Pu Nguna hmangin CM-in
Pu Zirsanga case a bengper
– R Lalrinawma
Congress MLA C Ngunlianchunga case neih chungchangah corruption case avanga thiam loh chantir tawh Pu V Zirsanga chanchin chu chief minister-in a beng per nalh hle a, chutihrualin Pu Nguna hi thiam lohna a neih dawn loh avangin rang takin he case hi ngaihtuah fel nise an duh tih Congress hruaitu R Lalrinawma chuan a sawi.
Congress sawrkar laia deputy speaker ni tawh R Lalrinawma hian Thawhtanni khan Congress Bhavan-a inkhawmah an party vice president C Ngunlianchunga’n bail a dil chhan a sawifiah a. Kumin March-a Assembly Session-ah Pu Nguna hian ZPM-in LADC-a CEM atana V Zirsanga an thlem luh dan leh amah chief minister Pu Lalduhoma’n eng eng emaw tawktarh a neih chungchang a sawi chhuak a, chumi chu chhang ta lo chuan CM hian case a neih avangin anticipatory bail dil turin thu a rawn daih a, prosecution sanction a pek tur thu sawiin mawilo takin a ti zui tih a sawi.
“Pu Lalduhawma khan anmahni tan chuan a ti fuh khawp mai a, issue a divert chiang hle. Pu V Zirsanga corruption case-a court-in a convict tawh, kum 4 jail tang tura a lo tih tawh, ZPM-a thlem luh leh tawktarh chungchang chu Pu C Ngunlianchunga case chuan a lan chiang hle a ni,” a ti.
Pu Nguna hian case a neih a hriat loh avangin leh cheng khat mah a eiruk loh avangin anticipatory bail dil a tum loh thu a sawi a, a dil ta lo reng a, hemi hnu hian ACB ah case a neih leh neih loh a zawt a, case a neih thu an lo hrilh chauh a, anticipatory bail hi a dil ta chuang lo tih a sawi bawk.
2025 April 29-ah prosecution sanction pek a ni a. May 26-ah PC Act Special Court-ah chargesheet thehluh niin, June 17-ah Special Court hian Pu Nguna, Pu V Zirsanga leh Pu VL Hmuaka te court-a inlan turin a koa, Pu V Zirsanga leh Pu VL Hmuaka ten anticipatory bail an lo lak tawh avangin chargesheet copy pek hnuah court leh hun tur hriattir an ni a, hetah hian Pu Nguna chuan bail pangngai a dil ve chauh zawk tih R Lalrinawma hian a sawi a ni.
“Pu Nguna hunlai hian DPR siamna senso ni 3.10.2013 a pek leh compensation provision a awm loh avangin ram neitute leh LADC official-ten 2013 September 16-a an thutkhawm bak a hna thawh tak tak leh compensation pek vel chu a CEM tawh loh hnu MLA, minister a nih hnu veka thleng a ni a. He case hi rang taka ngaihtuah a nih a, dikna a lan chhuah thuai leh thil ti diklo an awm chuan an phu tawka hrem an nih thuai kan duh a, court-ah rinna kan nghat a ni,” a ti
Pu Nguna hmangin CM-in Pu Zirsanga case a bengper – R Lalrinawma
