Inrinni French Ligue 1 in-khelah an mikhual Toulouse laka si phur hmasa Paris Saint Germain chuan minute 38-a Achraf Hakimi goal hmangin an siphurh an sut a, 1-1 a nih hnu second half tir lam minute 58-a Hakimi siamsak hmangin Lionel Messi chuan 2-1-a mualneitu team chakna goal a thun a, PSG hian table-ah point riatin hma an hruai fal rih phawt.
Paris khaw inkhelah hliam avangin Kylian Mbappe leh Neymar an inlan thei lo a, heti chung hian table laihawl luahtu Toulouse lakah hmahruaitu team hi harsatna lian tawk lo tura beisei an ni a, mahse, beisei loh takin Dutch midfielder Van den Boomen chuan minute 20-ah free-kick atangin mikhual hmahruaina goal a chhuihlut a; PSG erlet dan chu a chunga tarlan tak ang hi a ni.
Kartawp hnehna nen league game 22-a point 54 hum chungin PSG-in an hmahruaina an sawhnghet zel a, an hnuai chiaha pahnihna luahtu Marseille lakah he thu buatsaih lai thleng hian point riatin an sang.
Nizan result taran hman lohah Marseille hian Nice hma-chhawnin, tunkar Coupe de France last 16 match lamah Marseille hian PSG an mikhual zui leh ang.
Mualneitu team chakna goal khungtu Messi khan season kal laiah Ligue 1 goal 10 tilut tling chiahin, inelna hrang hrang belhkhawmah goal 15 a ngah tling tawh thung.
Karliamta Montpellier muala 3-1 hnehna an chan tuma inhliam Mbappe kha ngai awh leh tura chawlhkar thum tal chawlh mamawh a nih avangin February ni 14 Champions League last-16 first leg-a PSG leh Bayern Munich inkhelh hunah a inlan thei dawn lo.