Daily Newspaper

Pu Rokunga’n Tlangnuam veng sawi nan eng nge a hman?

95

-MS.Dawngliana Pachuau

He hla lar leh chuai thei lo tak mai hi (a ziak kan hmuh thin dan tlangpui) en chhin ang u.

KA PIANNA ZAWLKHAWPUI

Phuahtu – Rokunga
Phuah kum – 4.2.1969

1 Ka pianna Zawlkhawpui,
Hawih te’n i mâwi mang e,
Chul hian i mâwi lo;
I tlâng lal chhîpah siktui tling khawmín,
|iahtânga’n zai thiam, ri-mâwi a fâwn vêl,
I sîra’n tlâng lian,
Hmàr tlânga’n Laipuitlâng, ‘chhimhlei Tlângnuam tlângte’n’ an hual che.

2 Dar ang lênna khawpui,
Tlángkìmah mâwi mah la,
I nun a mâwi lo.
I chhûngah sualna dorâl ang a lian;
Dikna a fam ta, felna a tlâwm ta,
Nun suar ang a chim;
Tham leh bawlhhlawhnate’n tual an lêng,
Awi maw! A pawi em mai!

3 Tual kan lênna khawpui,
Tlâwm a’n ka phal lo che,
Tho leh ta che maw;
Chhinlung chhuakah chuan van Lal nau i ni,
Chhâm ang i zàlna sual khurpui laichhuat,
Aw, a pawi em mai!
Felna silhpuan sinin tho leh la,
Hlimte’n i lêng zâwk ang.

Pu Rokunga’n ‘Ka pianna Zawlkhawpui’ tih hla hi a boral kum (4th, Feb, 1969)-a a phuah a nih hmel a, a hun hnuhnung lama a kutchhuak a nih vang pawh ni mai loin, kan ram dinhmun (Aizawl hi kan ram hmel lanna a ni miau a) tar langtu leh, fuihtu tha tak a nih avang hian a hluin a lar a, a nung chho viau reng a ni ber mai.

An sawi danin, ‘A fanuin he hla hi a thlûk a lo thiam hman hlauh a; tichuan, zofate zingah sak chhuah leh hriat theihin a awm phah ta a ni’ an ti. Chutiang taka a phuahtu pawhin a chul-nel hman loh hla chu a ni tlat mai a, rin dan leh ngaih dan sawi mai bak chu hriat fiah a har ta deuh maithei a; ama ziak hmu phak leh hre chiangte sawi zui atan pawh a tha hrim hrim awm e, tiin, amah Pu Rokunga hla phuah thin dan te, kan tawng kal-phung leh hla thu chheh thin dan thlirin he hla chang khatna a,

‘Hmar tlanga’n Laipuitlang, chhimhlei Tlangnuam, tlangte’n an hual che.’

tia kan ziah thin hi chu a dik hlel deuhin, ama kutchhuak atan chuan a phuai mah mah deuh em ni aw, a tih theih tlat mai.

Ama hla phuah tho ‘Ar ang kan vai tawh lo’ng’ tih hlaah hian ‘Chhimhlei tual’ tih hmun hnih ngawtah a hmang a, (Aw, chhimhlei ‘tual’ kan lenna tlang), hla phuahtu dangte pawhin ‘chhimhlei’ an hmanna kan en chuan, ‘tual, tlang, run, nula/lanu, zaleng, naufa,’ emaw talin an zawm zet loh chuan hming bik (proper noun) ang hi an behtir ngai lo ni hian a lang a, _’Chhimhlei tlang, Nuamtlang te’n an hual che’._ tiin, Tlangnuam hi a hming bul ‘Tlang’ a lo nih ve avang hian, ‘Chhimhlei tlang’ tih zawh chiaha Tlangnuam (veng hming) han dah leh turin, ‘tlang’ chu a awm kawp rual dawn tihna a ni a, chu chu thiam taka siam remin, (Hla phuahtu dangte hman thin danin) ‘Vazun’ aia ‘zunva’ a hman ang khan, (A khi tlang sangpui khi rawn khumin’ tih hlaah) Tlangnuam hming chu ‘Nuamtlang’ a ti ta mai niin a lang. He hla tho (Ka pianna Zawlkhawpui) chang hnihna pawh hi kan en chuan, kan khawsakna Aizawl khawpui chu mihring ruangam anga chanin, a kimtlang (‘tlangkim’ tia a hman ang hian) chu mawi mah se, a nun a mawi loh thu a sawi tâkna thu ang hian, (‘Tlang kim’ tia tlang zawng zawnga mawi ta anga sawina emaw ti pawh kan awm maithei bawk) mite hman ngai vak loh ‘Nuamtlang’ tiin Tlangnuam hming hi hla-rua nalh takin a chher thar zawk a nih hmel. ‘tiahtang’ han tih te pawh, mi dang hman ngai loh tak thil niin, he hlaah hian a dah tel nghe nghe hi.

Hmar tlanga’n Lalpuitlang, Chhimhlei tlang, Nuamtlang ten an hual che,

Han tih zaih chuan, ‘Hmar’ (hmar lam sawina) zawm chiah a, ‘tlang’ a dah angin ‘Chhimhlei’ (Chhim lam sawina) zawm chiahah hian ‘tlang’ a dah hi a inhmehin a rem ta thlup zawk a ni.

‘Tlangnuam’ hming pangngai hian hmang ni se, a tawp lama ‘tlang’ dah nawn leh khi tul ti hauh loin, thu dang a dah zawk maiin a rinawm bawk.
Tlangnuam tlangin min hliah,
Durtlang tlangah ka chho,
te kan ti ngai meuh lo awm e.

Tlangnuamin min hliah,
Durtlangah ka chho,
kan ti mai thin ang khan,

‘Laipuitlang tlangin (‘te’n’ tih la telh leh phei chu a mak lehzual) min hual’ pawh kan tiin a rinawm loh bawk.

Heng, chhim leh hmar, chhak leh thlang sawina kan neihte hla thua hman a nih reng rengin, eng hming bik (Proper noun) emawa kan zawm dawn chuan a karah eng emaw kan dah thin a nih kha maw.

‘Chhimhlei tlang/tual/pial/leng/zaleng/nula/lanu etc., kan tih hnu-ah kan zawmna tur eng hming emaw kan sawi chauh thin tlangpui ang bawkin,

Chhaktiang ram/zo-/val. kan ti hmasa te te thin a nih kha.

Pu Rokunga hi Zofate zinga hla phuah thiam chungchuang leh kan chhuan em em a ni. A hla phuahte hi chìk taka kan en chuan, thil hming leh thumal kan neihho hi hla thluk hmangin a pawt then/fân ve vak vak lo a, a theih leh remchan dan angin a hla thute lam ti buai lo turin a thluk a siamin, chumi hla thluk mil tur chuan a thu a chhep rem thiam em em a ni tih pawh kan hriat kha. ‘Kan zotlang ram nuam hi chhawrpial run i iang e,’ Tih hlaah te pawh hian chiang takin kan hre thei awm e.

Tichuan, he hla pawh hi ‘Chhimhlei’ tih chu bùl taka hmantirin, ‘Tlang’ tih hming lo pu tel veng hming tawpah, Mizo tawng kal-phung herh deuh tak hmangin ‘Tlangnuam tlangte’n’ (plural) chhim lamah Aizawl kan lo hualtir vel khup khup tawh thin a, Pu Rokunga thil chin tam loh tak, ‘Tlangnuam’ veng chu, hla thlûk hmangin kan pawt then a, (‘Tlang’ kan thlûk vang vang hnuin, ‘Nuam’ kan ti leh chauh) Tlangnuam hming tawpa ‘nuam’ hnuah a zawm zatin, thumal ni loa kan hriat zawk ‘tlang’ nen bawk kan han lam leh nghal zat mai te hi chu, kum za chhunga kan Mizo hla phuah thiam bera kan neih, Pu Rokunga hla phuah dan hmang ni hian a lang lo deuh tlat a. Hetia kan lam kawp ‘Nuamtlang’ zawk hi ‘Tlangnuam’ veng hming zawk tura a phuah chhuah leh lo tar chhuah a nih hmel ta zawk a, kan han sawi fiah pawhin a thu tum a inang reng a, inang reng si-ah hian, hla thu kalhmang dik leh fel zawk hmanga Pu Rokunga hla phuah kan ziahsak thin hi a tha viau awm e.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy