Daily Newspaper

PU LALDUHOMA HIAN ANTI-DEFECTION LAW A BAWHCHHIATNA A AWM LO VE

11

-Lalnunmawia Pachuau

MNF MLA 8 ten Pu Lalduhoma, ZPM Legislature Party leader chu MLA atanga disqualify tura ngênin Speaker Pu Lalrinliana Sailo hnenah an zualko thu ka lo hria a, chu mi hnuah MNF MLA dang 2 ten an hêkna hi an han belhchhah leh hnuhnawh bawk a. Héktu an tam hian thawkchak deuh turah an ngai ni fahmiang, Zoram mipui titi luahchhotu ber a nih vangin han chinglet ve reng reng teh ang hmiang.

Zoram People Movement (ZPM) lo dinchhuah dan:
ZPM hi dated 15.07.2017 khan Zoram tana mi thahnemngai rual ten an lo din a ni a, Zoram siamthatna turin i tangrual ang u khai tiin pawl paruk lai mai kuahkhawmin an han dinchhuak ta a. Intawhkhawmna Assembly hmasa ber hi ni 3.10.2017 khan Chanmari YMA Hall-ah neih a ni. He meeting-ah hian party organ peng pawimawh tak tak te form a lo ni chho ta a ni. ZPM hian committee pawh nei rengin party 23.11.2017 nia committee chuan Party khata inchhunfin relin a kum leh MLA General Election 2018 chu hmachhawn ho an rel a ni. Tichuan ni 8.5.2018 chuan Chanmari YMA Hall-ah bawk Assembly nei lehin he tah hian Chief Ministerial Candidate atan Pu Lalduhoma hi ZPM chuan official-in an puang ta a ni.

ZPM anga Party Registration la neih bawk si loh chuan Independent Candidate anga Nomination file a ngai dawn tih hria in kum 2018 kum August thla chho khan Election Commission of India hnuaia Political party registration ni turin ZPM Constitution pawh duan nghal a ni a, Delhi-ah chhukthlakpuiin Party Registration dilna pawh hi zuk thehluh nghal a ni. Mahse vawi leh khata felduak thei a lo ni lo a, lehkha kalkual chhung neuh neuh nen kum 2018 General Election-ah chuan ZPM hian Party registration hi an nei ve hman ta lo a, Independent Candidate ang vekin Nomination pawh an lo file phah ta a ni.

Kum 2018 General Election chu a vawi 1-na atan an han hmachhawn ve ta a, Pathian leh Mizoram mipui te khawngaihna a zarah bial 8 lai maiah hlawhtlinna an han chang ve hlauh a, Pu Lalduhoma phei chu bial 2-ah a tlingkawp nghe nghe a ni. Mizoram mipuite khawngaihna vang liau liau a ni.

ZPM hian inthlan an hmachhawn dawn hian Independent angin Nomination an file tih chu zêp tur a awm lo a, Nomination-ah erawh ZPM Symbol hman Lukhum (hat) hman vek a ni thung a. ZPM Flag leh Symbol, Banner, Manifesto khat hnuaiah inthlan hi an hmachhawn tih hi Zoram mipuite hian an hre vek a ni. ZPM hnuaia Candidate te hian ni 24 October, 2018 khan Oath Taking (Chhechhamna/Intiamkamna) neiin Election-a thlantlin an nih chuan ZPM-in Mizoram dinchhuahna tura Policy a duan tihlawhtling tur te, ZPM Candidate an nih angin leh MLA an lo tlin chuan ZPM-in an tana inkaihhruaina leh thupek a duan te tha taka zawm turin an intiam a ni. He ZPM policy leh kaihhruaina hnuaia rinawm taka awm tura an intiamkamna ah hian ZPM Candidate tin te hian hming an sign hnan vek a, a copy pawh pek vek a ni bawk.

Hei bakah hian General Election Result an puan kha kan la hre reng ang a, Local TV Chanel Scroll te, News paper hrang hrang kha thlir let leh theih a ni ang. ZPM Candidate te kha Independent an ti lo va, ZPM tia record an ni deuh vek bawk ang.

Tichuan ZPM MLA te chu dated 16.12.2019 khan Rules 3 of the Members of Mizoram Legislative Assembly (Disqualification on Ground of Defection) Rules, 1987 hnuaiah Speaker pawmpuina thlapin ZPM Legislature Party tia din an ni ta a ni. Amaherawhchu, dated 8.7.2019 khan ZPM chuan Election Commission hnuaiah Party Registration an lo nei fel ve ta a, he mi hnu hian Speaker chuan ZPM Legislature Party tia a lo pawmpui tawh chu Party registration in nei fel tawh tiin a thiahsak leh ta a ni. ZPM hian Court-a han zualko em tul an tih loh vangin an ngawi ta zawk a ni. He mi hnu hian Zo Legislature Party (ZPM) tih hmingpu tho in an inform a phalsak leh ta a, ZPM hming chu a la pu chho ta zel ta tho a, Assembly House-a ZPM hming nuaibo an tumna chu a hlawhchham ta phawt a ni.

Pu Lalduhoma hi mahni thlangtlingtu Party phatsantu a ni lo:
Kan hriat theuh angin Pu Lalduhoma chu mahni thlangtlingtu phatsantute hremna dan hnuaia hrem turin MNF MLA 10 rual lai mai chuan Disqualify turin Speaker hnenah hekna an thehlut mek a ni a. Hei hi a chhan ber chu Pu Lalduhoma hi amah thlangtlingtu ZPM Office-ah a lo kal ve fo vang te, ZPM-in thalai rual an lawmluhna huna a lo tel vang te leh lawmluh vang te, ZPM-ah membership fee pein inziaklut thlap lo mah se, ZPM ang chiaha a awm vang te, etc.. tih hi MNF MLA te hekna point ber chu a ni.

Hetih lai hian mi thilchîk mi te chuan Assembly Session hnuhnung ber Sept. 1-3, 2020-a Pu Zoramthanga mualpho nasa lutuk, Peace Bonus Phuahchawp leh Flagship Programme Risk chungchangah Pu Duhoma’n a lepse nasat lutuk vanga thinrim puakkeh lo hrinchhuah niah an lo puhthlu ve mek bawk. MNF MLA te hekna point atang hi chuan Pu Lalduhoma hi mahni thlangtlingtu Party phatsantu dan Anti-Defection Law hnuaiah hian hrem theih a ni ang em? Pu Duhoma hi hlawkna ûma mahni thlangtligtu Party ZPM phatsantu a ni em tih hi chu Zoram mipuite hian min hrilhfiah thei ber zawkin ka ring e.

Anti-Defection Law lo pianchhuah chhan chu MLA/MP rinawmlo, pawisa duhluat vanga mahni thlangtlingtu party phatsana party danga hlawkna ûma sawrkarna va siampui te, pawisa vang bawk a sawrkar mék party pawh paihthlak hnial lova party dangin an thlêmthluk theih ang chi mihring kha India ramah an lo katnuk a, hemi venna atan kum 1985 khan India Consititution 52nd Amendment hi lo piangin Tenth Schedule, Anti-Defection Law hi a lo piangchhuak ta a ni.

Anti-Defection Law duangchhuaktute Legislature (Loksaba/Rajya Sabha MP) te hian he dan an pass dawna an tum ber chu, mahni thlangtlingtu Party phatsantu (Defectors) te MLA/MP an nihna atanga disqualify tir a ni. He dan an pass dawna MP rualte thiltum Legislative Intention hi chu tlangchhipa khaw awm ang maia hrilhfiah hranpa ngai tawh lo khawpa langchiang a ni.

Supreme Court of India hian a thurelna hmuna a ngaihpawimawh ber chu Dan siamtu te thiltum Legislative Intention hi a ni. Supreme Court Judgement hrang hrang thlir ila, Dan chhunga inziak thuken leh a thumal tin hian enge a thiltum tih hi chiang taka ngaihtuah tur a ni tiin judgement a lo siam teuh tawh a ni. Chuvangin Pu Lalduhoma hi lo disqualify tehreng pawh niin, Supreme Court hial lo thleng chho pawh ni se Court-in a thlirtel ngei ngei tur chu Dan siamtute thil tum Legislative Intention kha a ni. Engpawhnise Judgement hrang hrang leh dan chungchang te hi chu pawn lama lo sawi rawtui vak ai chuan Court tuala phawrh atan khêk hrih ila. Pu Lalduhoma hian ZPM-ah party registration a neihna leh inziahluhna pakhatmah phawrhchhuah tur an nei dawn lo bawk a, an lo Phuahchawp a nih erawh chuan thuhranah dah ta ila.

MNF MLA ten Pu Lalduhoma an hêkna dan leh section Ten Schedule Para 2(2) hi han thlirchiang ila. An elected member of a House who has been elected as such otherwise than as a candidate set up by any political party shall be disqualified for being a member of the House if he joins any political party after such election. Independent Candidate Pu Lalduhoma hian ZPM hi official takin in-registered thlapin a zawmna lehkha Document an show theih si loh chuan ‘political party a zawm chuan disqualify tur’ tih point-ah ringawt pawh hian sawihnawka chinpawr talh tum mah se, phuahchawpah a kalral hmel ta riau mai.

Pu Laldenga ho MNF MLA 24 te kha Independent MLA an ni: Kum 1987, state kan nih hnu lawk khan MNF hi ECI hnuaiah registered Political Party a la nih bik loh vangin Pu Laldenga ho khan Independent Candidate angin Election kha an lo fight tawh a. Tichuan MLA 24 neiin Independent MLA vek chuan sawrkarna an siam ta a ni. Pu Laldenga ho Independent MLA 24 kha MNF MLA an ti mai a, MNF Party Office-ah pawh duhtawkin an khawsain thu pawh an sawi nasain, mithar pawh an lawmlut ve ruih ruihin a rinawm a, thil langchiang sa a ni. Mahse party dang khan Independent MLA an nia, MNF angin an awm thianglo tiin an hêk ve duh lem lo.

Hetiang lai kara Opposition MLA pakhat Pu Lalduhoma, ZPM thlazar hnuaia Election-a thlantlin heti tak maia an han bei chho ta hi engdang vang niin a lang lo. Anti-Defection Law phenah hian Assembly House-a inlepse mualphona nghawngchhuah a ni tih hi mi pangngai chin chuan an hrethiam pha vekin a rinawm a, ZPM thanglian zel tur hmehmih an tumna pawh a ni thei tho bawk a. Kawng lehlama thlir erawh chuan Covid 19 kan tawrh chhunga Central atanga sum lo kalte mipui min hriattir thintu Pu Lalduhoma hi a hnawksak viau ta nge, Assembly Session-a thudik mipui min hriattir thin hi MNF tan a hnawksak hle zawk? Nge ni Hripui len vanglaia VC/LC inthlan hnua Covid 19 positive pung hluai issue khuh bo tumna tih hi chu ngaihtuah peihte tan dah ta ila.

Speaker Pu Lalrinliana Sailo hi tuboh leh dolung karah an lentir:
Pu Lalrinliana Sailo hi mi puitling tak leh huaisen tak a ni tih hai rual a ni lo a, Pu Duha thiantha tak a ni bawk nia sawi a ni. Mizo hnama Lalna lo chang thin Sailo lunglian thlah kalzel niin a fapa hming atan pawh Chhak leh thlang indo chawkchhuaktu Vuttâia tupa Thawmvunga tia phuah ngat kha a ni ve a. Khuavang laka Kungawrhi chhanchhuaktu Pawthira ngaisang em emtu he Sailo lunglian hi dik a tihna zawnah chuan dingtlang ngam tura ngaih a ni a, Pu Zorama hian a MLA patuai 10 te ang hian a hnukkual ve mai mai ang em tih erawh ngaihtuah a ngai ang. Chhia leh tha hriatna pawh hmang ngam lo khawpin Zoram politics hi luhchilhin mi thenkhatin milem anga an hnuhkawi mai mai Puppet leader an tih ang chi hi a ni ang em? Tuna a dinhmun hi chu MNF lam zawk hian dah that an tumna hmanrua nge tuboh leh dolung karah an lentir tlat mai hi hriatthiam har lai tak chu a ni.

Engpawh nise, MNF Ministry hnuaiah hian ZPM hian beihna chihrang hrang a lo tawk nasa tih hai rual a ni lo a, Ruling zawkin opposition ralpui phiara an phiar zawk ta mai hi a awm khat hlein a rinawm. ZPM lo piang chhuak leh lo thanglian chho zel hi MNF tan chuan mita khanchhuk awm ang maia hnawksak nia sawi an awm a, chhandamtu pianghlim Lal Heroda-in nuaibo a tum ang mai khan ZPM hi MNF lam hian an arpa chan lai denchhen hian rawt chimih an tum ve niin a lang.

An hmuhhmaih lian tak erawh chu 1966 chhoa Mizoram mipuite ang khan tun generation thalai rual te hi bumkawi chi an ni tawh lova, technology khawvelah kan cheng tawh a, vawikhat Dawtsawi hian minute 1 chhungin rampum mai ni lo, khawvel hi a dapchhuak tawh. Hmanlai politics anga hmasawnna kawnga opposition bial te repro tuma mipui vaubeh chi an ni tawh lo a hetianga mipui vaubeh ching hian ram ni lovin party chauh an hmangaih tihna a ni a, MLA leh Minister nitlak an ni hek lo. Indian Constitution hnuaiah Mizoram mipuite hian zalenna zau tak neiin an chhia leh tha hriatna fim tak hmangin ramhruaitu an thlang thei a, Rorel kumkhua tura inngai niawm fahrana Lalhrawt thin te paihthla theitu chu Mizoram mipuite bawk hi an ni e.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy