Pachhunga University College chuan village adoption kalpuia Khawrihnim an zirchian leh kawng hrang hranga an enkawl thin chu November 9 khan Govt High School Khawrihnim kawtzawlah kharna hun hmangin a hmawr an bawk.
Kumin September 24 khan PU College hian Khawrihnim hi a ‘adopt’ a. Hemi chhung hian he college zirtirtute hian kawng hrang hrangin an khua hi an zirchiang a, an zirchianna hi a bua chhuah turin buatsaih mek a ni. An thil hmuhchhuah tlangpui chu Mizo tawnga siamin adoption kharna inkhawmah hian PUC vice principal Dr Margaret Z Khiangte chuan a tlangzarh a ni.
PUC hian Khawrihnim an zirchian bakah he khuaa zirlai titha pali chu PUC-ah direct admission pek an ni a. Khawrihnima HSLC leh HSSLC titha berte hnenah award pek an ni. He khuaa Govt High School, Middle School leh MUP te tan zirna kaihhnawiha zin harhna (exposure tour) an buatsaih a; PUC-a academic department hrang hrang leh NSS Unit ten he khua hi tlawhin an khawtlang tana tangkai tura an ngaih kawng hrang hrangin hma an la a. Heng bakah hian YMA, MUP, MHIP leh middle school hnenah thilpek an pe bawk
PUC hian kum 2012 atang khan village adoption programme hi a kalpui a. Phulpui, Lungleng, Dulte leh Khawrihnim an adopt tawh. Village adoption programme atan hian PUC zirtirtute chuan sum an thawhkhawm thin a ni.
PUC-in adoption hmawr bawk
