chunga khel Mayweather kha unanimous decision hmanga chaktir a ni.
Tuntuma an intawn nawn lehna tur hi eng weight class nge ni dawn tih leh round engzat nge an inhnek dawn tih puanzar a la ni lo.
Weight then hrang pariat ngawta world world title 12 tehreng hnek chhuak thei Pacquiao chuan chuan Floyd nena boxing history-a fight lian ber an lo phochhuah dun tawh thu sawi chungin fans lamin hun rei tak rematch an nghah hnua an nghak chhuak tur chu an phu ve reng niin a sawi a; a tumpui tur lam hawi chhunzawm nghalin, “Floyd hi a professional record-a a tlawm vawi khatna tawngbaw tura lo inring turin ka duh a, chu hun thlentirtu chu a hre rei ve khawp ang,” a ti!
Tunkar Thawhlehnia kum 49 tling chho ve ta chiah Mayweather pawh a tawng nem hlei bik lo a, “Manny vawi khat tawngin ka lo hneh ve tawh a, tuntum pawh hian khati ang result bawk kha ka hmuhtir leh dawn,” a ti!
Mayweather hian professional fight 50 a hmachhawn tawhah hnehna la chang fai vekin, chu’ng zinga fight 27 chu knockout hmangin a chak.
Kum 2017-a a chawlh thu a puan hnu khan hruihrual chhungah exhibition bout khelin a kir fo tawh a, kumin hian Mike Tyson nen pawh sum siamna atan bawk inhnek turin ruahmanna an peih fel tawh a, mahse, chu ai pawh chuan a chawlh puan tawh a hnuhkir hnua a professional bout hmasaber tura Pacman a hmachhawn leh tur hian khawvel ngaihven a hlawh lo thei lo.
Professional rematch: Pacquiao vs Mayweather!
