Hruaitu Xi Jinping leh Vladimir Putin te chuan May 16 a Beijing a inhmuhna an neihah khawvel buai nuai nuai karah inthianthatna nghet zawka kalpui zel tumin Russian president chuan Ukraine nena indona kalpui mekah leh a economy hrek a nihnaah China thlawpna nasa zawk a ngiat bawk.
Tun hi March thlaa president atana thlan tlin a nih leh hnua Putin an ram pawn a chhuahsan hmasak ber niin thlaruk chhunga China tum hnih a tlawhna ni tawh bawkin Ukraine a run avanga Russia hrekna kal mekah China chu Russia tana pawimawh tawp a ni.
Putin chu Xi chuan ropui taka lo lawmin Beijing a Great Hall pawnah amah hmuahna neih niin chung te chu state broadcaster CCTV ten an tichhuak a ni.
Ram pahnih hruaitute inchibai laiin ram pahnih hnam hla te play ni bawkin Putin hi ni hnih a cham dawn a ni.
Meeting an neihnaah Xi chuan Putin chu ‘old friend’ tia sawiin China-Russia inlaichinna chu ‘remna duhna’ tiin Beijing Foreign Ministry thuchhuak chuan a tarlang.
“China chuan Russia nen he khawvelah dikna dinchantir a nih theih nan thawh a inpeih reng a ni” tiin Xi chuan a sawi a. “China-Russia inlaichinna hi rimtaka thawhchhuah a ni a, ram pahnih ten an chhawm nung zel tur a ni” tiin a sawi.
Putin pawhin XI hnenah ram pahnih inlaichinna chu ‘international arena a ngelnghehna siamtu’ tiin a sawi bawk a. “Russia leh China inlaichinna hi thlengtlawrzuan a ni lo, midangte kalh duhna vang a ni lo,” a ti bawk a. “|angrualin, principles of justice leh democratic world order te international law behchhanin kan humhim a ni,” tiin a sawi.
Russian leader hian an ram chuan Ukraine indona kalpui mekah frontline tinah a sipaite chuan hma an sawn zel a tih hnu lawkah China hi pan a ni a.
Xi thung erawh kar kalta lawk khan Europe ram pathum tlawh thungin Khawthlang ram tena Moscow nena an inlaichinna an sawiselna pawh hnawl niin khawthlang ram te chuan China chuan Russian energy man tlawm tak takin a leisak tiin an dem thung a ni.
“Tun hi Putin-an president atana lakluh a nih leh hnua ram pawn a chhuahna hmasa ber a ni a. Sino-Russia inlaichinna chu sang zawka dah a tum tih a chiang a ni,” tiin independent Russian political anlyst Konstantin Kalachev chuan a sawi a. “Ram pahnih hruaitute hian mimal taka inthianthatna an neihzia a lang bawk,” tiin a sawi bawk.
Mahse ram pahnih economic partnership chu tun hnaiah Khawthlang ram te chuan uluk zawka thlithlaina an nei thung a.
Thla kaltaa Beijing a Xi hmutu US Secretary of State Antony Blinken chuan China chu Russia in Ukraine a runna nunrawng takah thlawpna pe lo turin a vau thung a, China chuan Russia in rocket, drones leh tanks te a siamchhuah theih nana hmanraw pawimawh a pe tia puh a ni.
China chuan official tak chuan Ukraine indonaah neutral intiin Russia-in a runna pawh demna thu a la sawi lo va, chutih laiin palai hna thawh a inhuam thu a sawi reng bawk. Putin-an China a tlawh hnuhnun ber khan Xinhua tena an kawmnaah Beijing chuan Ukraine indona chinfel tak tak duhna a nei tiin a lo sawi tawh bawk.
Russia-in Ukraine a run hnuah China-Russia trade chu nasa takin a pung thung a, kum 2023 khan ram pahnih insumdawntawnna chuan $240 billion a hawlh hial a ni.
Mahse Washington in Moscow puitu financial institution te chu hrek a tum thu a sawi hnuah March leh April thla khan China-in Russia-a thawn luh a neih chu a tlahniam ta vak thung a ni.
Nikum December thla khan United States of America President Joe Biden chuan Russia war machine te puitu foreign bank te chu hrek remtihna a pe a, chung financial institution te chu dollar kaihhruai global financial system hmang thei lova hrekah a vau a ni.
Putin leh Xi ten inkawmna nei
