A chhuak dawn nge a cham dawn tih la chiang thei lo Paris St-Germain striker Kylian Mbappe chuan season thar inbuatsaihna kalpui chhoh tan takah first team training a zawm lo a, hei hi Real Madrid fans tan chuan chanchin ngaihnawm a nih ngei hmel!
PSG thuam inbel chunga league title panga la tawh Mbappe hian Champions League trophy a lakpui theih loh Paris club hi a chhuahsan dawn nia ngaihna a lian chho zel a, nimina Ligue 1 season thar inbuatsaihna an kal chhohpui tanah Paris St-Germain first-team squad a luah ta loh phawt chu a ni a, a hma hun hian ngaihven a hlawh zual zel.
Paris St-Germain player awm tawh zawng zawng zinga he team tana goal khung hnem ber ni mek hian nakum nipui laiin a contract neih lai hmang zo ve tawh dawn mah se tun thlengin inremna thar ziah a la hnial a, contract thar an ziahpui thei lo a nih chuan PSG hian man nei loa an chhuahtir tho tho a ngaih hmel avangin sum tam lutuk rut thei dinhmuna an din lai hian France forward hralhchhuah mai loh chu duhthlan tur an nei dawn lo a, chutih laiin inremna thar ziahpui thei dawn lo mah se Mbappe transfer fee itawm tham zet tur chu hnawlin an awh ber Champions League beisei leh turin an chhawr zui dawn em kan hre rih lo!
Mbappe hi Asia khawmualpuia season thar inbuatsaihna kalpui mek PSG touring squad-ah a tel ta lo phawt chu a ni a, tun dinhmunah zawhna bak thumum hriat mai tur a awm rih lo.
France rama a hmalam hun a chian loh ruai lai hian tunlaia khawvel player tha zawng zawng hup zawh tum ang maia an mit itzawng ngaizawng hmiah hmiah Saudi Arabia lamin Mbappe hi hruailuh an tum khawp a, mahse, tun thleng chuan French striker hian world record fee-a sengluh tumtu Saudi Pro League club Al-Hilal aiawhte a la hmu duh lo!
PSG hian kartawp Inrinni mai hian French title an kawl lai humhim tura an chet-chhuah vawikhatna turah Lorient an mikhual dawn a; he boruakah hian an thiampuipa Mbappe chuan first team rualin Asia tour zawm lo mah se ‘A’ training group erawh a zawm tho dawn a, he miin a entir chu first team tan a la khel thei tho dawn tihna a ni – a chhuah loh chuan.
Tualchhunga trophy awm thei zawng zawng hui fai leng thinin, Real Madrid ang maia superstar player rual huikhawma ‘galactico’ kawl ther fur chung pawhin Europe-ah an hlawhtling zo lo a, an beidawng ta deuh rih nge ni dawn an superstar pakhat chhuak ta Messi khan a chhuah chhan pakhat a sawiah tun dinhmuna ‘project’ lian an neih loh thu leh an rawlthar rual lam ei tling tura chherchhoh lam an tuipui ang deuh khan a sawi niawmin media lamah hmuh tur a awm a; tunah Mbappe an thlung nghet zo lo leh mek a; player thar an dap mekna kawngah Benfica star Goncalo Ramos an be fel tep tawh nia sawi a ni.
An beisei kum 22 mi Ramos hian nikum Qatar ram World Cup-ah khan Portugal tan hat-trick siamin, European club hraw dangte pawhin an hel ve mek bawk.
PSG hian euro maktaduai 80 (£69m)-in Portuguese forward hi an dawr tih hriat a ni a, he thu buatsaih lai hian inremna an la tifel lo deuh.
PSG first team ruala training ve lo Mbappe!
