May 7, Nilaini zan khan UEFA Champions League semi-final hnuhnung zawk khelh a ni a. Parc des Princes a inkhel hmuhnawm takah Paris St-Germain chuan Arsenal an hneh nawn leh a, a vawi hnihnan Champions League final an lut. Final ah FC Barcelona hnehtu Inter Milan an hmachhawn zui leh ang.
An mualah ngei PSG hneh lova lo tlawm tawh Arsenal hian mikhual an nihna hmun Parc des Princes-ah hnehna chang a, inlehthalna thlentir ngei tumin tan an khawh. First leg-ah hrem vanga inlan thei lo Thomas Partey a kir a, PSG a hmachhawn thei. Partey an chhawr thei hi Arsenal in an hlawkpui a, thawhkhatnaa ang em em chu PSG midfielder te an ngam lo bik tawh lo. Thomas Partey hian winger te ai mahin cross a nei tam a, a long throw a hlauhawm thei viau bawk.
Gunners hian hma takah goal thun tumin tan an khawh a, an khingpuite an nawr bet nghal. Inkhel tantirhteah Declan Rice chuan a tauh lut nghal teuh hle a, a tauh er deuh hret vangin hmahruaina goal a thun thei ta lo thung. Rice-a’n a hun tha neih a hlah hnu hian Martinelli chuan Thomas Partey long throw atangin goal a thun teuh hle. Finishing tawih deuh nise chuan Martinelli hian goal a thun ngeiin a rinawm a, pet mumal lova a pal deuh nawk nawk vangin a hun tha neih chu lo thlawnah a chang zo va, PSG si nghak Gianluigi Donnarumma chawimawitu a ni lek fang ta zawk. Martinelli-a’n a hun tha neih a hlah hnu hian captain Martin Odegaard chuan shot pui zet a nei a, si nghak chetha tak Gianluigi Donnarumma chuan pui zetin a lo dang per leh hman teh tlat a, PSG a chhanhim nawn leh.
Arsenal in an tum anga goal an thun mai theih loh vangin PSG in inrintawkna sang zawk an nei chho zel a, an khel tha tulh tulh bawk. Inkhel tir lamah bet viau mah se PSG hian ball a chang hnem tulh tulh a, goal thun hmasa zawkah an tang ta nge nge. Minute 27-naah midfielder hmuhnawm Fabián Ruiz chuan pui zetin a hlap lut a, hmahruaina goal a thun. Chak mamawh chunga goal an chhuah hmasak leh vangin Arsenal an zuai a, an tan khelh that leh a har ta hle. Gunners hian an si phurh sut tumin tan khawh viau mah se goal an thun thei lo reng.
An mualah ngei inrintawk leh phur taka inlan PSG hian Arsenal tlarhnung tihsual vangin goal thun theihna hun tha nei thin mah se an chhawr tangkai zo lo reng a, penalty an thelh tel bawk. Si nghak David Raya-a’n penalty a dan vangin phur thar bawk mah se Arsenal an phur rei thei chuang lo. Thomas Partey tihsual hremin defender khel tha tak Achraf Hakimi chuan minute 72-naah mawi zetin a pet goal a, an hmahruaina a ti zau. Hun a tlem tawh a, 3-0 ngawta hma an hruai tawh bawk vangin final luh tuma inelna a tawp ang thawthanga ngaih a ni hman.
Dinhmun chhe taka ding Arsenal tan PSG player ten an ven nasat tak Bukayo Saka chuan vanneithlak ang reng takin minute 76-naah goal a thun a, Gunners tan beiseina thar a siamsak. Saka hian Calafiori cross atangin goal thun theihna hun remchang tha tak a nei zui leh nghal zat a, goal ruakah uiawm takin a pet goal lo tehtlat thung. Saka hian pet goal nawn leh ngat nise inkhel result a danglam dawrh thei mai thei a ni. Saka vek hian hlauhawm zetin shot leh bawk mah se si nghak chetha Donnarumma a paltlang zo lo nawn leh a, Arsenal hian goal dang an thun belh thei tawh lova PSG lakah an tlawm nawn leh ta a, final lut zo tawh lovin an tla zui ta a ni.
Arsenal hnehtu PSG hi season kal mekah an khel tha tluang viau a, UCL-ah a vawi khat nan an champion a nih pawhin an phu hle a ngaih a ni ang.
PSG lakah tui angin Arsenl an nem
