A rim a na viau nain purunvar hi chawhmeh chi hrang hrangah kan telh nasa hle a, taksa hriselna atan thatna pawh a ngah hle. Antimicrobial, anti-inflammatory properties a neih bakah anti-oxidant a ni a, blood clot risk a tihniam a, cholesterol level te pawh a tihniam thei niin Times of India health section chuan a tarlang.
Mithiam ten zirchianna an neih atanga an hmuh danin purunvar hian 7%-in cholesterol level a tihniam thei. Hypercholesterolemia nei ten aged garlic extract (AGE) an ei phei chuan an taksa a cholesterol chhe chi LDL cholesterol chu 10%-in a tlahniam thei niin an sawi bawk.
Zirchianna neitu dang chuan nitin purunvar fang hnih, kar ruk chhung ei ziah hian cholesterol level chu 12%-in a tihniam thei a, LDL cholesterol chu 17% in a tihniam thei bawk, triglyceride level pawh 6%-in a tihniam thei. Purunvar 400mg ah hian allicin 1mg awm anga chhut a ni.
Purunvar hian cholesterol chhechi LDL level bakah total cholesterol leh triglyceride level a tihhniam rualin, cholesterol tha chi HDL chu a tisang ve thung a, zirchianna thenkhatah chuan kar ruk chhung nitin purunvar ei hian HDL level hi 15%-in a tisang thei niin an sawi bawk. Hei bakah hian thla li chhung nitin purunvar ei hian blood lipip profile pawh a tha zawngin a nghawng a nei niin an sawi bawk.
Hetihrual hian purunvar chu cholesterol level tihhniam hlenna a ni chuang lo va, a thatna zarzo reng tur chuan ei reng a ngai a, cholesterol a tihhniam tawh chu purunvar ei chhunzawm loh a, cholesterol tisang thei chi lifestyle kan neihchhunzawm reng tho bawk si chuan thla ruk hnuah a cholesterol tihhniam tawh chuan a hma angin a rawn sang leh thei.
Purunvar ei hian side effect te pawh a awm ve a, thenkhat chuan thinthip (heartburn) te an nei thei a, thakw rimchhia leh pum lam fel lo te pawh an neih phah thei. Mahse, purunvar zung hnih vel lek ei chuan hetiang harsatna hi a thlen pha lo ni a ngaih a ni.
Purunvar hian blood clot a veng thei a, mahse, blood clot damdawi ei lai i nei tawh a nih chuan nitin purunvar ei chu i tan a tha lo zawk thei a, i ei duh a nih chuan doctor rawn ang che. Hei bakah hian purunvar hian lipid profile eng emaw chen a siamtha thei nain doctor te chuan damdawi thlah phah nana hman erawh an remti lem lo, damdawi hnathahw puitu atan erawh a tha viau ang. Chutiang bawkin cholesterol tihhniam nan pawh damdawi ei lai thlah phah nan hman emaw, purunvar ka ei tho tih vanga ei leh in insuam loh phah nana hman chuang loh tur a ni.
Purunvar-in cholesterol a tihniam thei
