Daily Newspaper

PU LALDUHAWMA HI BANG AWM A NI RENG EM?

21

H. Laldingliana
Mission Veng

Tun hnaiah Mizorama thil thleng khat tak thlengin, politics-a thawm na tak, Serchhip bialtu MLA Pu Lalduhawma chu MLA atanga ban a ni a. Lainattu tam tak an awm laiin ban a nih danah, dan bawhchhetu chu dan ang a hrem tur alawm ti an awm bawk a. A enga pawh chu ni se, politics a ni miau a, mi tam zawk tan thiam zawk leh thiam lo zawk pawh thliar thiam a harsa ngei ang.

India ramah politician hmingtha tak tak, Central leh State enkawl a, ram tana thawh hlawk tak tak an awm laiin, thuneihna hmang dik lo, Jail bang zut hial an awm bawk a. Politician an ni emaw, sumdawng an ni emaw, tu mai pawh hian thubuai kan nei thei vek a, dan rorelnaa thiam kan chan leh chan loh chu Court thutlukna a ni. Thubuai nei zawng2 hian thiam loh an chang vek lo tih hre bawk ila. Thubuai nei zawng2 in thil dik lo ti vek lo tih hre bawk ila. Mihring mai ni lo, kan leilung leh nungcha zawng2 thleng hian dan hnuaia awm, dan hmanga hungbing vek kan ni a, tum loh takin dan a bawhchhiat theih laiin, pawisa lem lova dan bawhchhiat a awm thei bawk a. Mi tam takin Pu Duhawma ban chungchangah, Pu Duhawma hian ram dan bawhchhe lo leh politics hmanraw tha lo tak hmanga ban mai nia ngai kan tam hle a. Kan hre thelh deuh em aw a tih theih.
Inthlang ram, Democracy rama awm kan ni a. Khua, veng leh ram pumin kan aiawh kan thlang thin. Kan aiawha kan thlante hi ram danpui hnuaiah, a bik taka hungbing an ni a. Dan an bawhchhiat mai lohna tur te, a thlangtu mipui te hmakhaw ngai takin, a bik taka dan siam sak vek an ni. Sorkarin a mi chhawr, a hnathawk thlengin.

Pu Duhawma hi naupang te a nih laiin Mizoram MP a lo ni tawh a. A MP lai khan a thisen a la lum deuh nge ni, India danpui kalh a ni tih hrerengin, dan a bawhchhiat vangin a MP nihna chu paih sak a lo ni tawh a. A ma sawi danin MP a paih hmasak ber leh paih awmchhun a la ni. Record ropui nge a nih record zahthlak tak tih chu ama ngaihdan ni sela. Keini, MP pakhat nei ve tawk tan chuan record tha lama sawi tur a ni lovang.

Ban a nih chungchangah Assembly Speaker chuan dan hmanga paih a nih thu leh, thutlukna hrehawm tak a nih thu a sawi a. MLA meuh ban tur hian thutlukna chakawm tak a ni lovang tih a rin theih. Speaker hian dan hre lovin, dan ni lovin, politics thil vang mai maia ban a nih kan ring tak tak em? Kei chuan ka ring lo. Uluk taka dan a zir hnuin, dan hnuaiah, dan ang thlapin a ban niin ka ring thlap mai. VC tlangau in ban ang mai maia inban chi lah a ni hek lo, dan tlawhchhanin, ram danpui en chunga thutlukna a nih a rinawm.
Kan hriat angin Pu Duhawma hi political leader ni thin, Chief Minister tura zawrh hial a ni. A leader na hnuaiah mi tam tak awmin, he thutlukna hi a zuitute tan hriat a hrehawm hle ang. Bihar CM ni thin, Laloo pawh kha a CM laiin ranchaw supply chungchangah thiam loh chantirin Jail bang hial a zut a, court thutlukna kha a kaihruai party mi tan a na hle ang. Tuna Pu Duhoma dan bawhchhiat leh MP atanga paih a lo nih tawh dante kha Jail tanna chi ni lo mah se, mipui rorelna, inthlang rama thil thleng atan a hrisel lo hle a, Politics tui fim lohzia lanna a ni thei bawk ang. Dan bawhchhetu chawimawi hial duh khawpin kan nu thin. Dan hi mi tinin kan zawm tur a nih laiin, rorel tura kan thlan tlinte hi chuan a bik tak hian zawm uluk leh zual sela. Dan bawhchhe mai mai turah kan ngai lo.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy