Daily Newspaper

PRRS kai dan loa lakluh vawk tihlum

16

District Court Champhai thupek bawhzuiin Thawhlehni khan dan loa vawk lakluh an man, a puitling 3 leh a note 7 chu AH & Vety Complex Champhaiah kahhluma phum an ni.

Vawk note 7 hi kumin August 19-a Tlangsam daia mante an ni a. Vawk puitling talhrual 3 mante hi September 17-a Champhai Zote kaia mante an ni. Heng vawk mante hi AH & Vety Department Champhai ruahmannain Porcine Reproductive and Respiratory Syndrome (PRRS), Classical Swine Fever (CSF) leh African Swine Fever (ASF) natnate an vei leh vei loh endik a ni a, PRRS leh CSF natna an vei tih hmuhchhuah a ni. Hrikai vawk 10 hian hri an tihdarh zel lohna tur leh District Court Champhai thuchhuak angin kahhlum a, a phumna tur bika siamah uluk taka phum nghal an ni.

Thawhlehni vek khan AH & Vety Department, Champhai Police leh Environment, Forest & CC Department tangho chuan sawrkar khapna thupek dinglai zawm loa phurh vawk note 4 leh a neitu Chinglunnuami (39), Bethel Veng Champhai chu Zote kaiah bawk an man a. September 19 khan dan loa phurh vawk note 6 chu Zote kaiah tho hian man a ni.

Tun dinhmuna vawk note man 10, la tihral lohte hi AH& Vety Department chuan an hriselnate endikin a enkawl chhunzawm a, court case a kal mek a ni.

AH & Vety Department Champhai chuan thuchhuah siamin, district magistrate-in ram dang leh state dang atanga vawk, vawksa leh vawksa atanga siam reng reng Champhai district-a lakluh leh phurhchhuah khapna thupek a chhuah hnu pawha dan loa vawk phurh man tur a la awm fo chu pawi a ti a. Mipuite chu kan himna tura sawrkar thupekte tha taka zawma, tun hnuah hmundang atanga vawk, vawksa leh vawksa atanga siam lalut tawhlo turin a ngen a ni.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy