Indian martial artist, Sidhu Kshetri, kum 42, chuan Guinness World Records bu-ah a hming a ziah belh leh ta a, tun tum chu punching bag hnek rei thei ber record a siam a, darkar 55 leh minute 15 chhung chawl lovin a hnek char char mai a ni. Sidhu hian a hmaa hetiang record chu minute 5-in a rawn khum ta a ni.
Guinness inkaihhruainaah hian record siam tur hian duh duh dana hnek ngawt theih a ni lo va, second hnih danah vawi khat tal a hnek hman ngei ngei tur a ni a, chutah pawh zawi tea hnek phal a ni chuang lo a, a hnek deuh pawp pawp reng tho a ngai a ni.
Hetihrual hian darkar khatah chawlh minute 5 zel a nei theia, a chawlh neih hi a duh chuan a khawl thei a, heng a chawlh neih chhung hian ei leh in leh inthiar te pawh a tih vek hman a ngai a ni.
Sidhu Kshetri hi Taekwondo championships-ah pawh India ai lo awh ve zak zak tawh a ni a, Guinness World Records-ah pawh a mikhual tawh bik lo a, 2013 khan minute thum chhunga ke khat chauh hmanga martial arts kick tihnem thei ber record siamin, vawi 620 a kick hman a, 2011-ah minute khat a kick hnem hman ber record siamin, vawi 168 a kick hman bawk.
Sidhu chuan, “Martial arts hi kum 25 chhung ka lo tuipui ve tawh a. Kan ram hming tih lar nan eng emaw tal tih ve ka duh avangin world record siam hi ka tum a ni,” a ti.
Tuna a record siam chu hautak a tih thu sawiin, “Darkar 20-na vel atang khan chuan a na tan tawh khawp mai. Khatah khan ka infuih thar sauh sauh a, eng chen chiah nge ka thlen theih tih infiah turin ka infuih nasa hle a, rilru lamin a tum tlat chuan ka theih ngei ka ring a ni.
“A harsa lai ber chu a zan hnihna kha a nia, darkar 30-na vel a ni ang, mu lova ti chhunzawm char char ka ni bawk nen. Tawrh chhuah kha a hautak khawp mai, mahse, ka thiantha leh chhung ten min lo fuih char char a, chu chuan min tiphur a ni. Darkar khat dang ti leh hram hram turin ka infuih zel a, hei hi ka thlang ta a ni,” a ti.
Punching bag hnek rei thei record siam
