Putin-a’n drone-a Ukraine beihna
a chhang dawn – Trump
Vladimir Putin-a chuan Ukraine-in nasa taka drone hmanga Russian airbase-te a bei chu a chhang let ngei dawn tih a sawi tih US President Donald Trump-a’n a sawi.
Russian president nen phone-a an inbiak hnuah Trump-a chuan, “President Putin-a’n a sawi a, tun hnaia an airfield beihnate chu an chhang let ngei dawn tih a sawi a ni,” a ti.
Trump-a hian darkar khat chuang an inbiaknaah hian Russia leh Ukraine inkara ‘inremna lam a pan lo’ tih social media-ah a tar lang bawk.
Hruaitu pahnihte hian Iran chungchang pawh sawiin Trump-a hian Putin-a chuan nuclear chungchanga inbiaknaah an ramin a puih theih thu a hrilh tih a sawi.
Russia-a sorkar hnuaia news agency, RIA Novosti chuan Putin-a hian Ukraine chuan inbiakna ‘a tibuai’ niin Trump-a hi a hrilh tih an tar lang a. Kyiv-a sorkar chu ‘firfiak pawlah a insiam’ niin a sawi bawk.
Hruaitu pahnihte hian ‘an ramin thawhhona tha an neih leh theihna tura an ngaihdante pawh an inhrilh a, a tak pawh a thlen theih a beiseiawm’ tih an tar lang bawk.
Tuna an inbiakna hi Ukraine-in rinlawk loh taka June 1-a drone hmanga Russian airbase-te a beih hnua a vawi khatna a ni a. Kyiv chetnaah hian nuclear ralthuam phur thei bomber-te pawh tihchhiat a ni.
Kremlin chuan a hnuah Trump-a hian Putin-a hnenah hian US hian beihna tur hi a hre lawk lo tih a hrilh tih an tar lang.
Kar hmasa khan Trump-a hian Putin-a chu Ukraine nena an indona kal mek tihtawpna tura che chhuak turin chawlhkar hnih hun a lo pe tawh a. Putin-a’n drone leh missile-a Ukraine a bei reng chu ‘mei nena infiam’ tiin a sawi bawk.
Hetih lai hian Nilainia Truth Social-a a thu tar chhuahah erawh Trump-a hian hun tiam a pek a sawi lang tawh lo thung.
Trump-a hian Putin-a nen hian Iran chungchang pawh an sawi dun a, an pahnih hian ‘Iran-in nuclear a neih theih loh’ an duh ve ve nia a hriat thu a sawi bawk.
US hian Iran hi dawr mekin reactor fuel atana hman theih, nuclear ralthuam atan pawha hman theih, uranium chhek lo turin a ti a. Inrinnia inbiaknaa rawtna a thlen hi Tehran-in a la chhang lo.
Putin-a’n drone-a Ukraine beihna a chhang dawn – Trump
