Daily Newspaper

Pu Rama Tui-khurpui kha a kangchat lo tawp ang!

24
                         Zobiakvela (Masena)

Khawvel Economy tichhetu Coronavirus hri lêngin a nghawng tur hi rin phak bâkin a nasa dawn tih mi thiamte chuan an sawi thin a. Sorkar laipui leh state zawng zawng a nghawng dan tur pawh mi thiamten an chhut nasa!

India chuan kum 11 chhunga a sum thawhchhuah, Gross Domestic Product(GDP) hniam ber hun a tawng chho va, ram economy thanna tura beisei pawh kum 40 chhûnga a hniam ber hun tawng thei tura ngaih a ni. Finance Minister Nirmala Sitharaman chuan Union budget-a ruahmanna awm tawh sate chu March 31, 2021 thleng khawih rih loh tur a ti a. Prime Minister’s Garib Kalyan Package leh tun hnaia puan tak, Atmanirbhar Bharat package te atan chauh sum hman rih a ni ang a, scheme dang reng reng chu tun pawisa kum chhungin pawm a ni lo vang, a ti deuh bur!

Sorkar laipuiin sum a pek chhuah tur reng reng chu Department of Expenditure-in a pawm hmasak phawt loh chuan hman loh tur tih a ni deuh tawl! Hripui lengin khawvel ram ropui ber US economy a nghawng dan te, khawvel economy lian ber dawttu China pawhin kumin hian Economic Growth Target an siam dawn ta lo a ni a, chu chu Beijing-in kum 1990 atanga gross domestic product a neih loh hmasak berna tur a ni!

Mizoram pawh engtia nasain nge a nghawng ang tih Planning department lam pawhin zir/chhût chhinna fel tak an siam a. Hetih lai hian kan ram economy chhanchhuahna tur emaw, a damdawi lam chawh telna awmlo thuziak hmuh tur a tam hle thung! Mi thenkhat an ngawih theih viau laiin, thenkhat hi chuan Covid-19 hi sorkar hian chêt chhiatpui hle mai se, tih ngaihdan nei kan awm palh mai ang tih a hlauhawm khawp.

Kum 2020-2021 Mizoram budget chu cheng vbc.18,101 a ni a. Hemi chhunga kan dehchhuah ve tur, State’s Own Revenue chu cheng vaibelchhe 1285 a ni tih, Chief Minister khan budget a present-naah a sawi a. Central atanga kan budget estimate lo kal tur leh, keimahni thawhchhuah tura beisei zat hi kan pha dawn ta lo tih chu a rin thiam theih viau tawh a. A chhan chu, sorkar laipuiin a sum thawhchhuah punna/thanna Gross Domestic Product (GDP) tura chhût lawk 5%(growth rate) vel a nih laiin, -5 (minus 5) velah tla thla tura ngaih a ni. Keini state sum dehchhuah thanna tura GSDP chu 12.25 (growth rate) ni tura Chief Minister-in a lo sawi tawh pawh, -3.8 (minus) velah tla thla tura ngaih a ni bawk.

Hetih lai vek hian Mizoram chhunga Sector hrang hrang – Industry leh Private sector te sum thawhchhuah hlutna (value) belhkhawm/chhûtna atanga a lan danin kumin financial year (March thla tawp huamin) ni 21 chhûng inkharkhip a nih khan, mipui sum dehchhuah tur belhkhawm ‘Gross State Value Added(GSVA)’ cheng vbc. 432/- zet chu hloh tur ang leh, ni 40 chhungin vbc.819/- leh, ni 80 inkharkhip a nih khan cheng vbc. 1667/- zet hloh (lost) tur angin Planning department Study group chuan an tar lang a.

Kum kal ta 2019-2020 Mizoram budget kha cheng vbc. 10,692.30 a ni a. Khami kum khat chhunga hman tura pass ni si kha, March ni 12, 2020 financial year tawpah pawh cheng vbc. 7636.52 (72%) chauh hmuh (release) a la ni a. Heta lo lang chu Coronavirus (Covid-19)-in a tihbuai loh kumah pawh budget hmuh kim hman a ni ngai lo tihna a ni a. Chuti a nih chuan kumin hripui lêngin khawvel economy a tihbuai vek kumah phei chuan kan hmuh tur ang hi kan hmu pha dawn lo hle tihna a ni a. Kan budget 80% vel dawn hi sorkar hnathawk hlawh leh Office Expenditure-ah a kal si a! A luhaithlak dawn hmel khawp!

Hetih lai hian Mizoram Taxation Deptt-in chhiah (GST) a lak tling khawm pawh a tlahniam lo thei lo va. Contractor leh sumdawngten Goods and Services Tax (GST) an chhun luh hi state sum hmuhna hnar lian ber a ni a. Nimahsela, inkharkhip vangin hun eng emaw chen sumdawnna kalpui theih a ni si lo va, April 2020 thla phei kha chuan Rs.1435.16 lakhs (Vbc.14.35) chauh GST a lut a. Tlemin kan han inphelh thâwl hret a, May 2020-ah chuan Rs.4608.75 lakhs (Vbc.46.08)-ah a pung chho leh ta a, July thlaah pawh cheng vbc.45/- zet hmuh a ni leh a. Hemi awmzia chu inkharkhipna phelh dul chhoh zel a nih chuan kawng tam takah nunphung pangngai kan luah chho leh hret hret dawn tihna a ni.

Hetih lai hian inkharkhipna vangin kan sum leh pai dinhmun a chhia tih phat rual a ni lo va. Covid-19 lo thlen hma ang khan duh angin sum hman tur a awm thei rih lo tih pawh kan hre vek a. Nimahsela, a thim zawng leh beisei bo zawng ringawta inzirtirna hian ngaihtuahna dik lovah mi a hruai lut thei a, chu chuan beiseina nung neite khaw hmuh tifiah thei lêk lovin a hliahkhuh tlat palh ang tih hi thil hlauhawm tak a ni.

Hetih rual hian sorkar laipui, ram hruaitute hian ram dang ang bawkin economics lama mi thiam hmingthangte nen sum leh pai dinhmun, mipuiin nunphung pangngai an zawh leh theihna tur te, kan economy siam tha leh turin a thim a var thlu lovin ngaihtuahna an seng tih hriat reng a tha.

Prime Minister-in Economic Package thar a puan ropuizia te hi mi thenkhat chuan kan hmuh hmaih lui deuh tlat emaw tih tur a ni a. He Financial Package thar Atmananirbha Bharat Abhiyan hi Prime Minister Narendra Modi chuan ‘India ram chakna thar siamna tur, mi dang rinchhan lova India a din theihna tur’ tiin a sawi hmiah! Hemi atana sum an dah hi a theuneu lo hle; cheng vaibelchhia hlir nuai sawmhnih (Rs. 20.97 lakh crore) teh meuh zuk nia! Finance Minister Sirmala phei chuan economic package hi PM-in a la puan belh zel tur thu a sawi a. A tam lam hi Mizo tawng phei chuan dah ngaihna awm lo hial khawpa tam a ni ang e.

A mawlmang zawngin Covid-19-in sorkar a nghawng dan tur chu kawng tam tak awm bawk mah se, pawi lian thei ber tur nia lang chu, a hunah tum anga sum (budget) hmuh chak theih lohna a hring tur hi a nih hmel. Nimahsela, hetiang a ni chung hian State sorkar Project pawmtlakte chu Central-in a pawm mar reng tho tih hriat a ngai a. Covid-19 hian min luhkhung mah se, state sorkar project te chu tihhlawhtlin mar reng a ni tho tihna a nih chu.

Tun hnaia Central-in Mizoram sorkar Project (budget pâwn lam) a pawm, Finance Department-in an sawi thenkhat hi han en ila, Social Welfare & Tribal-ah Rs.107 crore hmuh a ni a. Tourism-ah Rs.1000 crore, Sports-ah Rs.1250 crore, UD&PA-ah 1800 crore bakah, July ni 2, 2020 khan Sports Minister Pu Robert Romawia Royte chuan Lengpui Football Playground-ah Artificial turf phahna tur leh, July ni 7 khan Rs 16751.70 lakh senna tur Muallungthu-ah Hockey Synthetic Turf phahna tur lung a phum bawk a. Tin, July ni 30 khan cheng nuai 4635 senga 1st MAP khelmual thawmthatna tur Chief Minister-in lungphum a lo phum tawh bawk.

Hengte han ngaihtuah hian Coronavirus hripuiin khawvel ram economy a nghawng chhiatna kârah, ‘Pu Zoramthanga Tui-khurpui hriat kha a lo la kangchat mai lo ve’, ka han ti a ni e.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy