Daily Newspaper

PSG lakah United an tlawm

8

Nilai zan khan Champions League group stage khelh chhunzawm a ni a, Group harsa ber tura ngaih Group H harsatzia a lang chiang telh telh. Hmahruaitu Manchester United chu an mualah an tlawm. Khualmualah RB Leipzig an chak bawk vangin United, PSG leh RB Leipzig ten point kua theuh an hmu a, tla tur leh group champion tur a la chiang lo. An group atanga tla chiang tawh Istanbul Basaksehir an hmachhawn dawn PSG dinhmun a tha bera ngaih a ni.

PSG in phuba an la
Europe-a team lian, player tha tak tak kawltu Manchester United leh Ligue 1 champion Paris St-Germain te hi Paris khawpuiah an inhmachhawn tawh a. Mualneitu PSG an tlawm. Ligue 1 champion PSG hian an muala an tlawm tawhna phuba chu Old Trafford-ah an la a, 3-1 a hnehna changin hnehna pawimawh tak an chang. PSG laka an tlawm tum hian United midfielder Fred hnawhchhuah a ni. Fred vanduaina ni a nih laiin PSG player pawimawh Neymar tan ni tha tak a ni ve thung a, goal hnih a thun.

Season tir lama beisei phak lo PSG hian Old Trafford-ah bul an tan tha hle a, goal pawh an thun hma hle. Minute rukna lekah Neymar chuan hmahruaina goal a thun nghal. Hma takah goal an chhuah vangin United an hlauthawng a, PSG in inrintawkna sang tak an neih phah ve thung. Goal thun tumin an innawr tawk hle a, inkhel hmuhnawm an lantir. United hian goal thun theihna hun tha nei zauh zauh mahse an tlarhma player te an hlauhawm tawk lova, goal an thun thei mai lo. Na taka an nawr rah sengin minute 32-naah Wan-Bissaka siamsak atangin Marcus Rashford chuan goal thunin an si phurh a sut ta nge nge. Chawlhlawk dawn hnaihah United midfielder Scott McTominay chuan chiang zetin Neymar a rap lui a, boruak a alh phat. Neymar laka a chet dan vanga hnawhchhuah a ni lo hi McTominay hi a vannei hlein a lang.

Chawlhlawk hnu lamah pawh PSG in an khel tha chhunzawm zel. Minute 69-naah defender Marquinhos chuan mawi leh tha zetin a pet goal a, mikhual team in hma an hruai nawn leh. Mikhual team in hma an hruai nawn leh hnu lawk hian United midfielder Fred a chesual a, a vawihnih nan yellow card hmuin hnawhchhuah a ni. Fred hnawhchhuah a ni hi Ole Gunnars Solskjaer chuan referee thutlukna siamsual an tuar niin a ngai a. Fred chu hnawhchhuah tur a nih loh thu sawiin, yellow card vawihnih a hmuh dan chu vanduai vang a nih thu sawi tel in, Fred chu vanduai a ti hle.

Tlem zawk an nih bakah si phur zawkah an tan vangin United tan chet a har tawh hle. PSG in ball an chang hnem tulh tulh a, an khingpuite an nawr ta thei ta hle. 2-1 a chak tura ngaih an nih laiin goal dang an thun belh leh a, minute 90+1-ah hmahruaina goal thuntu Neymar chuan an goal thumna a thun belh leh cheu a, Old Trafford-ah ngei phu taka hnehna changin point thum hlutak an hlawhchhuak.

An mualah an tlawm vangin United hmabak a hautak a, last 16 an lut turin khingpui hautak tak an neih a ngai dawn. Red Devils hian khelh nga atangin point kua an hmu a, Group H-ah hmahruaitu an ni. Point kua tho hmuin PSG in an dawt a, United hmachhawn leh tur RB Leipzig pawhin point kua tho an hmu. RB Leipzig leh United te hian last 16 luh an inchuh dawn a, United tan khualmualah point khat hmuh a tawk dawn a. German club, club naupang, hmasawn chak em em RB Leipzig tan United hneh ngei a tul dawn a. United lakah an chak zo lo a nih chuan an tan last 16 luh a harsa hle dawn a. PSG in table mawng-phah Istanbul Basaksehir an hneh loh a ngai dawn.

United hian Premier League-ah pangana luah mektu West Ham chu inrinni zan hian an hmachhawn zui leh dawn. He inkhelah hian entu mipui awm an phal dawn a, khelmualah mipui eng emawzat an awm tawh dawn a, inkhel a nuam leh zual tura ngaih a ni.

Khualmualah Leipzig an chak hram
United leh PSG te nawr tawm chhunzawm zel turin RB Leipzig chuan khualmualah harsa takin hnehna an chang a.
Istanbul Basaksehir lakah hun tawp dawn tepa Sorloth goal thun hmangin an chak hram a, point thum hlu tak an hlawhchhuak. Mikhual team lakah Irfan Can Kahveci chuan hattrick siam bawk mahse a team a chhanhim zo lo.

An muala khel tha thei tak, United pawh lo hneh nawlh tawhtu Istanbul Basaksehir lakah German team in tha takin bul an tan a, minute 26-naah Yussuf Poulsen chuan hmahruaina goal a thun. Chawlhlawk dawn hnaih minute 43-naah Nordi Mukiele chuan an goal hnihna a thun zui leh. Minute 45+3-ah Irfan Can Kahveci chuan goal thunin an si phurh a sut then a, hnu fual zawk ni chungin chawlhlawk an hmang.

Chawlhlawk hnu lamah pawh mikhual team in bul an tan tha hmasa leh. Minute 66-naah Dani Olmo chuan an goal thumna a thun a, an hmahruaina a tihzau belh leh. Minute 72-na leh 85-naah Irfan Can Kahveci chuan goal thun zawn in, hattrick a siam a, an si phurh a sut zo. 3-3 a nih hnuin an inhnehtawk mai tura ngaih a ni hmang. Hun pangngai zawh hnu, minute 90+2-ah Alexander Sørloth chuan RB Leipzig tan goal pawimawh tak a thun leh nawlh a, khualmualah hnehna pawimawh tak an chan theih phah ta a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy