Daily Newspaper

PSG boss thar Pochettino

14

French Ligue 1 champion Paris St-Germain chuan an manager Thomas Tuchel an ban a. A hmunruak luahtu atan manager hriathlawh tak Mauricio Pochettino chu an head coach thar atan an la lut. Spurs manager hlui Pochettino hian French Club ropui PSG-ah fiahna hautak tak a hmachhawn a ngai dawn.

Ligue 1 club lian , champion lai PSG hian German manager hriat-hlawh, Borussia Dortmund-a a hmingchher tak Thomas Tuchel hi kum 2018 khan PSG hian beiseina sangtak nen an ruai a, beisei angin bul a tan thatpui viau bawk. Ligue 1-ah vawihnih a champion pui zawn a. Season liam ta khan champion chaka an tuihalna Champions League-ah final a hruai thleng a. Final-ah Bayern Munich hneh lovin an vanduai ta thung. PSG-ah bul tan tha bawk mahse 2020-21 season-ah bul an tan tha ta lo hle thung. Player tha filawr Neymar leh Kylian Mbappe te kawl tlang bawk mahse he thu buatsaih lai thleng hian pathumna an ni hram chauh. Kum 2022 thleng contract an ziahpui bakah, kum khat dang pawhsei leh theih turin thu thlung bawk mahse kum hnih leh a chanve hnu lekah an petchhuak a, Pochettino an la lut leh ta zawk a ni.

PSG manager thar Pochettino hian London club lian Tottenham-ah a hming a lo chher hle tawh a, player thar lei nan sum seng hnem ve ngai lo mahse Premier League leh UEFA Champions League-ah pawh club tlo ber pawl an ni tlat zel thung. Tottenham hi kum 2019 khan champions legue final a hruai thleng a, Liverpool hneh lovin an tlawm. UCL final hial lut mahse Premier League lamah bul an tan that loh vangin thla nga hnuah Spurs hian an ban zui ta thung. PSG-a a thlak tak Thomas Tuchel nen inanna tak an nei a, an team enkawl champions League final an hruai thlen hnu lawkah ban an tawk ve ve.

Kum li chhung zet Tottenham lo enkawl tawhtu Pochettino hi club lian hrang hrang Real Madrid, Barcelona leh PSG ten an ngaihven a. Rawih theihna hun remchang nei tha PSG chuan an manager thar atan an la lut ta a ni. Football player a nih laia a lo khelh tawhna PSG a enkawl thei ta hi Pochettino ngei pawh a lawmin, a phur hle nghe nghe a ni.

PSG manager thar Mauricio Pochettino hian Argentina tualchhung club hlun Newell’s Old Boys-ah bul a tan a, kum 1989–1994 chhung khan vawi 158 zet a khelhsak hman. Hemi hnu hian Spain lamah kal in, Espanyol a zawm a, Espanyol tan hian vawi 216 zet La Liga-ah a khelh leh hman bawk. Espanyol atang hian manager nia a enkawl tan tak PSG hi kum 2001 khan a zawm a, Ligue 1-ah vawi 70 zet a khelh hnuin 2003 khan Bordeaux a pan ve leh ta thung. A club hlui Espanyol lamah kir leh in, Espanyol atang hian player anga a football zingkawng chu a zawh tawp ta a, 2006 khan a ballboot a khai ve ta a ni.

Football a chawlhsan hnuin coaching a luhchilh zui nghal a, a lo timi viau nghe nghe. Kum 2009 khan a club hlui Espanyol a enkawl tan a, kum thum a kaihhruai hnuin English Premier League club Southampton a enkawl zui leh nghal. Saints hi a a chetthatpui vangin EPL club lian leh hlun zawk Tottenham chuan an hmutai hle a, kum 2014 atang khan an manager ni turin an ruai tan ta a ni. Tottenham-ah hian a hming a chher ta hle a. Club lian hrang hrang ngaihven hlawh laih a ni ta hial a ni.

French tualchhunga vawk lal len PSG hi champion an chakna ber chu Champions League a ni a, UCL-ah a chetthatpui thei a nih chuan Pochettino hian fak a hlawh hle ngei ang. Pochettino hna hautak leh tur pakhat chu club lian hrang hrangte ngeihven Kylian Mbappe chelh a ni ngei dawnin a lang bawk

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy