Property Tax zirchiang tha mek
Aizawl Municipal Corporation-in felfai zawka property tax a khawn a, mipui tan tangkai zawka a hmanchhuah leh theih dan zirchiang turte chuan zirchian bul an tan.
AMC executive corporator i/c Property Tax Vanlalfaka kaihhruainain property tax zirchiang tura Study Team din hi Nilaini khan an thukhawm a. Aizawl khawpui chhunga mumal leh felfai zawka property tax khawn dan tur leh mipui tana tangkai zawka property tax tlingkhawm hman chhuah dan tur an zirchiang.
Mipuiin awlsam zawka tax an pek theih dan tur, rualkhai leh felfai zawka tax khawn a nih theihna tur sawiho a ni. Local council leh state sawrkar nen pawh tanho dan kawng zawn a tul tih sawi a ni.
Study Team member-ah hian Ward No. 4 corporator Vanlalhriatrengi leh Ward No.5 corporator Dr Lallawmkimi Tochhawng bakah AMC official-te an tel a. AMC Executive Council thukhawmin a phut angin kumin July 20 ralhmain a zirchianna leh rawtna Aizawl mayor hnenah an thehlut ang.
AMC Executive Council chuan AMC subject hrang hrang zirchiang tur Study Team 9 a lo din tawh a. May 20-a din a ni a, thla hnih chhung hun pek an ni
Team tinah hian executive corporator-te chairman an ni a, secretary chu an subject zirchian tur AMC in-charge officer an ni. Member-ah corporator zawng zawng bakah AMC officer-te sem darh an ni a. July 20 ralhma in report an thehlut dawn a ni.
Study Team hian AMC Executive Council thutkhawma pharh tur report leh rawtna an neih an thehlut anga, Executive Council-in a pawm hnu ah Board of Corporators thukhawmin a pass turin chhawpchhuah a ni ang. Pass a nih chuan chumi hmang chuan hma lak zui a ni dawn a ni.
Hei hi AMC kalphung tha zawk, mipui tana tangkai leh langtlang zawk a awm theihna atana tih a ni a. AMC kalphung awmsa a tha lai chu chhawm zui zel tum a nih rualin, tih danglam pawh a awm dawn tih sawi a ni.
Property Tax zirchiang tha mek
